ठाणे जिल्ह्यातील ग्रामीण भागातील सार्वजनिक बांधकाम विभागाच्या अंतर्गत रस्त्यांसाठी तब्बल 1156 कोटींचा निधी मंजूर करण्यात आला असून या कामांची सुरुवात झाली असल्याची माहिती सार्वजनिक बांधकाम मंत्री रवींद्र चव्हाण यांनी आज डोंबिवलीत पत्रकार परिषदेत दिली. ठाणे जिल्ह्यात पहिल्यांदाच इतक्या मोठ्या प्रमाणात निधी देण्यात आल्याचे सांगताना सार्वजनिक बांधकाम मंत्री रवींद्र चव्हाण यांनी मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांचे आभार मानले आहेत.
ठाणे जिल्ह्यात ग्रामीण भागातील रस्त्यांचे तसेच नव्याने रस्ता बांधणीसाठी आलेला निधी, ठाणे जिल्ह्यातील ग्रामीण भागात सुरू असलेल्या रस्त्यांच्या कामांची माहिती देण्याबाबत आज सार्वजनिक बांधकाम मंत्री रवींद्र चव्हाण यांनी डोंबिवलीत पत्रकार परिषद घेतली होती. यावेळी मंत्री रवींद्र चव्हाण यांनी ठाणे जिल्ह्यातील डोंबिवली, भिवंडी ग्रामीण, भिवंडी, मुरबाड, शहापूर, कल्याण पश्चिम, कल्याण ग्रामीण, अंबरनाथ, उल्हासनगर आदि भागात रस्त्यांसाठी मोठ्या प्रमाणात निधी देण्यात आल्याचे सांगितले. ठाणे जिल्ह्यातील जवळपास सर्वच आमदारांना रस्त्यांसाठी सार्वजनिक बांधकाम विभागाच्या माध्यमातून निधी देण्यात आला असून रस्ते सुस्थितीत राहावेत व दर्जेदार कामे व्हावी त्याकडे शासनाचा भर असल्याचे देखील चव्हाण यांनी सांगितले.
पंतप्रधान नरेंद्र मोदी यांच्या नेतृत्वात मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांचे सरकार आल्यानंतर राज्यातील विकास कामांना गती मिळाल्याचे त्यांनी सांगितले. या पत्रकार परिषदेत मंत्री रवींद्र चव्हाण यांनी डोंबिवली परिसरात लॉ कॉलेजचे मागणी होत होती या पार्श्वभूमीवर जोंधळे कॉलेज, जोशी हायस्कूल दोन ठिकाणी लॉ कॉलेजसाठी परवानगी देण्यात आल्याचे सांगितले. शहरात लॉ कॉलेज नसल्याने अनेक जणांना उल्हासनगर, मुंबईच्या दिशेने शिक्षणासाठी जावं लागत होतं आता ही व्यवस्था शहरात झाल्याने शहरातील विद्यार्थ्यांना लाभ होईल असा विश्वास त्यांनी व्यक्त केला. यावेळी मराठी माध्यमाच्या शाळांबाबत देखील शासनाकडून सकारात्मक पावले उचलले जात असल्याची माहिती मंत्री चव्हाण यांनी दिली.
लोकसभा निवडणूक कोणी लढवावी हा निर्णय दिल्लीत घेतला जातो – सार्वजनिक बांधकाम मंत्री रवींद्र चव्हाण –
उद्योग मंत्री उदय सावंत यांनी रत्नागिरी लोकसभा मतदारसंघावर दावा केला होता. याबाबत बोलताना सार्वजनिक बांधकाम मंत्री रवींद्र चव्हाण यांनी लोकसभा निवडणूक कोणी लढवावी हा निर्णय दिल्लीतील पार्लमेंटरी बोर्ड घेतं. राज्यातील निर्णय एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार घेतील. ती यादी गेल्यावर दिल्लीत शिक्कामोर्तब होईल असे सांगितले.
सरकार मराठा समाजाला न्याय देणार – मंत्री रवींद्र चव्हाण
उद्या मराठा आरक्षणाबाबत विशेष अधिवेशन बोलवण्यात आले याबाबत बोलताना मंत्री रवींद्र चव्हाण यांनी मराठा समाजाला न्याय देण्याचं काम सरकार करेल असा विश्वास व्यक्त केला.
.png "Videos"){kind=small}
