पुण्यातील चारही धरणांत 94 टक्के पाणीसाठा; 'खडकवासला'त गेल्या वर्षीच्या तुलनेत 1.74 TMC घट
पुणे : पावसाने पाठ फिरविल्याने पुणे जिल्ह्यातील दुष्काळी परिस्थिती अधिक गंभीर होत असताना, शहराची तहान भागविणाऱ्या खडकवासला प्रकल्पातील चारही धरणांच्या पाणीसाठ्याकडे आता चिंतेने पाहिले जात आहे. गुरुवारी (दि. १) सकाळी सहा वाजता उपलब्ध आकडेवारीनुसार खडकवासला, पानशेत, वरसगाव आणि टेमघर या चारही धरणांत मिळून २७.४१ टीएमसी म्हणजे ९४.०६ टक्के पाणीसाठा आहे. मात्र, सर्वांत महत्त्वाची बाब म्हणजे चारही धरणांमध्ये गेल्या २४ तासांत पाण्याची आवक शून्य नोंदविण्यात आली आहे.
गेल्या वर्षी याच कालावधीत या चार धरणांमध्ये २९.१५ टीएमसी म्हणजे १०० टक्के साठा होता. त्यामुळे यंदाचा साठा गतवर्षाच्या तुलनेत १.७४ टीएमसीने कमी आहे. पावसाने पुन्हा जोर धरला नाही, तर उपलब्ध साठ्यावर पुढील महिन्यांचे पाणी 5 नियोजन अवलंबून राहणार आहे. खडकवासला धरणात सध्या ०.९३ टीएमसी म्हणजे ४६.९७ टक्के साठा आहे. पानशेतमध्ये १०.२२ टीएमसी (९६.०३ टक्के), वरसगावमध्ये १२.५६ टीएमसी (९७.९७ टक्के), तर टेमघरमध्ये ३.७१ टीएमसी (१०० टक्के) पाणी आहे.
दरम्यान, पुणे जिल्ह्यातील काही तालुक्यांमध्ये पावसाचा खंड आणि पिकांवरील परिणाम यामुळे दुष्काळी परिस्थितीची तीव्रता वाढत आहे. अशा पार्श्वभूमीवर धरणसाठा समाधानकारक दिसत असला, तरी ‘साठा किती आहे’ यापेक्षा ‘नवीन पाणी किती येत आहे’ हा प्रश्न अधिक महत्त्वाचा ठरत आहे. सध्या चारही धरणांची आवक शून्यावर आल्याने आगामी काळात पिण्याचे पाणी, शेती आणि शहराच्या वाढत्या गरजा यांच्यातील समतोल राखण्याचे आव्हान प्रशासनासमोर असेल. धरणे भरलेली असली तरी पाऊस थांबला आहे; त्यामुळे पुण्याच्या पाण्याची खरी परीक्षा आता सुरू झाली आहे.
आतापर्यंत 19.05 टीएमसी पाणी सोडले
चारही धरणांत मिळून पाण्याची आवक शून्य असली, तरी खडकवासला धरणातून पाणी सोडण्याची प्रक्रिया सुरू आहे. खडकवासला धरणाच्या सांडव्यावरून आतापर्यंत १९.०५ टीएमसी पाणी सोडण्यात आले आहे. त्यामुळे पावसाळ्यात भरून वाहणाऱ्या धरणांमधील पाणी आता नियंत्रित वापराच्या टप्प्यात आले आहे. विशेषतः खडकवासला धरणातील साठा निम्म्यापेक्षा कमी झाल्याने पुढील काळातील पाणीवापराचे नियोजन अधिक महत्त्वाचे ठरणार आहे.
.png "Videos"){kind=small}
