मुरुड समुद्रामध्ये डॉल्फिन पाहायला जातानाच दुर्घटना; बोट उलटून अकरा पर्यटक बुडाले, पण…

एक नौका क्षमतेपेक्षा जास्त लोकांना घेऊन जात होती. त्यावेळी ही बोट अचानक समुद्रात उलटली. त्यानंतर स्थानिकांनी धाव घेत मदतकार्य केले आणि बुडणाऱ्या पर्यटकांना वाचवले.

दापोली : तालुक्यातील मुरुड समुद्रामध्ये डॉल्फिन पाहायला जाणाऱ्या पर्यटकांची बोट उलटून मोठी दुर्घटना घडली. यामध्ये चालकासह 11 जण बुडाले होते. मात्र, याबाबतची माहिती स्थानिकांना मिळताच बचावकार्य युद्धपातळीवर सुरु करण्यात आले. या प्रयत्नानंतर सर्वांना वाचविण्यात यश आले असून, यावेळी जीवितहानी झाली नाही. परंतु, एका पर्यटकाची प्रकृती चिंताजनक झाली असल्याचे समजते.

मुरूड समुद्रकिनारी अनधिकृतरित्या वॉटर स्पोर्टस व्यवसाय करणारी एक नौका क्षमतेपेक्षा जास्त लोकांना घेऊन जात होती. त्यावेळी ही बोट अचानक समुद्रात उलटली. त्यानंतर स्थानिकांनी धाव घेत मदतकार्य केले आणि बुडणाऱ्या पर्यटकांना वाचवले. सदर बोटीत एकूण 9 प्रवासी, 1 चालक व 1 सहकारी असे 11 जण या नौकेमध्ये होते. जास्तीचे प्रवासी घेतल्याने हा प्रकार घडला असल्याची चर्चा या परिसरात होत आहे.

दरम्यान, वातावरण बऱ्यापैकी गढूळ होते. जोराचा वारा सुटला होता. भरती असल्याचे दिसून आले. साधारण कंबरभर पाण्यात गेल्यावर मोठ्या लाटेचा हिसका आला आणि फायबरची ही बोट जागेवर बुडाली.

एकाची प्रकृती चिंताजनक; उपचारासाठी मुंबईमध्ये हलविले

सर्व प्रवाशांनी लाईफजॅकेट घातलेले होते, तरीही बोट पलटी होताक्षणी सगळे प्रवासी पाण्यात पडले व बोटीतच अडकले गेले. समोर किनाऱ्यावर गावकरी आणि इतर स्पोर्टस गेमची माणसे असल्याने त्यांनी ताबडतोब जागेवर आपापल्या बोटी नेऊन माणसांना आपल्या बोटीत घेऊन सुरक्षित किनाऱ्यावर आणले. त्यापैकी एकाची प्रकृती मात्र अस्वस्थ असल्याची माहिती मिळत असून, त्याला मुंबई येथे हलविण्यात आले आहे. तर अन्य एका पर्यटकाला देखील दुखापत झाली असल्याचे समजते.