गौण खनिज महसूल वसुलीला ‘ब्रेक’; 8 महिन्यांत 89 कोटींचे उद्दिष्ट गाठण्याचे विभागासमोर आव्हान

मागील वर्षी गौण खनिज विभागाला १३० कोटी रुपयांचे महसूल संकलनाचे उद्दिष्ट देण्यात आले होते. मात्र, प्रत्यक्षात १०१ कोटी ६४ लाख रुपयांचा महसूल जमा झाला आहे. त्यामुळे उद्दिष्टापेक्षा २८ कोटी ३६ लाख रुपयांची तूट निर्माण झाली होती.

अकोला : अकोला जिल्ह्यात गौण खनिज विभागामार्फत होणाऱ्या महसूल वसुलीची गती मंदावली असून, जिल्हा प्रशासनासमोर उर्वरित आठ महिन्यांत ८९ कोटी ४२ लाख रुपयांचा महसूल जमा करण्याचे मोठे आव्हान उभे ठाकले आहे. मागील आर्थिक वर्षातही खाणकाम विभागाला निर्धारित उद्दिष्ट पूर्ण करता आले नव्हते.

मागील वर्षी गौण खनिज विभागाला १३० कोटी रुपयांचे महसूल संकलनाचे उद्दिष्ट देण्यात आले होते. मात्र, प्रत्यक्षात १०१ कोटी ६४ लाख रुपयांचा महसूल जमा झाला आहे. त्यामुळे उद्दिष्टापेक्षा २८ कोटी ३६ लाख रुपयांची तूट निर्माण झाली होती. ही बाब लक्षात घेऊन राज्य शासनाच्या महसूल व वनविभागाने चालू आर्थिक वर्षासाठी अकोला जिल्ह्याचे महसूल उद्दिष्ट कमी करून ११० कोटी रुपये निश्चित केले आहे. मात्र, तरीही वसुलीच्या गतीत अपेक्षित वाढ झालेली नाही.

ST Employees Salary : एसटी कर्मचाऱ्यांचा पगार पुन्हा लांबणीवर; ‘कर्मचाऱ्यांचे संसार वेठीस धरू नका’, ७ तारखेचा पगार आता १० ऑगस्टला?

आर्थिक वर्षाच्या पहिल्या ४ महिन्यांत केवळ २० कोटी ५८ लाख रुपये म्हणजेच एकूण उद्दिष्टाच्या १८.७२ टक्के महसूल जमा झाला आहे. आता उर्वरित आठ महिन्यांत ८९ कोटी ४२ लाख रुपयांची वसुली करण्यासाठी प्रशासनाला विशेष प्रयत्न करावे लागणार आहेत. रॉयल्टी तसेच मागील थकबाकी वसुलीत अकोला तालुक्याने आघाडी घेतली असून, आतापर्यंत ७ कोटी ३८ लाख रुपयांचा महसूल जमा केला आहे. ही कामगिरी अकोला जिल्ह्यात सर्वाधिक असल्याची माहिती प्रशासनाने अधिकृतपणे जाहीर केली आहे.

अवैध उत्खननावरील कारवाईवर भर

गौण खनिज महसूल वाढविण्यासाठी जिल्हा प्रशासनाकडून रेतीघाट व खडी खाणींचे लिलाव, तसेच अवैध गौण खनिज उत्खनन आणि वाहतुकीविरोधात कारवाई केली जाते. नवीन आर्थिक वर्षात रेतीघाटांच्या लिलावप्रक्रियेला वेग दिला जाणार असून, पावसाळ्यानंतर अवैध उत्खनन करणाऱ्यांविरोधातील कारवाई अधिक तीव्र करण्यात येणार आहे.

अकोल्याच्या मूर्तिजापूर तालुक्यात पावसाने फिरवली पाठ; उमा प्रकल्पामध्ये केवळ 4 टक्के जलसाठा