धावत्या बसमध्ये चालकालाच आला हृदयविकाराचा झटका; वाहकाने समयसूचकता दाखवली अन् 25 प्रवाशांचे वाचले प्राण
वाहकाने दाखवलेल्या समयसूचकतेमुळे चालकासह बसमधील 25 प्रवाशांचे प्राण वाचले. सध्या चालकाची प्रकृती चिंताजनक असून, त्यांच्यावर सुरू आहेत. नागपूर आगाराची (एमएच ०६/बीडब्ल्यू ०९०३) बस शुक्रवारी नागपूरहून धुळ्याकडे २५ प्रवाशांना घेऊन रवाना झाली होती. ही बस दुपारी अकोल्यात पोहोचल्यानंतर चालक बदलण्यात आला. त्यानंतर राजेंद्र लासूरकर यांनी पुढील प्रवासाची जबाबदारी स्वीकारली. बस बाळापूर तालुक्यातील व्याळा गावाजवळ पोहोचण्यापूर्वीच चालकाला छातीत दुखू लागले. अचानक प्रकृती खालावल्याने त्यांनी वाहकाला याबाबत माहिती दिली.
चालकाची प्रकृती बिघडत असल्याचे लक्षात येताच वाहक प्यारेलाल चव्हाण यांनी क्षणाचाही विलंब न करता चालकाला बसमधील मागील आसनावर बसवले. यावेळी प्रवाशांनीही मदत केली. त्यानंतर चव्हाण यांनी स्वतः बसचे स्टेअरिंग हाती घेतले आणि प्रवाशांच्या मदतीने बस थेट शासकीय सर्वोपचार रुग्णालयात नेली. तेथे चालकाला तातडीने उपचारासाठी दाखल करण्यात आले. वाहकाने दाखवलेल्या प्रसंगावधानामुळे मोठा अनर्थ टळला आणि २५ प्रवाशांचे प्राण वाचले.
चालकाकडून आरोप
चालक राजेंद्र लासूरकर यांचा गुरुवारी अपघात झाला होता. त्यामुळे त्यांची प्रकृती ठीक नव्हती. याच कारणास्तव त्यांनी आगारप्रमुखांकडे सुटीसाठी अर्ज अर्ज केला होता. मात्र, त्यांची सुटी नाकारून त्यांना कर्तव्यावर पाठविण्यात आल्याचा आरोप चालकाने केला आहे. प्रकृती ठीक नसतानाही आगारप्रमुखांनी त्यांना ड्युटीवर पाठविल्याने २५ प्रवाशांचा जीव धोक्यात आल्याचा आरोप चालकासह काही प्रवाशांनी केला आहे.
१. बस चालकाला काय झाले?
नागपूरहून धुळ्याकडे जाणारी एसटी बस चालवत असताना चालक राजेंद्र लासूरकर यांना अचानक छातीत दुखू लागले आणि हृदयविकाराचा त्रास सुरू झाला.
२. बसमध्ये किती प्रवासी होते?
बस मध्ये एकूण २५ प्रवासी होते.
३. चालकाची प्रकृती बिघडल्यानंतर काय झाले?
चालकाने वाहकाला प्रकृती बिघडल्याची माहिती दिली. त्यानंतर वाहकाने प्रसंगावधान राखून चालकाला बसमधील मागील आसनावर बसवले.
.png "Videos"){kind=small}
