अवयवदानासाठी अमरावती प्रादेशिक 'हब'! अवयव प्रत्यारोपणाला मिळणार नवे बळ, 'हब अँड स्पोक' मॉडेलमध्ये समावेश
राज्यात अवयवदान व प्रत्यारोपण चळवळीला गती देण्यासाठी ‘हब अँड स्पोक’ मॉडेल राबविण्याचा निर्णय घेण्यात आला असून त्यात अमरावतीचा प्रादेशिक हब म्हणून समावेश करण्यात आला आहे. या निर्णयामुळे विदर्भातील रुग्णांना अवयव प्रत्यारोपणासाठी मोठ्या शहरांकडे धाव घेण्याची गरज कमी होणार असून, स्थानिक आरोग्यसेवेला मोठी बळकटी मिळणार आहे.(फोटो सौजन्य – istock)
राज्यात अवयवदान व अवयव प्रत्यारोपण चळवळ अधिक व्यापक करण्यासाठी ‘हब अँड स्पोक मॉडेल’ राबविण्याचा निर्णय घेण्यात आला असून, त्यात अमरावतीचा समावेश करण्यात आला. त्यामुळे येथील आरोग्यसेवेला मोठी बळकटी मिळणार आहे. मंत्रालयात आरोग्यमंत्री प्रकाश आबिटकर यांच्या उपस्थितीमध्ये ७ एप्रिल झालेल्या उच्चस्तरीय बैठकीत याबाबत महत्त्वपूर्ण दिशानिर्देश देण्यात आले. नव्या मॉडेलनुसार राज्यातील नाशिक, पुणे, ठाणे, मीरा-भाईंदर आणि मुंबई ( वाडिया) आणि अमरावती येथे प्रादेशिक ‘हब’ उभारण्यात येणार आहे. त्यांना संलग्न ‘स्पोक’ रुग्णालयांच्या माध्यमातून सुलभ आणि जलद होणार आहे. त्यामुळे विदर्भातील रुग्णांना मोठ्या शहरांकडे धाव घेण्याची गरज कमी होण्याची शक्यता आहे. अमरावतीतील संदर्भ सेवा रुग्णालयाने या क्षेत्रातील आपल्या कार्याचे सादरीकरण बैठकीत केले.
विशेषतः अवयवदानासाठी आवश्यक असलेली प्रक्रिया, समुपदेशन यंत्रणा आणि तांत्रिक सुविधा याबाबत माहिती देण्यात आली. या पार्श्वभूमीवर, स्थानिक स्तरावर अवयवदान प्रक्रियेला अधिक गती देण्यासाठी स्वतंत्र समुपदेशन विभाग स्थापन करण्याचे निर्देश दिले आहेत. राज्यातील अवयव प्रत्यारोपणासाठी प्रतीक्षेत असलेल्या रुग्णांची संख्या कमी करण्यासाठी ब्रेन-डेड रुग्णांच्या नातेवाइकांचे प्रभावी समुपदेशन करणे गरजेचे आहे. यासोबतच, तज्ञ डॉक्टरांची नियुक्ती व प्रशिक्षण, नियमित कार्यशाळा, जनजागृती मेळावे आणि वैद्यकीय अधिकाऱ्यांसाठी प्रशिक्षण सत्रांचे आयोजन करण्याच्या सूचना देण्यात आल्या आहेत. दर २ महिन्यांनी ब्रेन डेड प्रकरणांचा आढावा घेऊन केलेल्या कामगिरीचे मूल्यांकनावरही भर आहे.
विभागीय संदर्भ सेवा रुग्णालय (सुपर स्पेशालिटी हॉस्पिटल) येथे पहिली किडनी प्रत्यारोपण शस्त्रक्रिया १ एप्रिल २०१८ मध्ये झाली होती. आतापर्यंत येथे तब्बल ७० किडनी प्रत्यारोपण शस्त्रक्रिया यशस्वी करण्यात आल्या आहेत. अवयवदान ही केवळ वैद्यकीय प्रक्रिया नसून एका कुटुंबाकडून दुसऱ्या कुटुंबाला मिळणारे नवजीवन आहे. अमरावतीत या चळवळीला अधिक लोकाभिमुख करून दात्यांची संख्या वाढविणे, हीच प्रशासनाची प्राथमिकता असल्याचे स्पष्ट करण्यात आले. नव्या धोरणामुळे अमरावती जिल्ह्यातील रुग्णांना वेळेत उपचार मिळून अनेकांचे प्राण वाचण्यास मदत होणार आहे. विभागीय संदर्भ सेवा रुग्णालय येथे अद्यावत अवयवदान प्रत्यारोपण ओटी देखील तयार केली. त्यामुळे यांचा उपयोग जिल्ह्याला होईल.
.png "Videos"){kind=small}
