राज्यात 1 लाख 427 मतदान केंद्रांची उभारणी ! आदिवासी, दुर्गम भागावर विशेष लक्ष

महाराष्ट्र राज्यामध्ये 20 नोव्हेंबरला मतदान होणार असून राज्यात तब्बल 1 लाख 427 मतदान केंद्रांची उभारणी केली गेली असून आदिवासी आणि दुर्गम भागामध्ये विशेष लक्ष दिले गेले आहे.

फोटो सौजन्य- iStock

Follow Us:

Follow Us:

महाराष्ट्र विधानसभा 2024 निवडणुकीकरिता राज्यभरात 1 लाख 427 मतदान केंद्र स्थापन करण्यात येणार आहे. मतदारांना मतदान करणे सोयीचे ठरावे याकरिता राज्याच्या कानाकोपऱ्यात मतदान केंद्रे उभारली जाणार आहेत. राज्यात सर्वाधिक मतदार असलेल्या पुणे जिल्ह्यात सर्वाधिक 8 हजार 462 मतदान केंद्र आहेत. त्यानंतर मुंबई उपनगरमध्ये 7 हजार 579, ठाणे – 6 हजार 955, नाशिक – 4 हजार 922 तर त्या खालोखाल नागपूर येथे 4 हजार 631 मतदान केंद्र आहेत.

शहरी भागातील मतदारांची अनास्था विचारात  घेऊन निवडणूक आयोगातर्फे अनेक ठिकाणी गृहनिर्माण संकुलामध्ये मतदान केंद्र उभारली आहेत. त्याचप्रमाणात ग्रामीण भाग आणि आदिवासी भागामध्येही मतदानासाठी जवळचे केंद्र असावे याकरिताही मतदानाची संख्या वाढवली आहे.

राज्यात मुख्य मतदान केंद्र ही 1 लाख 186 असून त्यापैकी शहरी भागात 42 हजार 604 तर ग्रामीण भागात 57 हजार 582 इतकी मतदान केंद्र संख्या राहणार आहे. सहायक मतदान केंद्रांची संख्या 241 इतकी आहेत. मागील काही विधानसभेच्या निवडणुकांच्या तुलनेत यावेळी मतदान केंद्रांची संख्या मोठ्या प्रमाणावर वाढण्यात आली आहे.  यामुळे मतदारांची सोय होणार आहे. विशेषत: दिव्यांग मतदारांना मतदान केंद्रात पोहोचता यावे यासाठी बऱ्याच ठिकाणी आवश्यक रॅम्पची देखील व्यवस्था करण्यात आलेली आहे.

आदिवासी, दुर्गम भागावर विशेष लक्ष

यंदाच्या निवडणुकीत आदिवासी मतदारसंघ आणि दुर्गम भागांतील मतदारांसाठी विशेष सुविधा देण्यावर भर दिला आहे. गडचिरोली, गोंदिया, नंदुरबार, धुळे, आणि अमरावती जिल्ह्यात जेथे आदिवासी आणि दुर्गम भाग आहेत तेथे मतदान केंद्रांची संख्या मोठ्या प्रमाणावर वाढवण्यात आली आहे.निवडणूक आयोगाने मतदार सुविधांमध्ये सुधारणा केली आहे, जसे की मतदार सहाय्य केंद्रे,  मतदार हेल्पलाईन ,  सूचना फलक यांचा समावेश आहे. तरुण मतदार, महिला मतदारांना लक्षात ठेवून हे उपाय योजण्यात आले आहेत.

शहरी गृहनिर्माण संस्थांमध्ये 1 हजारहून जास्त मतदान केंद्रे

शहरी भागांमध्ये जसे की मुंबई, पुणे, ठाणे सारख्या शहरामध्ये अतिउंच इमारती आणि सहकारी गृहनिर्माण संस्थामध्ये 1 हजार 181 मतदान केंद्र उभारण्यात आलेली आहे. तसेच झोपडपट्टी परिसरातही  210 मतदान केंद्रांची उभारणी करण्यात आली आहे.

नवीन तंत्रज्ञानाच्या वापरामुळे मतदान प्रक्रियेतील पारदर्शकता

निवडणूक आयोगाने मतदान प्रक्रियेला अधिक सुलभ आणि पारदर्शक बनवण्यासाठी नवीन तंत्रज्ञान वापरण्याचा निर्णय घेतला आहे. यामध्ये मतदार आपले मतदान केंद्र शोधण्यासाठी ऑनलाइन पोर्टल आणि मोबाइल अ‍ॅप्स वापरू शकतात. मतदार जागरूकता मोहिमेंतर्गत शाळा आणि महाविद्यालयांमध्ये मतदारांसाठी विशेष कार्यक्रम आयोजित केले जातील.

राज्यातील एकूण मतदानकेंद्राची जिल्हानिहाय विभागणी

जिल्हा आणि मतदान केंद्रे 

1. पुणे – 8462
2. मुंबई उपनगर – 7579
3. ठाणे – 6955
4. नाशिक – 4922
5. नागपूर – 4631
6. अहमदनगर – 3765
7. सोलापूर – 3738
8. जळगाव – 3683
9. कोल्हापूर – 3452
10. औरंगाबाद – 3273
11. सातारा – 3165
12. नांदेड – 3088
13. रायगड – 2820
14. अमरावती – 2708
15. यवतमाळ – 2578
16. मुंबई शहर – 2538
17. सांगली – 2482
18. बीड – 2416
19. बुलढाणा – 2288
20. पालघर – 2278
21. लातूर – 2143
22. चंद्रपूर – 2077
23. अकोला – 1741
24. रत्नागिरी – 1747
25. जालना – 1755
26. धुळे – 1753
27. परभणी – 1623
28. उस्मानाबाद – 1523
29. नंदूरबार – 1434
30. वर्धा – 1342
31. गोंदिया – 1285
32. भंडारा – 1167
33. वाशिम – 1100
34. हिंगोली – 1023
35. गडचिरोली – 972
36. सिंधुदुर्ग – 921

राज्यातील एकूण मतदान केंद्रे – 1,00,427 

राज्यात 20 नोव्हेंबरला एकाच टप्प्यात मतदान पार पडणार आहे.

Web Title: Construction of 1 lakh 427 polling booths in maharashtra with special focus on tribal remote areas

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com