FDA ची पुन्हा धडक कारवाई; चक्क लक्झरी बस थांबवून मिठाईसाठी नेण्यात येणारा 16 लाखांचा खवा जप्त

FDA : एफडीएने धुळ्यात एका लक्झरी बसमधून 16 लाखांचा खवा जप्त केला आहे. विभागाला हा खवा भेसळयुक्त असल्याचा संशय असून त्यांनी त्याचे नमुने निरिक्षणासाठी पाठवले आहे.

• एफडीएची धडक कारवाई सुरुच
• लक्झरी बस थांबवून लाखोंचा खवा जप्त
• मावा कोल्ड स्टोरेजमध्ये सुरक्षित

 

मागील अनेक दिवसांपासून राज्यातील सर्वात चर्चेचा विषय म्हणजे धडाडीचे सनदी अधिकारी तुकाराम मुंढे यांच्या विभागाकडून राज्यभरात करण्यात येणारी कारवाई. अन्न व औषध प्रशासन विभागाच्या (FDA) आयुक्तपदी विराजमान झाल्यापासून त्यांच्या विभागाने कारवाईचा सपाटाच लावला आहे. आता धुळ्यातून एक बातमी समोर येत असून एका लक्झरी बसमधून वाहतूक करण्यात येत असलेला खवा जप्त करण्यात आला असून त्या खव्याची किंमत चक्क 16 लाख 52 हजार रुपये एवढी आहे.

मुंढे यांच्या विभागाने भेसळयुक्त पदार्थ, हॉटेलमधील अस्वच्छता आणि अन्न व औषध विषयाच्या संदर्भातील सर्वच बाबतीत प्रामुख्याने लक्ष घातले आहे. विविध सणांच्या पार्श्वभूमीवर त्यांनी ही कारवाई वाढवली आहे. आता या विभागाने धुळे तालुका पोलिसांच्या सहकार्याने कारवाई करत लक्झरी बसमधून वाहतूक करण्यात येत असलेला 5,385 रिवो मावा (खवा) जप्त केला आहे. याची किंमत चक्क 16 लाख 52 हजार 100 रुपये आहे. भेसळीच्या संशयावरून हा साठा जप्त करण्यात आला असून कोल्ड स्टोरेजमध्ये सुरक्षित ठेवण्यात आला आहे.

अकोल्याकडे जात होती बस

प्राप्त माहितीनुसार, अहमदाबादहून अकोल्याकडे जाणाऱ्या अशोक लेलँड वेलकम लक्झरी बस क्रमांक MP-44-ZF-7214 यातून मिठाई बनवण्यासाठी लागणाऱ्या माव्याची वाहतूक होत असल्याची गुप्त माहिती एफडीएला मिळाली होती. त्यानुसार पोलिसांच्या सहाय्याने एफडीएने मोराणे हद्दीत, साक्री रोडवरील हॉटेल बालाजीजवळ सदर बस थांबवून तपासणी केली.
तपासणीदरम्यान बसमध्ये विविध कंपन्यांचा मोठ्या प्रमाणात मावा आढळून आला. त्यानंतर पुढील कारवाईसाठी हे वाहन टोल नाक्याजवळील दिसान कोल्ड स्टोरेज येथे आणण्यात आले.

Pratap Sarnaik: रस्ते अपघात रोखण्यासाठी आधुनिक तंत्रज्ञानाचा वापर करा; परिवहन मंत्री प्रताप सरनाईकांचे निर्देश

विविध उत्पादनांचा समावेश

जप्त करण्यात आलेल्या प्रीमियम हलवा (ब्रजनिधी), प्रीमियम हलवा (गणेशा), इंडियन स्वीट हलवा (नंदि), स्वीट हलवा (खोडलं), हलवा (श्री ग्वाल), हलवा (श्री गोकुळ), स्वीट हलवा (गोपाल), ट्रॅडिशनल स्वीट (श्री ग्वाल), ट्रॅडिशनल स्वीट (श्री गोकुळ), इंडियन स्वीट (श्री गोपाल), कृष्णा हलवा, इंडियन डेझल्ट (नंदि) आणि प्रीमियम डेझल्ट (मीरा) या उत्पादनांचा समावेश आहे.

दरम्यान, विभागातील अधिकाऱ्यांकडून या धाडीनंतर सर्व नमुने प्रयोगशाळेत तपासणीसाठी पाठविण्यात आले असून अहवाल प्राप्त झाल्यानंतर पुढील कायदेशीर कारवाई करण्यात येणार आहे, अशी माहिती प्रशासनाकडून देण्यात आली.

Wardha News : ओबीसी विद्यार्थ्यांचे वसतिगृह अजूनही भाड्याच्या घरात; हक्काच्या इमारतीचा प्रस्ताव रखडला