चार भिंतीच्या पलिकडील शाळा…! दप्तराविना विद्यार्थ्यांनी घेतला धडा, नांदेडमध्ये स्त्युत्य उपक्रम

र्यावरणाशी सन्निकटता साधत आणि त्या माध्यमातून ज्ञान विज्ञानाचा अभ्यास करीत जवळा दे. येथील जिल्हा परिषदेच्या प्राथमिक शाळेतील चिमुकल्यांनी वनभोजन या कार्यक्रमातून निसर्ग शाळेचा मनमुराद आनंद घेतला.

नांदेड : ‘बिन भिंतीची उघडी शाळा लाखो इथले गुरु झाडे, वेली, पशू-पाखरे यांच्या गोष्टी करु’ या गदिमांच्या निसर्ग कवितेप्रमाणे विविध शालेय उपक्रमासोबतच वनभोजन या सहशालेय उपक्रमाचे शाळांकडून आयोजन केले जाते. चार भिंतीच्या आतील बंदिस्त अभ्यासक्रम एकदिवस टाळून निसर्गाच्या सानिध्यात विविध प्रकारची पिके, झाडे, पशु, पक्षी, वेली यांच्याशी गुजगोष्टी करत अनेक अनुभवांची समृद्धी हस्तगत करुन घेण्यासाठी निसर्ग शाळा हा उपक्रम घेण्यात येतो. या अंतर्गत दफ्तरविना शाळेचे आयोजन करुन विविध अध्ययन अनुभव देता येतात. पर्यावरणाशी सन्निकटता साधत आणि त्या माध्यमातून ज्ञान विज्ञानाचा अभ्यास करीत जवळा दे. येथील जिल्हा परिषदेच्या प्राथमिक शाळेतील चिमुकल्यांनी वनभोजन या कार्यक्रमातून निसर्ग शाळेचा मनमुराद आनंद घेतला.

यावेळी मुख्याध्यापक गंगाधर ढवळे, विषय शिक्षक उमाकांत बेंबडे, संगिता बडवणे, सहशिक्षक संतोष घटकार, केंद्र समन्वयक एस. आर. गायकवाड, प्रमोद देशपांडे, उमाकांत महाजन, वसंत शिखरे, अशोक हाटकर, हरिदास पांचाळ, पांडुरंग गच्चे आदिंची उपस्थिती होती.

“जेव्हा अत्याचार होणार तेव्हा जिहाद होणार”; महमूद मदानी यांच्या विधानाने उडाला राजकीय गोंधळ

अनेक विद्यार्थ्यांचा सहभाग

शेतीविषयक हंगाम निहाय नियोजन, भविष्यातील शेती आणि इंटरनेट शेतीची माहिती या विषयावर विषय शिक्षक उमाकांत बेबडे, संगिता बडवणे आणि मुख्याध्यापक गंगाधर ढवळे यांच्या मार्गदर्शनाखाली विद्यार्थ्यांनी निरीक्षणात्मक अभ्यास केला. निसर्ग शाळेत एकूण ५५ विद्यार्थी-विद्यार्थीनींनी सहभाग नोंदविला. शिक्षकांनी शेती करण्याच्या जुन्या नव्या पद्धती व अवजारे यांच्याविषयी माहिती दिली. बैठे व मैदानी खेळ, मनोरंजक खेळ घेतल्यानंतर हिरव्यागार वनराईच्या संगतीत खिचडी भजे, पापड, जिलेबी यांसह रानभाज्यांचा पुलाव व विविध प्रकारची फळे या विशेष माध्यान्ह भोजनावर ताव मारला त्यानंतर सर्व निरीक्षणे नोंदविण्यात आली.

पाचगणीत घराला भीषण आग; अनेक संसारोपयोगी वस्तू आगीत जळून खाक, 4 लाखांचे नुकसान

निरीक्षणासह रानमेव्याचा आस्वाद
सौर ऊर्जा पॅनल आणि त्याची कार्यपद्धती औषधीयुक्त वनस्पती, लघु शेती प्रकल्प, पाण्याचे विविध स्त्रोत, रब्बी हंगामातील जोंधळा, मक्का, भुईमुग, गहू, गवत, हरभरा, हळद आदी पिकांची शेते, विविध फळांची झाडे, मातीचे प्रकार, ठिबक सिंचन, तुषार सिंचन तसेच कालव्याद्वारे पाणी पुरवठा, पाटाचे पाणी, गांडूळ खत प्रकल्प, रानटी झुडपे, वृक्ष-वेली, विविध पक्षी आणि त्यांचे आवाज, घरटी, विविध रानभाज्या आदी बाबींचे निरीक्षण करण्यात आले. तसेच शेंगा, बोरं, ऊसाची टिपरे, पाडाचे पेरु, मधमाशांचे पोळे या रानमेव्यांचा आस्वाद घेतला.