अपघाती मृत्यू रोखण्यात गडचिरोली ‘टॉप’ला; नागपूरचीही उल्लेखनीय कामगिरी

जिल्ह्यात २०२५ मध्ये १२९ प्राणांतिक अपघातांची नोंद झाली होती. मात्र, २०२६ मध्ये ही संख्या ९६ वर आणण्यात प्रशासनाला यश आले आहे. नागपूर जिल्ह्यानेही अपघाती मृत्यू रोखण्यात उल्लेखनीय कामगिरी केली आहे.

• रस्ते अपघाती मृत्यू कमी करण्यात गडचिरोली राज्यात अव्वल
• नागपूर जिल्ह्याला राज्यात दुसरे स्थान
• गडचिरोलीत अपघाती मृत्यूंच्या प्रमाणात २६ टक्के घट

गडचिरोली : रस्त्यांवरील वाढत्या अपघातांना आळा घालण्यात विदर्भातील गडचिरोली आणि नागपूर जिल्ह्यांनी उल्लेखनीय कामगिरी नोंदवली आहे. राज्यभरात रस्ते अपघातांतील मृत्यूंचे प्रमाण कमी करण्यात आदिवासीबहुल गडचिरोली जिल्ह्याने प्रथम क्रमांक पटकावला आहे, तर नागपूर जिल्ह्याने राज्यात दुसरे स्थान मिळवले आहे. गडचिरोली जिल्ह्यात अपघाती मृत्यूंच्या प्रमाणात तब्बल २६ टक्क्यांची घट नोंदवण्यात आली असून, या कामगिरीमुळे जिल्ह्याने राज्यात अव्वल स्थान मिळवले आहे.

जिल्ह्यात २०२५ मध्ये १२९ प्राणांतिक अपघातांची नोंद झाली होती. मात्र, २०२६ मध्ये ही संख्या ९६ वर आणण्यात प्रशासनाला यश आले आहे. नागपूर जिल्ह्यानेही अपघाती मृत्यू रोखण्यात उल्लेखनीय कामगिरी केली आहे. जिल्ह्यात प्राणांतिक अपघातांची संख्या गेल्या वर्षीच्या ८१३ वरून यंदा ७०८ वर आली आहे. तसेच, गेल्या वर्षी ३८५ अपघाती मृत्यूंची नोंद झाली होती. यंदा हा आकडा २९५ वर आला असून, मृत्यूंच्या प्रमाणात २३ टक्क्यांची घट झाली आहे. याशिवाय, नागपूर जिल्ह्यातील एकूण रस्ते अपघातांच्या संख्येतही १३ टक्क्यांची घट नोंदविण्यात आली आहे. नागपूर ग्रामीणनेदेखील अपघाती मृत्यूंचे प्रमाण कमी करणाऱ्या राज्यातील पहिल्या पाच जिल्ह्यांमध्ये स्थान मिळविले आहे.

दरम्यान, राज्यातील धाराशिव जिल्ह्यात अपघाती मृत्यूंच्या प्रमाणात २१ टक्क्यांची घट नोंदविण्यात आली असून, जिल्ह्याने तिसरे स्थान पटकाविले आहे. धाराशिवमधील अपघाती मृत्यूंची संख्या ३३५ वरून २६४ वर आली आहे. तर नाशिक शहर आणि अकोला येथेही अपघाती मृत्यूंच्या प्रमाणात प्रत्येकी २० टक्क्यांची घट झाली आहे.

26 टक्क्यांनी मृत्यूच्या प्रमाणात घट

नागपूर जिल्ह्यात गंभीर जखमी होणाऱ्यांच्या संख्येतही काही प्रमाणात घट झाली आहे. गतवर्षी ८५५ जण गंभीर जखमी झाले होते. यंदा ही संख्या ८४४ वर आली आहे. जानेवारी ते ऑक्टोबर २०२६ या कालावधीत संपूर्ण महाराष्ट्रात रस्ते अपघाती मृत्यूंच्या संख्येत चार टक्क्यांची घट नोंदविण्यात आली आहे. राज्यातील अपघाती मृत्यूंचा आकडा १३ हजार १७५ वरून १२ हजार ६४५ वर आला आहे. रस्ता सुरक्षा उपाययोजना आणि जनजागृती मोहिमांमुळे ही सकारात्मक सुधारणा झाल्याचे चित्र आहे.