Kolhapur Lok Sabha 2024 : लोकसभेची रणधुमाळी सुरू झाली आणि आरोप-प्रत्यारोपांच्या फैरी झडू लागल्या आहेत. लोकसभेचा प्रचाराचा धुरळा उडू लागला आहे. यामध्येच महायुतीतील एका नेत्याने शरद पवारांवर बोचरी टीका करताना, शरद पवारांसारख्या माणसाला देवेंद्र फडणवीस यांची जात काढावी लागते असे म्हटले आहे. कारण शरद पवारांसारख्या माणसाला एकच व्यक्ती पुरुन उरला आहे तो म्हणजे देवेंद्र फडणवीस. महायुतीतल्या नेत्यानेच हे वक्तव्य केलं आहे. कोल्हापूरमध्ये माध्यमांशी बोलताना सदाभाऊ खोत यांनी हे वक्तव्य केले आहे.
लोकसभा निवडणुकीच्या प्रचारसभांचा आणि रॅलीजचा धडाकाही सुरु झाला आहे. महायुती विरुद्ध महाविकास आघाडी अशी लढत महाराष्ट्रात आहे. महायुतीने ४५ पेक्षा जास्त जागा निवडून येतील, असा विश्वास व्यक्त केला आहे. अशात आरोप-प्रत्यारोपांच्या फैरी झाडणं हे काही नवीन नाही. रयत क्रांती पक्षाचे प्रमुख सदाभाऊ खोत यांनी शरद पवार आणि देवेंद्र फडणवीस यांची तुलना करीत एकटे फडणवीस पवारांना पुरून उरले आहेत, असे म्हटले आहे.
काय म्हणाले सदाभाऊ खोत?
“७० वर्षांपासून महाराष्ट्रात मूठभर सरदारांचं राज्य होते. या सरदारांना पायाखाली कचाकचा तुडवण्याचे काम देवेंद्र फडणवीस यांनी केले. त्यामुळेच शरद पवारांसारख्या नेत्याला त्यांची जात काढावी लागते. पण, पवार तुमची जात वेगळी असती, तुमचं आडनाव फडणवीस असतं तर महाराष्ट्रात तुम्हाला कुणी हुंगलंही नसतं. मात्र, देवेंद्र फडणवीस हा एकच बाप असा आहे जो शरद पवारांना पुरुन उरला. त्यामुळे या वयातही शरद पवारांना खोटं बोलत रेटून चालावं लागतं आहे.”
पश्चिम महाराष्ट्रात महायुतीला मोठं यश
पश्चिम महाराष्ट्रात महायुतीला मोठे यश संपादन होईल, असं चित्र निर्माण झाले आहे. पश्चिम महाराष्ट्र हा छत्रपती शिवाजी महाराज, शाहू महाराज, डॉ. बाबासाहेब आंबेडकर या महापुरुषांच्या विचाराने मंतरलेला प्रदेश आहे. महापुरुषांचे नाव घेणारी माणसं सध्या वाड्यामध्ये आहेत. आताची लढाई ही वाडा विरुद्ध गावगाडा अशी आहे. या निवडणुकीत महायुतीच्या माध्यमातून हे सगळे वाडे उध्वस्त होणार आहेत. रयतेचा विजय निश्चितपणे होणार आहे, असे सदाभाऊ खोत यांनी सांगितलं.
Web Title: Harsh criticism of leader of grand alliance only one person left to bury a man like sharad pawar is nryb
