गोंदियात मुख्याध्यापक व केंद्र संचालक निलंबित; जिल्हा परिषदेच्या सीईओंची धडक कारवाई

निलंबन कालावधीत मुख्याध्यापक हरिश्चंद्र दराडे यांचे मुख्यालय देवरी तर आनंदराव कोरे यांचे मुख्यालय अर्जुनी मोरगाव येथे निश्चित केले. त्यांना मुख्यालय सोडताना पंचायत समितीचे गटशिक्षणाधिकाऱ्यांची मंजुरी घेणे अनिवार्य आहे.

गोंदिया : दहावी बोर्डाच्या परीक्षेदरम्यान विज्ञान-२ विषयाच्या पेपरला परीक्षा केंद्र क्रमांक २१७७ जिल्हा परिषद हायस्कूल कावराबांध येथील परीक्षा केंद्रावर ३ बोगस विद्यार्थी परीक्षा देताना आढळले. या प्रकरणाची दखल घेत जिल्हा परिषद मुख्य कार्यकारी अधिकारी डॉ. एम. मुरुगानंथम यांनी शाळेचे मुख्याध्यापक हरिश्चंद्र दराडे व परीक्षा केंद्र संचालक व शाळेचे सहाय्यक शिक्षक आनंदराव कोरे यांना शिस्तभंगाच्या कार्यवाहीस पात्र ठरवून आपल्या कर्तव्यात कसूर केल्याप्रकरणी निलंबित करण्याचे आदेश काढले.

निलंबन कालावधीत मुख्याध्यापक हरिश्चंद्र दराडे यांचे मुख्यालय देवरी तर आनंदराव कोरे यांचे मुख्यालय अर्जुनी मोरगाव येथे निश्चित केले आहे. त्यांना मुख्यालय सोडताना पंचायत समितीचे गटशिक्षणाधिकाऱ्यांची मंजुरी घेणे अनिवार्य आहे. निलंबन काळात त्यांना कोणतीही नोकरी, धंदा अथवा व्यापार करता येणार नाही, असे आदेशात नमूद करण्यात आले आहे. जिल्हा परिषद मुख्य कार्यकारी अधिकारी डॉ. एम. मुरुगानंथम यांनी काढलेल्या निलंबन आदेशात जिल्हा परिषद हायस्कूल व कनिष्ठ महाविद्यालय कावराबांध येथे वर्ग दहावी आणि विज्ञान २ या विषयाचा पेपर सुरू असताना या विषयाचा पेपर देण्याकरिता ३ बोगस विद्यार्थी आसन क्र. जे १४८९८९, जे १४९०१३, जे १४८९७१ वर पेपर सोडविताना आढळले. यामुळे जिल्हा परिषद मुख्य कार्यकारी अधिकारी डॉ. एम. मुरुगानंथम यांनी निलंबन आदेश काढले.

सहाय्यक शिक्षक आनंदराव शंकरराव कोरे हे परीक्षा केंद्राचे केंद्रप्रमुख व वर्ग १० वी वर्गाचे वर शिक्षक पदावर कार्यरत होते. तर मुख्याध्यापक हरिश्चंद्र दराडे यांनी ता. लांजी, जि. बालाघाट मध्यप्रदेश राज्यातील विद्यार्थ्यांना शाळेत वर्ग १० वी मध्ये प्रवेश देऊन त्यांच्या जागी वर्ग १० वीचे वार्षिक परीक्षा १३ मार्च रोजी विज्ञान २ चे पेपर सोडविताना शाळेतील वर्गात ३ बोगस विद्यार्थी तपासणीत आढळून आले होते. त्यामुळे दोघांनीही आपल्या कर्तव्यात कसूर केल्याने शिस्तभंगाच्या कार्यवाहीस पात्र ठरविले. त्यांच्याविरुद्ध जि. प. मुख्य कार्यकारी अधिकारी यांना असलेल्या अधिकाराचा वापर करून सहाय्यक शिक्षक आनंदराव शंकरराव कोरे व दराडे यांना त्वरित निलंबित केले.

Solapur Crime: शेतीच्या पाण्यावरून वाद; जन्मदात्या बापानेच मुलाची लोखंडी गजाने केली हत्या, माढ्यात खळबळ