पालिका रुग्णांना ग्लोबलमध्ये बेड! केईएम रुग्णालयामार्फत पात्र रुग्णांची निवड आणि संदर्भ प्रक्रिया
Health Update: आर्थिकदृष्ट्या गरजू मुंबईकरांना अत्याधुनिक खासगी रुग्णालयात उपचार मिळावेत, यासाठी मुंबई महानगरपालिकेने परळ येथील ग्लोबल हॉस्पिटलमध्ये ३७ खाटा राखीव ठेवण्याचा निर्णय घेतला आहे. रुग्णालयातील एकूण २४५ खाटांपैकी १५ टक्के खाटा पालिकेने नामनिर्देशित केलेल्या पात्र रुग्णांसाठी उपलब्ध करून दिल्या जाणार आहेत. यासंदर्भात महापालिका आणि ग्लोबल हॉस्पिटल यांच्यात महापौर रितू तावडे यांच्या प्रमुख उपस्थितीत सामंजस्य करार करण्यात येणार आहे. या व्यवस्थेमध्ये सर्वसाधारण रुग्णखाटांसह अतिदक्षता विभागातील खाटा, आपत्कालीन उपचार, डायलिसिस आणि आवश्यक अतिविशेषोपचार सुविधांचा समावेश आहे.(फोटो सौजन्य – istock)
केंद्र आणि राज्य शासनाच्या आरोग्य योजनांशी निगडित निर्धारित सवलतीच्या दरांनुसार पात्र रुग्णांना उपचार मिळण्याची संधी उपलब्ध होणार आहे. या योजनेच्या अंमलबजावणीची जबाबदारी केईएम रुग्णालयावर सोपविण्यात येणार आहे. केईएम रुग्णालयाचे अधिष्ठाता पात्र रुग्णांची निवड, त्यांच्या वैद्यकीय गरजांचे परीक्षण आणि ग्लोबल हॉस्पिटलमध्ये उपचारांसाठी संदर्भित करण्याची प्रक्रिया राबवतील. त्यामुळे खासगी रुग्णालयातील राखीव खाटांचा लाभ गरजू रुग्णांपर्यंत पोहोचविण्याचा महापालिकेचा प्रयत्न आहे.
महापौर रितू तावडे यांनी सांगितले की, भूतकाळातील प्रलंबित दावे आणि महापालिकेचे कायदेशीर अधिकार अबाधितसाठी सेव करार करवियरातील ठेवून आहे. सार्वजनिक आणि खासगी आरोग्य व्यवस्था एकमेकांना पूरक ठरू शकतात. या कराराची प्रभावी अमलबजावणी झाल्यास अन्य पात्र खासगी रुग्णालयांमध्येही अशी व्यवस्था विकसित करण्याचा मार्ग मोकळा होऊ शकतो. दरम्यान, राखीव खाटा प्रत्यक्ष उपलब्ध राहणे, उपचारांसाठी रुग्णांची अडवणूक होऊ नये आणि सवलतीच्या दरांमध्ये पारदर्शकता राहावी, यासाठी नियमित देखरेख ठेवण्याची आवश्यकता महापौरांनी व्यक्त केली आहे.






