(फोटो सौजन्य- सोशल मीडिया)
Koffee With Karan 9 Finale: दिग्दर्शक आणि निर्माता करण जोहर सध्या त्याच्या लोकप्रिय ‘कॉफी विथ करण ९’ या शोमुळे चर्चेत आहे. या शोमध्ये बॉलिवूडमधील अनेक सेलिब्रिटी हजेरी लावत त्यांच्या आयुष्यातील मजेशीर किस्से, वैयक्तिक अनुभव आणि अनेक गुपितांचा खुलासा करताना दिसतात. आता या शोच्या आगामी एपिसोडचा प्रोमो प्रदर्शित झाला असून तो सोशल मीडियावर चर्चेचा विषय ठरत आहे. त्यातच शोच्या ग्रँड फिनालेबाबतही एक खास बातमी समोर येत आहे. बॉलिवूडचा किंग शाहरुख खान या फिनालेमध्ये हजेरी लावणार असल्याची चर्चा आहे.
‘व्हरायटी इंडिया’च्या वृत्तानुसार, शाहरुख खान ‘कॉफी विथ करण ९’च्या अंतिम भागात काही काळासाठी दिसणार आहे. सध्या शाहरुख त्याच्या चित्रपटांच्या चित्रीकरणात व्यस्त असल्याने त्याच्याकडे जास्त वेळ उपलब्ध नव्हता. त्यामुळे तो या एपिसोडमध्ये थोड्या वेळासाठी सहभागी होणार असल्याचे सांगितले जात आहे. विशेष म्हणजे, शाहरुखसोबत त्याची मुलगी सुहाना खानदेखील या शोचा भाग असणार असल्याची माहिती समोर आली आहे.
करण जोहरच्या जुळ्या मुलांचंही होणार पदार्पण?
या फिनालेची आणखी एक खास गोष्ट म्हणजे करण जोहरची जुळी मुलं रुही आणि यश यांचं शोमधून पदार्पण होणार असल्याची चर्चा आहे. त्यामुळे या भागात करण आपल्या मुलांसोबत काही खास क्षण शेअर करताना दिसू शकतो. मात्र, या एपिसोडबाबत निर्मात्यांकडून अद्याप अधिकृत घोषणा करण्यात आलेली नाही.
दरम्यान, ‘कॉफी विथ करण ९’च्या अलीकडील भागात करीना कपूर आणि सैफ अली खान पाहुणे म्हणून सहभागी झाले होते. या दोघांनीही शोदरम्यान त्यांच्या वैयक्तिक आयुष्यातील अनेक किस्से सांगितले. त्यांच्या गप्पांचा चाहत्यांनीही आनंद घेतला.
सध्या शाहरुख खान, सुहाना खान आणि करण जोहरची मुलं या शोच्या फिनालेमध्ये दिसणार असल्याच्या चर्चांना उधाण आले आहे. मात्र, अंतिम भागाचा प्रोमो अद्याप प्रदर्शित झालेला नाही. तसेच शाहरुख खान किंवा करण जोहर यांनीही याबाबत कोणतीही अधिकृत माहिती दिलेली नाही.
Adinath Kothare: ‘रामायण’मधील भरत मिलाप सीनआधी नेमकं काय घडलं? आदिनाथने सांगितला पडद्यामागचा किस्सा






