फोटो सौजन्य - Social Media
कर्जत तालुक्यात मोठ्या प्रमाणावर दुबार शेती तसेच भाजीपाला शेती केली जाते. यासाठी शेतकऱ्यांना युरिया खताची मोठ्या प्रमाणात आवश्यकता असते. मागील काही महिन्यांपासून युरिया खताच्या तुटवड्यामुळे शेतकऱ्यांमध्ये हताशा निर्माण झाली होती. मात्र, आता कर्जत खरेदी-विक्री संघात युरिया खताची आवक वाढल्याने शेतकऱ्यांना मोठा दिलासा मिळाला आहे. कर्जत तालुक्यातील राजनाला कालव्यात उन्हाळी भातशेती मोठ्या प्रमाणावर केली जाते. तसेच, वाहत्या पाण्याच्या उपलब्धतेमुळे अनेक शेतकरी भाजीपाला शेती करतात. अशा परिस्थितीत, खत उपलब्ध नसल्याने शेतीच्या उत्पादनावर परिणाम होण्याची शक्यता होती. सामान्यतः कर्जत तालुक्यात उन्हाळ्यात साधारणतः १५० टन युरिया खताची गरज असते. त्याचबरोबर शेतकरी मिश्र खतेही वापरतात, जी मोठ्या प्रमाणात उपलब्ध आहेत. मात्र, गेल्या काही महिन्यांपासून युरिया खताचा तुटवडा जाणवत होता.
फेब्रुवारी महिन्यापर्यंत कर्जत तालुक्याला केवळ ८६ टन युरिया खत उपलब्ध झाले होते, जे आवश्यकतेच्या तुलनेत कमी होते. भात शेतीला खताची गरज भासू लागली असताना केवळ ५० टक्के खत उपलब्ध असल्याने शेतकरी संकटात सापडले होते. यावर तोडगा म्हणून कर्जत खरेदी-विक्री संघाने शासनाकडे खत पुरवठ्याची मागणी केली होती. अखेर १४ मार्च रोजी २५ टन युरिया खताचा साठा कर्जत येथे पोहोचला आहे. खत मिळाल्याची माहिती मिळताच अनेक शेतकरी खरेदीसाठी खरेदी-विक्री संघाकडे येत आहेत. व्यवस्थापक केतन खडे यांनी शेतकऱ्यांना आधार कार्ड सोबत आणण्याचे आवाहन केले आहे, जेणेकरून खत वितरण सुरळीत पार पडेल.
कर्जत खरेदी-विक्री संघाने शेतकऱ्यांसाठी सेंद्रिय खताची उपलब्धता वाढवली असून, शाश्वत शेतीला चालना देण्यासाठी विशेष प्रयत्न सुरू केले आहेत. सेंद्रिय शेतीच्या वाढत्या गरजेची जाण ठेवत, संघाने संभाजीनगर येथून सुमारे १२ टन सेंद्रिय खत मागवले आहे. हे खत वेगवेगळ्या प्रकारांमध्ये उपलब्ध असून, शेतकऱ्यांकडून त्याला उत्स्फूर्त प्रतिसाद मिळत आहे. सध्या न्यूट्री गोल्ड, नीम गोल्ड आणि कॉम्बो किट या प्रकारातील सेंद्रिय खते विक्रीसाठी उपलब्ध आहेत, जी मातीच्या सुपीकतेसाठी आणि पीक उत्पादन वाढीसाठी उपयुक्त ठरत आहेत.
कर्जत तालुक्यात भाजीपाला शेती मोठ्या प्रमाणावर केली जाते, तसेच फळबाग लागवडीसाठी सेंद्रिय खताला अधिक मागणी असते. शेतकऱ्यांनी आपल्या बागायती पिकांसाठी मोठ्या प्रमाणावर सेंद्रिय खताची खरेदी सुरू केली असून, रासायनिक खतांच्या तुलनेत सेंद्रिय खतांच्या फायद्यांविषयी जागरूकता वाढत आहे. सेंद्रिय खतांचा योग्य प्रमाणात वापर केल्यास मातीच्या पोत सुधारण्यात मदत होते आणि उत्पादन अधिक नैसर्गिक आणि चविष्ट मिळते.
युरिया आणि सेंद्रिय खताची वाढलेली उपलब्धता पाहता, शेतकऱ्यांना त्यांच्या शेतीसाठी आवश्यक खते वेळेत आणि योग्य दरात मिळणार आहेत. परिणामी, शेतीत उत्पादनवाढ होऊन बळीराजाचा आत्मविश्वास वाढण्यास मदत होईल. कर्जत खरेदी-विक्री संघाने वेळोवेळी शेतकऱ्यांच्या गरजा ओळखून योग्य ती पावले उचलली आहेत आणि भविष्यातही अशाच प्रकारे खत पुरवठा सुरळीत राहावा यासाठी प्रयत्नशील राहणार असल्याचे व्यवस्थापक केतन खडे यांनी सांगितले.
.png "Videos"){kind=small}
