सातारा : सातारा नगरपालिकेच्या रणांगणात शडू ठोकण्यासाठी काँग्रेस, राष्ट्रवादी आणि शिवसेना या तिन्ही पक्षांची महाविकास आघाडी सज्ज झाली आहे. पालिका निवडणुकीच्या पार्श्वभूमीवर राष्ट्रवादीचे आमदार शशिकांत शिंदे (Shashikant Shinde) यांच्या अध्यक्षतेखाली झालेल्या बैठकीत सातारकरांना तिसरा पर्याय देण्याबाबत विचार मंथन करण्यात आले.
सातारकरांसाठी आजही तिसरा पर्याय उभा न राहिल्याने राजधानीच्या निवडणुकीचा सामना राजे विरुद्ध राजे असाच राहिला आहे. मात्र, यंदा परिस्थिती वेगळी आहे. दोन्ही राजे भाजपवासी झाल्याने पालिकेचा गड काबीज करण्यासाठी काँग्रेस, शिवसेना, राष्ट्रवादी व अपक्षांनीही देखील मोट बांधली आहे.
साताऱ्यात बुधवारी आमदार शशिकांत शिंदे यांच्या अध्यक्षतेखाली झालेल्या बैठकीत याची प्रचिती आली. साताऱ्यातील अनेक प्रश्न आजवर सुटलेले नाहीत. जनतेला पर्याय हवा आहे. सातारकरांना पायाभूत सुविधा उपलब्ध होत नाहीत. ही परिस्थिती बदलण्यासाठी, जनतेच्या विकासासाठी व त्यांचे जीवनमान उंचावण्यासाठी यंदा तिसरा पर्याय निर्माण करण्याची गरज असल्याचे मत या बैठकीत व्यक्त करण्यात आले.
या मागणीला सर्वांनी दुजोरा दिला. या निर्णयामुळे सातारा पालिकेची यंदाची निवडणूक रंगतदार होणार असून, खासदार उदयनराजे भोसले व आमदार शिवेंद्रसिंहराजे भोसले काय रणनीती आखणार हे पाहणे औत्सुक्याचे ठरणार आहे.
या बैठकीला माजी उपनगराध्यक्ष ऍड. बाळासाहेब बाबर, शहर सुधार समितीचे अस्लम तडसरकर, ज्ञानदेव कदम, विजया निकम, प्राध्यापक विक्रांत पवार, शिवसेना शहर प्रमुख बाळासाहेब शिंदे, प्रणव सावंत, माजी नगरसेवक अमर गायकवाड, गिरीश मोडकर, स्नेहा अंजलकर, सलीम कच्छी, अमित कदम, अमृता पाटील आदी उपस्थित होते.
