Maharashtra Local Body Election Result 2025 Live Updates
21 Dec 2025 09:53 AM (IST)
बुलढाणा जिल्ह्यात 11 नगरपरिषद साठी मतदान झाल्यानंतर आज मतमोजणी ला थोड्याच वेळात सुरुवात होणार आहे, नगराध्यक्षांसाठी 87 उमेदवार रिंगणात तर 286 नगरसेवकांसाठी 1181 उमेदवार रिंगणात आहेत. जिल्ह्यात सात ठिकाणी तिरंगी, दोन ठिकाणी चौरंगी, तर दोन ठिकाणी दुहेरी लढत पाहायला मिळत आहे.. या कार्यकर्त्यांच्या निवडणुकीत दिग्गजांची प्रतिष्ठा पणाला लागलेली आहे.
21 Dec 2025 09:47 AM (IST)
येवला नगरपरिषदेच्या निवडणुकीच्या मतमोजणीला थोड्याच वेळात सुरुवात होणार असून यावेळी नगराध्यक्ष पदाचे राष्ट्रवादीचे उमेदवार राजेंद्र लोणारी व शिवसेनेचे नगराध्यक्ष पदाची उमेदवार रुपेश दराडे यांच्यामध्ये सरळ लढत बघायला मिळाली होती. यावेळी 13 प्रभागांसाठी 13 टेबलची व्यवस्था मतमोजणी करता करण्यात आली असून सकाळपासूनच पोलिसांचा कडीकोट बंदोबस्त या मतमोजणी केंद्र बाहेर बघायला मिळत आहे
21 Dec 2025 09:43 AM (IST)
सांगोला नगरपालिका निवडणुकीसाठी नऊ वाजून गेले तरी अद्याप स्ट्रॉंग रूम उघडली नाही. त्यामुळे नगराध्यक्ष पदाचे उमेदवार आनंदा माने, मारुती बनकर आणि विश्वेश झपके या तिन्ही उमेदवारांनी एकत्रित येऊन आयोगाच्या विरुद्ध नाराजी व्यक्त केली आहे. वेळेत स्ट्रॉंग उघडली गेली नाही त्यामुळे उमेदवार नाराज असून मतमोजणी पूर्वीच सांगोल्यात आता उमेदवार आणि प्रशासकीय यंत्रणेतील कलगीतुरा पाहायला मिळत आहे.
21 Dec 2025 09:25 AM (IST)
अहिल्यानगर जिल्ह्यातील 12 नगरपरिषद-नगरपंचायत निवडणुकीची मतमोजणी काहीच वेळात सुरू होणार आहे. यातील संगमनेर, कोपरगाव आणि शिर्डी नगरपरिषद निकालाकडे सर्वांच लक्ष लागले आहे. तर कोपरगाव नगरपरिषद निवडणुकीकडे संवेदनशील म्हणून पाहिली जात आहे.
21 Dec 2025 09:15 AM (IST)
धाराशिव जिल्ह्यात नगरपरिषद निवडणुकीच्या मतमोजणीत शिवसेना उद्धव बाळासाहेब ठाकरे पक्षच एक नंबर राहील असा दावा आमदार कैलास पाटील यांनी केला आहे. भाजप एक नंबरचा पक्ष होणार असेल तर भाजपाचे किती, आणि इतर पक्षातील फोडाफोडी करून आणलेली किती उमेदवार विजयी होणार हे ही पाहावे लागले असं म्हणत त्यांनी भाजपला चिमटा काढला आहे.
21 Dec 2025 09:07 AM (IST)
गेल्या अनेक वर्षांपासून ग्रामपंचायत असलेल्या अनगरला यंदाच्या वर्षी नगरपंचायतीचा दर्जा मिळाला. एकूण १७ सदस्यसंख्या असलेल्या या नगरपंचायतीवर अखेर भाजपचा झेंडा फडकला आहे. कारण, आता या नगरपंचायतीच्या नगराध्यक्षपदी प्राजक्ता पाटील यांची बिनविरोध निवड झाली आहे. प्राजक्ता पाटील या मोहोळ माजी आमदार राजन पाटील यांच्या स्नुषा आहेत.
21 Dec 2025 08:50 AM (IST)
नगरपरिषद आणि नगरपंचायतींच्या निवडणुकांनंतर आता सर्वांना लक्ष मतमोजणीकडे लागले आहे. नगरपरिषद आणि नगरपंचायतींच्या निवडणुकांमध्ये केवळ महायुतीच नव्हे, तर महाविकास आघाडीतील पक्षही ठिकठिकाणी एकमेकांविरुद्ध रिंगणात होते. त्यामुळे आजच्या निकालाबाबत कमालीची उत्सुकता लागली आहे.
21 Dec 2025 08:40 AM (IST)
मालवणमध्ये भाजप नगराध्यक्षपदाचे उमेदवार शिल्पा खोत यांचं जात प्रमाणपत्र खोट असल्याचा आरोप करत कोर्टात धाव घेतली. त्यामुळे शिंदे सेनेचे आमदार निलेश राणे यांची मालवणमध्ये प्रतिष्ठा पणाला लागली आहे. सोबत याआधी उबाठाचा नगराध्यक्ष होता, त्यामुळे ही जागा उबाठाची असल्यानं याठिकाणी माजी आमदार वैभव नाईक यांची प्रतिष्ठा पणाला लागली आहे.
21 Dec 2025 08:30 AM (IST)
रायगडमधील महाड आणि रोहा नगरपालिकेत मतदानाच्या दिवशी जोरदार राडा झाला होता. महाडमधील प्रभाग क्रमांक 2 मध्ये बंद पडलेल्या ईव्हीएम मशिनमुळे या परिसरात दोन्ही पक्षाचे कार्यकर्ते आपापसात आमने-सामने आल्याने हा प्रकार घडला आणि या भानगडीत सुशांत जाबरे यांच्या कडून विकास गोगावले यांना पिस्तुल दाखवण्यात आली.
21 Dec 2025 08:20 AM (IST)
बीड जिल्ह्यातील परळीमध्ये विशेष खबरदारी घेतली जात आहे. नगर परिषदेच्या मुख्य इमारतीत मतमोजणी होत असल्याने आज वैद्यनाथ मंदिराकडे जाणारा मुख्य मार्ग बंद असणार आहे. काही दिवसांपूर्वी स्ट्रॉंग रूम बाहेर राष्ट्रवादी काँग्रेस शरद पवार गटाचे पदाधिकारी आणि कार्यकर्त्यांकडून करण्यात आलेल्या राड्यानंतर आज मतमोजणीसाठी पोलीस प्रशासन अलर्ट मोड वर आहे.
21 Dec 2025 08:10 AM (IST)
मुंबई महानगरपालिका निवडणुकीपूर्वी महाविकास आघाडीत मोठी फूट पडली आहे. काँग्रेसने मुंबई निवडणुका स्वबळावर लढवण्याची घोषणा केली आहे. पक्षाचे महाराष्ट्र प्रभारी रमेश चेन्निथला यांनी शनिवारी ही घोषणा केली. मुंबई काँग्रेसच्या राजकीय व्यवहार समितीच्या बैठकीनंतर चेन्नीथला म्हणाले, ‘आम्ही महाविकास आघाडीसोबत लोकसभा आणि विधानसभा निवडणुका लढवल्या. पक्षाच्या कार्यकर्त्यांना वाटते की, नागरी निवडणुका स्वतंत्रपणे लढाव्यात. त्यामुळे काँग्रेस बीएमसी निवडणुका स्वबळावर लढणार आहे’.
21 Dec 2025 07:55 AM (IST)
राज्यात झालेल्या नगरपरिषद आणि नगरपंचायत निवडणुकीचे निकाल हाती यायला काही तास शिल्लक राहिले आहेत. अशात आता राजकीय नेत्यांच्या प्रतिक्रिया देखील यायला सुरुवात झाली आहे. भाजपच सर्वात मोठा पक्ष ठरणार असून, आम्ही केलेल्या विकास कामाची ही पोचपावती असणार असल्याचं मंत्री अतुल सावे म्हणाले आहे.
21 Dec 2025 07:47 AM (IST)
राज्यात दोन टप्प्यात झालेल्या नगरपरिषद आणि नगरपंचायत निवडणुकीचा आज निकाल हाती येणार आहे. सकाळी दहा वाजल्यापासून मतमोजणीला सुरूवात होणार आहे. या पार्श्वभूमीवर सामाजिक न्याय मंत्री संजय शिरसाट यांनी मोठं वक्तव्य केलं आहे. आजच्या निकालात भाजप एक नंबरचा आणि शिंदेंची शिवसेना दोन नंबरचा पक्ष ठरणार असल्याचा विश्वास त्यांनी व्यक्त केला आहे.
21 Dec 2025 07:34 AM (IST)
पालघर जिल्ह्यातील पालघर, डहाणू, जव्हार या तीन नगरपरिषद आणि वाडा नगर पंचायतीसाठी झालेल्या मतदानानंतर आज मतमोजणी होणार आहे. सकाळी 10 वाजता प्रत्यक्ष मत मोजणाला सुरवात होणार आहे. पालघरमध्ये चारही ठिकाणच्या मिळून नगरसेवक पदासाठी 318, तर नगराध्यक्षपदासाठी 17 उमेदवार रिंगणात आहेत. त्यांचे भविष्य आज ठरणार आहे. पालघरमधील मतमोजणी केंद्रावर मतमोजणीची सर्व तयारी पूर्ण झाली आहे.
21 Dec 2025 07:26 AM (IST)
तीन मराठी वृत्तवाहिन्यांनी नगरपरिषद निवडणुकीचा एक्झिट पोल दिला असून, त्यात भाजप हा निर्विवादपणे क्रमांक एकचा पक्ष राहील असे म्हटले आहे. दोन वृत्तवाहिन्यांनी दुसऱ्या क्रमांकावर शिंदेसेना, तर तिसऱ्या क्रमांकावर काँग्रेस असेल. त्यानंतर अजित पवार गटाला यश मिळेल, असा अंदाज वर्तविला आहे. अन्य एका वृत्तवाहिनीने भाजपकडे १४७ नगरपरिषदांची अध्यक्षपदे जातील, असे म्हटले असून, शिंदेसेना क्रमांक २ वर, अजित पवार गट क्रमांक ३ वर, तर काँग्रेस क्रमांक ४ वर राहील, असे म्हटले आहे. एक्झिट पोलचे हे अंदाज कितपत खरे ठरतात याची उत्सुकता असेल.
21 Dec 2025 07:15 AM (IST)
अमरावतीच्या अंजनगाव सुर्जी येथील श्रीनाथ शाळेतील मतदान केंद्रावरील मतपेटी हलवताना वाद झाला आहे. मतपेट्या सिलिंगच्या वेळी आमच्या पक्षाचा उमेदवार का नाही यातून हा वाद झाला आहे.तसेच मतपेट्या क्रुझर वाहनातूनच का नेण्यात येत आहेत असाही मुद्दा उपस्थित केल्याची माहिती आहे.
21 Dec 2025 07:10 AM (IST)
नगरपरिषद आणि नगरपंचायतींच्या निवडणुकांनंतर आता सर्वांना वेध लागलेत मतमोजणीचे. नगरपरिषद आणि नगरपंचायतींच्या निवडणुकांमध्ये केवळ महायुतीच नव्हे, तर महाविकास आघाडीतील पक्षही ठिकठिकाणी एकमेकांविरुद्ध रिंगणात होते. त्यामुळे आजच्या निकालाबाबत कमालीची उत्सुकता लागली आहे. राज्यातील लहान शहरांचा कौल कोणाला? याचा फैसला आज होणार आहे.
21 Dec 2025 06:59 AM (IST)
राज्याच्या राजकारणात घडामोडींना वेग आला आहे. यातच दुबार मतदारावरून निवडणूक आयोगावर विरोधकांनी टिकेची झोड उठवली आहे. अनेक ठिकाणी मतदार याद्यांमध्ये घोळ असल्याचा आरोप विरोधक करत आहेत. काही दिवसांपूर्वी महाविकास आघाडी आणि मनसेने मुंबईत मोर्चा देखील काढला होता. मतचोरी, मतांमधील घोळ, निवडणुकीतील गैरव्यप्रकार याबाबत आवाज उठवला होता.
21 Dec 2025 06:56 AM (IST)
सातारा जिल्ह्यात ४९.१४ टक्के, छत्रपती संभाजीनगरमध्ये ५५.३७ टक्के, गडचिरोली जिल्ह्यात ५४.८१ टक्के, त्र्यंबकेश्वरमध्ये ७० टक्क्यांपेक्षा अधिक मतदान झालं, तर पुणे जिल्ह्यात ५१.०६ टक्के मतदान झालं. पुण्यातील जुन्नर ४७ टक्के, तळेगाव दाभाडे ३६ टक्के राजगुरूनगर ५३.४४ टक्के लोणावळा ५५ टक्के, चाकण ५७.६४, आळंदी ५९.३३ टक्के मतदान झालं आहे. तसेच वर्धा जिल्ह्यात दुपारी ४४ टक्के मतदान झालं. यामध्ये हिंगणघाट ४५.६७ टक्के, वर्धा ४३.६३ टक्के, सिंदी रेल्वे ५१ टक्के, आर्वी ४५ टक्के, पुलगाव 38.19 टक्के मतदान झालं आहे. तसेच नंदुरबार जिल्ह्यामधील चार नगरपालिकेत ४६ टक्के मतदान झालं आहे.
21 Dec 2025 06:54 AM (IST)
२ डिसेंबर २०२५ ला मतदानाची प्रक्रिया पार पडली. तर २१ डिसेंबर ही निकालाची तारीख ठरवण्यात आली. त्यानुसार आज म्हणजेच २१ डिसेंबर २०२५ ला कोणत्या पक्षाचा उमेदवार जिंकला आणि कुणाचा पराभव होणार, हे पाहणं महत्त्वाचे ठरणार आहे.
Nagarparishad & Nagarpanchayat Election Result 2025 LIVE Updates : महाराष्ट्राच्या ३६ जिल्ह्यांमधील २४६ नगरपरिषद (Nagarparishad Election Result) जागांसाठी यंदा निवडणुका घेण्यात आल्या. या निवडणुकांसाठी २ डिसेंबर २०२५ ला मतदानाची प्रक्रिया पार पडली. तर २१ डिसेंबर ही निकालाची तारीख ठरवण्यात आली. त्यानुसार आज म्हणजेच २१ डिसेंबर २०२५ ला कोणत्या पक्षाचा उमेदवार जिंकला आणि कुणाचा पराभव होणार, हे पाहणं महत्त्वाचे ठरणार आहे.
