पुणे : पुण्यातील गंगाधाम परिसरातील दुसऱ्या फेजमध्ये आगीची घटना घडली आहे. सोसायटीतील सातव्या मजल्यावरील एका घरात भीषण आग लागली. सातव्या मजल्यावरील चारी घरातील लोकांना बाहेर जाण्यास सांगून एका घरामध्ये बचावकार्य करण्यात आले. परिसरामध्ये धुराचे मोठे लोट दिसून येत होते. अग्निशमन दलाला तातडीने बोलावण्यात आले.
गंगाधाम परिसरातील आगीची माहिती मिळताच अग्निशमन दलाने धावत घटनास्थळी धाव घेतली. जवानांनी तातडीने पाण्याचा मारा सुरु करून आग विझवण्याचा प्रयत्न केला. त्याचवेळी आतमध्ये कोणी अडकले आहे का, याची खात्री केली. बाल्कनीमध्ये कुटुंबातील पाच जण अडकून पडल्याचे निदर्शनास आले. यामध्ये एक ज्येष्ठ महिला, दाम्पत्य आणि त्यांची दोन लहान मुले होती . जवानांनी सर्वांची सुखरुप सुटका केली.
साधारणपणे अर्धा तासामध्ये अग्निशमन दलाने आगीवर नियंत्रण मिळवले. सदनिकेत खोलीमध्ये असणाऱ्या पेटत्या दिव्यामुळे आग लागली असा प्राथमिक अंदाज व्यक्त करण्यात आला असून सदनिकेतील सर्व गृहपयोगी साहित्य पूर्ण जळाले. अग्निशमन दल वेळेत दाखल झाल्यामुळे पुढील अनर्थ टळला. इमारतीत असलेली स्थायी अग्निशमन यंत्रणा कार्यान्वित नसल्याचे अग्निशमन दलाच्या निदर्शनास आले. अग्निशमन दलाचे अधिकारी संजय रामटेके, प्रभारी अधिकारी कैलास शिंदे यांच्या मार्गदर्शनाखाली वीस जवानांनी आग आटोक्यात आणून पाच जणांचे जीव वाचविले.
.png "Videos"){kind=small}
