उद्या होणारा माथाडी कामगारांचा संप स्थगित, माथाडी कामगार संघटनांचा मुख्यमंत्र्यांसोबतच्या बैठकीनंतर निर्णय

नवी मुंबई : सन 2023 चे माथाडी अधिनियम सुधारणा विधेयक क्र.34 मागे घ्यावे यासाठी माथाडी संघटना आक्रमक झाल्या आहेत. उद्या (१४ डिसेंबर रोजी ) माथाडी कामगार बंद पुकारणार असल्याचा इशारा माथाडी संघटनांनी दिला होता. याबाबत मुख्यमंत्र्यानी माथाडी संघटनांसोबत बैठक घेतली. बैठकीत माथाडी अधिनियम विधायक क्रमांक 34 स्थगित करण्याचा आणि अधिनियमाचा दुरुपयोग टाळण्यासाठी व अधिनियमाची परिणामकारक अंमलबजावणी होण्याकरीता उपाययोजना करण्यात येतील. याबाबत मालक व कामगार प्रतिनिधींच्या सूचना घेऊन पुढील कार्यवाही केली जाईल,अशी ग्वाही राज्याचे मुख्यमंत्री,उपमुख्यमंत्री यांनी दिली. त्यामुळे माथाडी कामगारांचा दि.14 डिसेंबर रोजी पुकरलेला संप स्थगित करण्यात आला.

सन 2023 चे माथाडी अधिनियम सुधारणा विधेयक क्र.34

माथाडी अधिनियमाचा दुरुपयोग टाळणे व अधिनियमाची योग्य पध्दतीने अंमलबजावणी होण्यासाठी उपाययोजना करणे या मागणीसाठी माथाडी कायदा बचाव कृती समितीच्यावतिने गुरुवार दि.14 डिसेंबर रोजी माथाडी कामगारांचा लाक्षणिक संप केला जाणार असल्याची नोटीस राज्य सरकार व संबंधितांना संघटनांकडून देण्यात आली होती. त्यामुळे सरकारवर दडपण तयार झाले होते. शासनाने देखील गांभीर्याने याबाबत माथाडी संघटनांशी चर्चा केली. यासंदर्भात महाराष्ट्र राज्याचे मुख्यमंत्री यांनी उपमुख्यमंत्री गृह व वित्त, कामगार व उद्योग मंत्री आणि संबंधितांची माथाडी कायदा बचाव कृती समितीबरोबर झालेल्या बैठकीत माथाडी अधिनियम विधायक क्रमांक 34 स्थगित करण्याचा आणि अधिनियमाचा दुरुपयोग टाळण्यासाठी व अधिनियमाची परिणामकारक अंमलबजावणी होण्याकरीता उपाययोजना करण्यासंदर्भात मालक व कामगार प्रतिनिधींच्या सूचना घेऊन पुढील कार्यवाही केली जाईल, अशी ग्वाही राज्याचे मुख्यमंत्री, उपमुख्यमंत्री यांनी दिली. यावेळी मुख्यमंत्री एकनाथ शिंदे यांचे अध्यक्षतेखाली नागपूर विधानभवनात आयोजित करण्यात आलेल्या बैठकीस उपमुख्यमंत्री देवेंद्र फडणवीस, अजित पवार, कामगार मंत्री सुरेश खाडे, कामगार विभागाच्या प्रधान सचिव विनिता सिंघल, कामगार आयुक्त, गृह व उद्योग विभागाचे प्रधान सचिव, आमदार शिवेंद्रराजे भोसले, आमदार निरंजन डावखरे, आमदार भाई जगताप, आमदार प्रविण दटके, जेष्ठ कामगार नेते बाबा आढाव, माथाडी कामगार नेते माजी आमदार नरेंद्र पाटील, आमदार शशिकांत शिंदे,गुलाबराव जगताप, पोपटराव देशमुख,अविनाश रामिष्टे, बळवंतराव पवार, प्रकाश पाटील, अरूण रांजणे, राजन म्हात्रे, हनुमंत बहिरट, राजकुमार घायाळ, तुषार वाडीया आदी उपस्थित होते.