फोटो सौजन्य- pinterest
नवी मुंबई शहराची शहराची गणना ‘वेल प्लॅन्ड सिटी’ (सुजाण नियोजनबद्ध शहर) म्हणून केली असली, तरी कोपरखैरणेवासीयांना मात्र रोजच्या तुफान वाहतूक कोंडीचा सामना करावा लागत आहे. विशेषतः संध्याकाळी ६ ते रात्री ९ या वेळेत कोपरखैरणे स्टेशन परिसरातून गाडी घेऊन जाणे म्हणजे वाहनधारकांसाठी मोठा मनस्ताप ठरत आहे.
कोपरखैरणे भुयारी मार्गाजवळ वाहतूक पोलीस तैनात नसल्याचा गैरफायदा काही बेजबाबदार टेम्पो चालक घेत आहेत. सायंकाळच्या गर्दीच्या वेळी भुयारी मार्गाची उंची आणि रुंदीचा अंदाज न घेता सर्रास मोठे टेम्पो यात घातले जातात. योग्य जजमेंट न मिळाल्याने अनेकदा हे टेम्पो भुयारी मार्गातच अडकून पडतात. त्यामुळे दोन्ही बाजूंची वाहतूक पूर्णपणे ठप्प होते.
केवळ स्टेशन परिसरच नाही, तर संध्याकाळच्या वेळी डी-मार्टपासून ते सेक्टर १५ आणि सेक्टर २० पर्यंत घणसोलीच्या दिशेने जाणाऱ्या मुख्य रस्त्यावर वाहनांच्या प्रचंड रागा लागतात.
रेल्वे स्टेशनवरून बाहेर पडणाऱ्या प्रवाशांची गर्दी आणि भुयारी मार्गातून ये-जा करणारी वाहने यांच्या एकत्रित लोटामुळे या संपूर्ण परिसराला ट्रॅफिक जॅमचे स्वरूप प्राप्त होते. नागरिकांचा मोलाचा वेळ या कोंडीतच वाया जात आहे.
स्थानिक नागरिकांच्या मते, वाहतूक नियमन कक्षाचे या गंभीर समस्येकडे पूर्णपणे दुर्लक्ष होत आहे. अनेक महत्वाच्या चौकांमध्ये किंवा सिग्नलवर वाहतूक पोलीस कर्मचारी हजर नसतात. ते सिग्नल सोडून अर्धा ते एक किलोमीटर अंतरावर लपून-छपून उभे राहतात.
नागरिकांनी आरोप केला आहे की, वाहतूक कोंडी सोडवण्याऐवजी चालक किंवा ई-चलान फाडण्यातच पोलीस कर्मचारी व्यस्त असतात. एकाच ठिकाणी ३ ते ४ कर्मचारी ई-चलान मशीन घेऊन उभे राहिलेले दिसतात. जर हेच कर्मचारी थेट सिग्नलवर किंवा गर्दीच्या ठिकाणी उभे राहिले, तर वाहनचालकांमध्ये नियमांची भीती राहील आणि कोंडी होणार नाही.
फोन केल्याशिवाय पोलिस येतच नाहीत!
रजोपर्यंत नागरिक स्वतः वाहतूक नियंत्रण कक्षाला फोन करून तक्रार करत नाहीत, तोपर्यंत परिसरात एकही वाहतूक पोलीस फिरकत नाही. एरवी आम्ही रोजच्या कोंडीतून कसातरी मार्ग काढत कसेबसे घर गाठतो, अशी उद्विग्न प्रतिक्रिया स्थानिक रहिवाशांनी दिली.ॉ
नवी मुंबई पोलीस आयुक्तालयात सध्याच्या वाहतूक पोलीस उपायुक्तांची ओळख एक अनुभवी अधिकारी म्हणून आहे. कोपरखैरणे परिसरातील या रोजच्या समस्येवी त्यांना खरोखरच माहिती आहे का आणि ते यावर काही ठोस उपाययोजना करणार का, असा प्रश्न आता कोपरखैरणेकर विचारत आहेत. वाहतूक पोलीस आयुक्तांनी या समस्येत तातडीने लक्ष घालून कोपरखैरणेकरांची या कोंडीच्या विळख्यातून मुक्तता करावी, हीच एकच अपेक्षा व्यक्त केली जात आहे.
(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)
.png "Videos"){kind=small}
