Children Day Celebration : पंडित जवाहरलाल नेहरू यांच्या बालस्वप्नांचा आनंदोत्सव; जवाहर बाल भवनात बालदिन उत्साहात साजरा!

Children Day Celebration : मुंबईतील चर्नी रोड येथील जवाहर बाल भवनात बालदिनानिमित्त बालोत्सवाचे आयोजन करण्यात आले. चित्रकला, रंगभरण, कुचीपुडी, भरतनाट्यम, कथक, गीतगायन आणि बालनाट्यातून विद्यार्थ्यांनी कलागुणांचे दर्शन घडवले.

• चित्रकला, रंगभरण, शास्त्रीय नृत्याचे आयोजन
• बालप्रतिभेचा बहारदार आविष्कार
• एकपात्री अभिनयातून कौशल्याची छाप

 

नीता परब, मुंबई

 

Children Day Celebration : भारताचे पहिले पंतप्रधान पंडित जवाहरलाल नेहरू यांच्या जन्मदिनानिमित्त 14 नोव्हेंबर रोजी साजरा होणाऱ्या बालदिनाचे औचित्य साधून महाराष्ट्र राज्य जवाहर बाल भवन, चर्नी रोड, मुंबई यांच्या वतीने बालोत्सवाचे भव्य आयोजन करण्यात आले होते. बालकांवर विशेष प्रेम करणाऱ्या पंडित जवाहरलाल नेहरू यांच्या संकल्पनेतून बालभवनाची निर्मिती झाली.
बालकांच्या सर्वांगीण विकासासाठी, त्यांच्या सुप्त कलागुणांना वाव देण्यासाठी आणि सर्जनशीलतेला प्रोत्साहन देण्यासाठी उभारण्यात आलेले चर्नी रोड येथील समुद्रकिनारी वसलेले जवाहर बाल भवन हे भारतातील पहिले बालभवन म्हणून विशेष ओळखले जाते. याच ऐतिहासिक आणि प्रेरणादायी वास्तूत बालदिनाचा सोहळा बालप्रतिभेच्या विविध रंगांनी मोठ्या उत्साहात रंगला.

कलात्मक दृष्टीकोनाचा मनोहारी आविष्कार

बालोत्सवाच्या निमित्ताने विद्यार्थ्यांसाठी विविध कलास्पर्धांचे आयोजन करण्यात आले होते. यामध्ये इयत्ता पहिली ते दुसरी आणि इयत्ता तिसरी ते चौथी अशा दोन गटांत रंगभरण स्पर्धा घेण्यात आली. तसेच इयत्ता पाचवी ते सातवी आणि इयत्ता आठवी ते दहावी या गटांसाठी चित्रकला स्पर्धेचे आयोजन करण्यात आले होते. चिमुकल्या विद्यार्थ्यांनी रंगांच्या माध्यमातून कल्पनांचे सुंदर विश्व कागदावर साकारले, तर मोठ्या गटातील विद्यार्थ्यांनी आपल्या कुंचल्यातून कल्पकता, निरीक्षणशक्ती आणि कलात्मक दृष्टिकोन यांचा मनोहारी आविष्कार घडविला.

बालोत्सवातील सांस्कृतिक कार्यक्रम हे विशेष आकर्षण ठरले. विद्यार्थ्यांनी सादर केलेल्या कुचीपुडी, भरतनाट्यम आणि कथक या शास्त्रीय नृत्यप्रकारांनी उपस्थितांची मने जिंकली. ताल, लय, भावमुद्रा आणि पदन्यास यांचा सुरेख मिलाफ साधत बालकलावंतांनी भारतीय शास्त्रीय नृत्यपरंपरेचे देखणे दर्शन घडविले. त्यांच्या आत्मविश्वासपूर्ण आणि शिस्तबद्ध सादरीकरणाला उपस्थितांकडून उत्स्फूर्त दाद मिळाली.

ST Employees : एसटीतील कंत्राटी भरतीविरोधात एल्गार! श्रीरंग बरगे यांचा सरकारला थेट इशारा

एकपात्री अभिनयातून कौशल्याची छाप

संगीत आणि अभिनयाच्या क्षेत्रातही विद्यार्थिनींनी आपल्या प्रतिभेची सुंदर झलक दाखवली. सुमधुर गीतगायनातून त्यांनी स्वरांची सुरेल मैफल सजवली. सुरेल आवाज, गाण्यातील भावपूर्णता आणि सादरीकरणातील आत्मविश्वास यामुळे उपस्थित रसिक मंत्रमुग्ध झाले.
तसेच एकपात्री अभिनयाच्या सादरीकरणातून विद्यार्थिनींनी आपल्या अभिनयकौशल्याची प्रभावी छाप उमटवली. विविध भावछटा, संवादफेक, हावभाव आणि देहबोली यांच्या माध्यमातून त्यांनी रंगमंचावर जणू एक स्वतंत्र भावविश्वच उभे केले. लहान वयातच एवढ्या सहजतेने आणि आत्मविश्वासाने व्यक्त होणाऱ्या या बालकलावंतांचे विशेष कौतुक करण्यात आले.

याचबरोबर विद्यार्थ्यांनी सादर केलेल्या बालनाट्य प्रवेशांनी कार्यक्रमात नाट्यमय रंगत आणली. निरागसता, कल्पकता आणि सहज अभिनय यांचा सुंदर संगम त्यांच्या सादरीकरणातून अनुभवायला मिळाला. रंगभूमीवरील वावर, संवादफेक आणि प्रसंगानुरूप अभिनय यांतून विद्यार्थ्यांनी आपल्या अंगी असलेल्या नाट्यकलेचे दर्शन घडविले. या छोट्या कलावंतांच्या सादरीकरणातून उद्याच्या रंगभूमीची आश्वासक पावले उमटताना दिसली.

Mumbai Chhath Puja: जुहू बीचसह चौपाट्यांवर जाण्यासाठी बेस्टच्या जादा बसगाड्या; जाणून घ्या वेळापत्रक

नीता पाटील यांचे पालकांना मार्गदर्शन

याप्रसंगी बालभवनच्या संचालिका नीता पाटील यांनी पालकांना मार्गदर्शन करताना आपल्या पाल्यांमधील सुप्त कलागुण ओळखून त्यांना प्रोत्साहन द्यावे, त्यांच्या आवडी-निवडींना योग्य व्यासपीठ उपलब्ध करून द्यावे आणि अशा सर्जनशील उपक्रमांमध्ये मुलांना सातत्याने सहभागी होण्यासाठी प्रेरित करावे, असे आवाहन केले.

कार्यक्रमाचे सुरेख सूत्रसंचालन सृजनी यमुनुरवार यांनी केले. हा बालोत्सव यशस्वी करण्यासाठी आसिफ शेख, योगेश कामडी, विशाल ठाकूर, रुपाली पालेकर आदींनी विशेष परिश्रम घेतले.

बालोत्सवाच्या माध्यमातून मुलांना केवळ आपली कला सादर करण्याची संधी मिळाली नाही, तर स्वतःला व्यक्त करण्याचा आत्मविश्वास, सहकाऱ्यांसोबत काम करण्याची वृत्ती आणि कलेविषयीची आस्था यांचीही सुंदर शिदोरी मिळाली. रंग, रेषा, स्वर, ताल, लय आणि अभिनय अशा विविध कलांच्या माध्यमातून बालमनातील कल्पनाशक्तीला मिळालेले मुक्त व्यासपीठ म्हणजे हा बालोत्सव ठरला. बालकांच्या चेहऱ्यावरील निरागस हास्य, सादरीकरणातील उत्साह आणि पालकांच्या चेहऱ्यावरील अभिमान यामुळे चर्नी रोडवरील जवाहर बाल भवनाचा परिसर खऱ्या अर्थाने बालप्रतिभेच्या आनंदाने आणि उत्साहाने फुलून गेला.