अखेर ठरलं ! राज्यातील महायुती सरकारचा 5 डिसेंबरला होणार शपथविधी; पंतप्रधान मोदीही राहणार उपस्थित

भाजपचे प्रदेशाध्यक्ष चंद्रशेखर बावनकुळे यांनी याबाबतची माहिती दिली. सायंकाळी पाच वाजता होणाऱ्या शपथविधीला पंतप्रधान नरेंद्र मोदी उपस्थित राहणार आहेत. महायुतीच्या मुख्यमंत्रिपदाचा चेहरा कोण याचे उत्तर अद्याप मिळालेले नाही. मात्र, महाराष्ट्राच्या 31 व्या मुख्यमंत्रिपदाचा शपथविधी सोहळा 5 डिसेंबर रोजी सायंकाळी 5 वाजता होणार आहे.

माजी विधानसभा अध्यक्ष राहुल नार्वेकर यांनीही या वृत्ताला दुजोरा दिला असताना चंद्रशेखर बावनकुळे यांनी एक्स हॅन्डलवर पोस्ट करत ही माहिती दिली. भाजप नेते देवेंद्र फडणवीस हेच महाराष्ट्राचे व महायुतीचे मुख्यमंत्री होतील, असा अंदाज राजकीय विश्लेषक वर्तवत आहेत.

तसेच दिल्लीच्या बैठकीत देवेंद्र फडणवीस यांचेच नाव निश्चित झाल्याची सूत्रांची माहिती आहे. त्यासाठी, भाजपकडून मुख्यमंत्रिपदाचा चेहरा 2 डिसेंबर रोजी स्पष्ट होणार आहे. भाजपचा गटनेता 2 डिसेंबरला निवडला जाणार असून, दुपारी एक वाजता विधानभवनात गटनेता निवडीसाठी भाजपची बैठक होणार आहे. या बैठकीला भाजपचे सर्व आमदार उपस्थित राहणार आहेत.

एकनाथ शिंदे, अजित पवार होणार उपमुख्यमंत्री?

राज्याच्या उपमुख्यमंत्री पदावर एकनाथ शिंदे आणि अजित पवार विराजमान होणार आहेत. शिंदे यांच्याकडे नगरविकास खाते असणार आहे. शिंदे यांनी गृहखातेही मागितले असताना याबाबत अद्याप निर्णय झाला नाही. गृहखात्याबाबत नवीन मुख्यमंत्री निर्णय घेतील, अशी माहिती अजित पवार यांनी दिली आहे.

हेदेखील वाचा : ७ दिवसांत मुख्यमंत्रिपदाची शपथ घेतली नाही तर..; काय सांगतात नियम अन् राज्यपाल कोणता निर्णय घेऊ शकतात? वाचा सविस्तर

संबंधित बातम्या