मुंबईत मॅकडोनाल्डसह ३ ठिकाणांवर FDAची कारवाई; गंभीर त्रुटी आढळल्याने अन्न परवाने निलंबित

मुंबईतील खाद्य कंपनींवर गंभीर कारवाई करत एफडीएने स्वच्छता आणि अन्नसुरक्षेच्या नियमांचे उल्लंघन करणाऱ्यांवर कठोर पाऊल उचलले आहे. तपासणीत गंभीर त्रुटी आढळल्यानंतर काही ठिकाणांचे अन्न परवाने निलंबित करण्यात आले आहेत.

• तपासणीत स्वच्छतेच्या गंभीर त्रुटी आढळल्या
• अन्नसुरक्षेच्या नियमांचे उल्लंघन उघड
• एफडीएकडून परवाने निलंबित करून कारवाई

अन्न व औषध प्रशासनाकडून मुंबईतील हॉटलांची झाडाझडती सुरू असून, त्याच कारवाईचा भाग म्हणून एफडीएने कुलाबा येथील मॅक डोनाल्ड आणि रेडिओ क्लबवर छापेमारी करत परवाना निलंबित केला आहे. कुलाब्यातील मॅक’ डोनाल्डच्या एका आउटलेटचा एफएसएसइआय परवाना निलंबित केला आहे. पुनर्तपासणीत यापूर्वीच्या २० त्रुटींपैकी तब्बल १८ त्रुटी कायम असल्याचे आढळून आले. गंभीर स्वच्छता आणि अन्नसुरक्षा उल्लंघनांमुळे हा निर्णय घेण्यात आला.

Mira Bhayandar News: ‘न्यायालयापेक्षा आमदाराचा आदेश मोठा आहे का?’ उच्च न्यायालयाचा MBMC आयुक्तांना सवाल

मेट्रो हाऊस येथे असलेल्या या आउटलेटमध्ये तपासणीदरम्यान झुरळांचा वावर, स्वयंपाकघरात साचलेला अन्नकचरा, अस्वच्छ साफसफाईची कापडे आणि अन्नाच्या संपर्कातील पृष्ठभागांवर स्वच्छतेचा अभाव आढळला. तयार अन्न हाताळण्यापूर्वी कर्मचाऱ्यांनी हात न धुता काम केल्याचेही निरीक्षणात समोर आले. त्याचबरोबर उघड्‌या अन्नपदार्थांच्या वर असलेल्या दिव्यांना संरक्षक कवच नसल्याने धूळ आणि संभाव्य दूषिततेचा धोका निर्माण झाला होता. विशेष म्हणजे, संबंधित आस्थापनाने १२ ऑगस्ट रोजी १४८ पानी अनुपालन अहवाल सादर करून सर्व त्रुटी दूर केल्याचा दावा केला होता. मात्र प्रत्यक्ष तपासणीत हा दावा चुकीचा असल्याचे स्पष्ट झाल्याने एफडीएने याची गंभीर दखल घेतली आहे.

स्वयंपाकघरात माशांचा वावर, मृत झुरळ

प्रतिष्ठित द बॉम्बे प्रेसिडेन्सी रेडिओ क्लब लिमिटेडच्या अन्न व्यवसायावर अन्न व औषध प्रशासनाने कठोर कारवाई केली आहे. १९ ऑगस्ट रोजी करण्यात आलेल्या तपासणीत अन्नसुरक्षा आणि स्वच्छतेच्या नियमांचे गंभीर उल्लंघन आढळून आल्याने क्लबचा अन्न परवाना तत्काळ निलंबित करण्यात आला आहे.
सार्वजनिक आरोग्याच्या दृष्टीने हा निर्णय घेण्यात आल्याचे प्रशासनाने स्पष्ट केले. तपासणीदरम्यान स्वयंपाकघरातील विविध भागांत माशांचा मोठ्या प्रमाणावर वावर आढळला. तसेच मृत झुरळ आढळून आले असून, भांडी धुण्याच्या परिसरात झुरळ पकडण्यासाठी लावलेले ट्रॅप उघड्या स्थितीत असल्याचे निदर्शनास आले.

नरीमन पॉइंटमध्ये रेस्टॉरंटवर कारवाई

ग्राहकाच्या एका तक्रारीची दखल घेत अन्न व औषध प्रशासनाने दक्षिण मुंबईतील नरीमन पॉइंट येथील ‘स्टेटस रेस्टॉरंट’वर तातडीची कारवाई केली आहे. तपासणीत अन्नसुरक्षेच्या नियमांची अनेक गंभीर उल्लंघने आणि अस्वच्छता आढळून आल्याने संबंधित आस्थापनाचा अन्न परवाना तत्काळ निलंबित करण्यात आला आहे.
ग २० ऑगस्टपासून पुढील आदेशापर्यंत रेस्टॉरंटला अन्नपदार्थांची खरेदी, विक्री आणि वितरण बंद ठेवण्याचे निर्देश देण्यात आले आहेत. अन्न सुरक्षा आयुक्त तुकाराम मुंढे यांच्या मार्गदर्शनाखाली झालेल्या तपासणीत कर्मचारी स्वच्छ भांड्यांवरच चेहरा धुत असल्याने सांडपाणी भांड्यांवर उडत असल्याचे आढळले.

चाळीतून थेट चॅम्पियनशिपपर्यंत! मुंबईच्या सात खेळाडूंचा प्रेरणादायी प्रवास; भाजप प्रदेशाध्यक्ष रविंद्र चव्हाणांकडून कौतुक

झुरळ प्रतिबंधक ट्रॅपचा अभाव

• ड्रेनेजमध्ये ग्रीस आणि झुरळ प्रतिबंधक ट्रॅप नसल्याचेही समोर आले. विशेष म्हणजे गरम किंवा थंड अन्न साठवण, रेफ्रिजरेशन आणि स्वयंपाकाच्या तापमानाची नोंद ठेवण्यासाठी आवश्यक मॉनिटरिंग व्यवस्था आणि कॅलिब्रेटेड उपकरणे उपलब्ध नव्हती.
• कच्चे, शिजवलेले, शाकाहारी आणि मांसाहारी पदार्थ यांच्यात योग्य विलगीकरण नसल्याने
  क्रॉस-कंटॅमिनेशनचा धोका निर्माण झाला होता. अन्नासोबत रसायने व इतर गैर-अन्न वस्तू ठेवण्यात आल्याचेही आढळले.
• या गंभीर त्रुटींमुळे सार्वजनिक आरोग्याला धोका निर्माण होत असल्याचे स्पष्ट झाल्यानंतर प्रशासनाने कायद्यानुसार कारवाई करत अन्न परवाना तात्काळ निलंबित केला आहे.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)