टाटा मेमोरियल सेंटरचा मोठा उपक्रम; ACTRECमध्ये ७८४ जणांसाठी निवास, कर्करोग क्षेत्रातील मनुष्यबळ बळकट होणार
ही निवासी इमारत हरीश आणि बिनाशाह फाउंडेशन यांच्या देणगीतून उभारली जात असून ॲक्टरेक कॅम्पसमधील वाढत्या शैक्षणिक आणि संशोधन गरजांना हातभार लावणार आहे. ३५२ वसतिगृह खोल्या आणि १६ दोन खोल्यांचे फ्लॅट्स असलेल्या या प्रकल्पामुळे देशभरातून येणाऱ्या विद्यार्थ्यांना आणि डॉक्टरांना सुसज्ज निवास उपलब्ध होणार आहे. देशातील सर्वात मोठ्या कर्करोग केंद्रांच्या जाळ्यांपैकी एक असलेल्या टाटा मेमोरियल सेंटर अंतर्गत ॲक्टरेक दरवर्षी सुमारे १०,००० नव्या रुग्णांची नोंद करते, तर संपूर्ण नेटवर्कमध्ये १.३ लाखांहून अधिक रुग्णांवर उपचार केले जातात. ॲक्टरेक सध्या ५०० खाटांचे रुग्णालय असून पुढील दोन वर्षांत त्याचा विस्तार अपेक्षित आहे.
“कर्करोग क्षेत्रातील पुढील पिढी घडवण्यासाठी सक्षम शैक्षणिक आणि निवासी वातावरण अत्यंत आवश्यक आहे. या सुविधेमुळे विद्यार्थ्यांना आणि संशोधकांना दर्जेदार प्रशिक्षणासाठी अनुकूल वातावरण मिळेल,” असे डॉ. सुदीप गुप्ता यांनी सांगितले. तर “देशभरातून शिक्षण आणि प्रशिक्षणासाठी ॲक्टरेक येथे येणाऱ्या विद्यार्थ्यांसाठी ही निवासी सुविधा अत्यंत उपयुक्त ठरेल. यामुळे त्यांना अधिक चांगल्या वातावरणात शिक्षण घेता येईल,” असे डॉ. पंकज चतुर्वेदी यांनी नमूद केले.
दरम्यान, डॉ. नवीन खत्री यांनी ॲक्टरेकच्या वाढत्या शैक्षणिक विस्ताराला या प्रकल्पामुळे मोठा हातभार लागेल, असे सांगितले. हरीश शाह यांनी ही गुंतवणूक म्हणजे कर्करोग उपचारामागील मानवी घटकाला बळ देण्याचा प्रयत्न असल्याचे स्पष्ट केले, तर रोबिन छाब्रा यांनी काम करणाऱ्या व्यक्तींना योग्य वातावरण मिळणे आवश्यक असल्याचे अधोरेखित केले. एकूणच, कर्करोग उपचार, संशोधन आणि शिक्षण या तिन्ही घटकांना पूरक अशी ही निवासी सुविधा उभारली जात असून, देशातील कर्करोग क्षेत्रातील मनुष्यबळ अधिक सक्षम करण्यासाठी हा महत्त्वाचा टप्पा मानला जात आहे.
.png "Videos"){kind=small}
