Sharad Pawar
Amravati Constituency : लोकसभा निवडणुकीचा प्रचाराचा धुरळा उडू लागला आहे. राष्ट्रवादीचे सर्वेसर्वा शरद पवार हे महाविकास आघाडीच्या उमेदवाराच्या प्रचारासाठी अमरावतीत आले होते. कधी काळी नवनीत राणांना सहकार्य करणाऱ्या शरद पवारांनी आपली ती घोडचूक होती, असे मान्य करीत, महाविकास आघाडीच्या उमेदवाराला मतदान करावे, असे म्हटले आहे.
शरद पवारांचे मोठे विधान
मला अमवरवतीकरांची माफी मागायची आहे. माझ्याकडून एक चूक झाली. पाच वर्षांपूर्वी जी निवडणूक होती त्या निवडणुकीत उमेदवाराला मतदान करा म्हणून मी काही सभा घेतल्या. लोकांनी माझा संदेश स्वीकारला आणि आम्ही ज्यांना पाठिंबा दिला त्यांना खासदार बनवलं. मात्र आता मी तुमची माफी मागतो, असं विधान शरद पवारांनी केलं आहे.
२०१९ साली अपक्ष उमेदवार नवनीत राणांना पवारांचे सहकार्य
२०१९ च्या निवडणुकीत अमरावती लोकसभा मतदारसंघातून नवनीत राणा अपक्ष उमेदवार म्हणून उभ्या राहिल्या होत्या. त्यावेळी शरद पवारांनी सभा घेत नवनीत राणांना मतदान करावे असं आवाहन केलं होतं. मात्र आता ही आपली मोठी चूक होती, असं शरद पवारांनी म्हटलंय.
पुन्हा अशी चूक होणार नाही
आज शरद पवार अमरावती दौऱ्यावर आहेत. येथे जाहीर सभेत उपस्थितांना संबोधित करताना त्यांनी नवनीत राणा यांच्याविषयीचं मत व्यक्त केले आहे. गेल्या पाच वर्षांतील त्यांचा अनुभव पाहता माझ्या मनात अस्वस्थता होती की कधीतरी अमरावतीत जावं आणि सांगावं की आमच्याकडून चूक झाली. मात्र आता ती चूक पुन्हा होणार नाही, असा शब्द शरद पवारांनी उपस्थितांना दिलाय.
मविआकडून बळवंत वानखेडे यांना उमेदवारी
अमरावतीमध्ये महाविकास आघाडीकडून बळवंत वानखेडे यांना उमेदवारी देण्यात आली आहे. त्यांच्या प्रचारासाठी स्वत: शरद पवार मैदानात उतरलेत. ज्याचं सामाजिक आणि वैयक्तिक जीवन शेवटच्या माणसाचा विचार करणारं आहे अशा बळवंत वानखेडे यांना विजयी करा हे सांगण्यासाठी मी इथे आलोय, असं शरद पवारांनी म्हटलं.
.png "Videos"){kind=small}
