पोलीस आयुक्त थेट उतरले रस्त्यावर; हिंजवडी वाहतूक कोंडीची प्रत्यक्ष पाहणी करत दिल्या सूचना

राजकीय बातम्या वाचण्यासाठी क्लिक करा 

या पाहणी दौऱ्यात सह पोलीस आयुक्त शशिकांत महावरकर, अपर आयुक्त सारंग आवाड, पीएमआरडीएचे अपर आयुक्त दीपक सिंगला, वाहतूक विभागाचे पोलीस उपायुक्त विवेक पाटील, परिमंडळ तीनचे उपायुक्त विशाल गायकवाड, वाकडचे सहायक पोलीस आयुक्त सुनील कुराडे, हिंजवडीचे वरिष्ठ पोलीस निरीक्षक बालाजी पांढरे तसेच #UnclogHinjawadiITPark मोहिमेचे समन्वयक सचिन गुणाले आणि सचिन लोंढे सहभागी होते. याशिवाय महावितरण, पीएमपीएमएल व एमआयडीसीचे अधिकारीही उपस्थित होते.

महत्वाच्या ठिकाणी केलेल्या पाहणीत काही सूचना देण्यात आल्या आहेत. यामध्ये वाहतूकमध्ये आणि रस्त्यांमध्ये थोडेफार बदल सुचवण्यात आले आहेत. ते बदल पुढीलप्रमाणे-

• हिंजवडी वाहतूक कार्यालयाजवळील महावितरणचे डीपी हटवण्याचे निर्देश, जेणेकरून सेवा रस्त्यावरील फ्री लेफ्ट खुला होईल.
• जांभुळकर चौक व इंडियन ऑईल चौकातील सर्कल अर्धवट करण्याचा प्रस्ताव.
• शेल पेट्रोल पंप चौकात विरुद्ध दिशेने वाहतूक बंद.
• माइंडट्री कन्सल्टिंग चौकात वाहतूक उपाययोजनांचा आढावा.
• डॉलर्स कंपनीजवळील नाल्यावरील अतिक्रमण हटवण्याचे आदेश.
• एमआयडीसी सर्कल येथे सुरक्षा कठडे लावून वाहनांची उलटी वाहतूक रोखण्याची कारवाई.
• मेगा पोलीस सर्कल येथे बससाठी स्वतंत्र व्यवस्था.
• माण रस्त्यावरील पांडवनगर येथील अतिक्रमण काढण्यात आले असून उर्वरित अतिक्रमण हटवण्याचे आदेश.

महाराष्ट्रसंबंधित बातम्या वाचण्यासाठी क्लिक करा 

५७ पानी सविस्तर अहवाल सादर

हिंजवडी आयटी पार्क अनक्लोग करा’ मोहिमेअंतर्गत सादर करण्यात आलेल्या ५७ पानी अहवालात नागरिकांच्या सह्या, वाहतूक कोंडीची ठिकाणं आणि उपाययोजना यांचे जिओ-टॅगिंग केलेले आहे. हे सूचक दस्तावेज पोलिस आयुक्त विनय चौबे यांना हिंजवडी पोलिस ठाण्यात सादर करण्यात आले. या मोहिमेमुळे पुढील तीन ते चार महिन्यांत वाहतूक सुरळीत होण्यास मदत होईल, असा विश्वास मोहिमेचे संयोजक सचिन लोंढे यांनी व्यक्त केला.

वाहतूक बदल प्रायोगिक तत्त्वावर

हिंजवडी परिसरात वाहतूक सुरळीत करण्यासाठी काही मार्गांवर एकेरी वाहतूक, वाहतूक वळवण, बॅरिकेड्स बसवणे, आणि चौक सुधारणा यांसारखे बदल एक महिन्याच्या प्रायोगिक तत्त्वावर लागू करण्यात येणार आहेत.