पुणेकरांच्या पिण्याच्या पाण्याची चिंता मिटली; किमान वर्षभर पुरेल इतका साठा उपलब्ध

खडकवासला प्रकल्पातील चार धरणांमध्ये मिळून गतवर्षीच्या आजच्या तारखेला एकूण केवळ १२.९३ टीएमसी इतका पाणी साठा होता. गतवर्षीच्या आजच्या तारखेच्या पाणीसाठ्याचे हे प्रमाण फक्त ४४.३६ टीएमसी इतके होते‌. यंदा त्यात ३४.४१ टक्क्यांची भर पडली आहे. या पार्श्वभूमीवर पुणेकरांची पिण्याच्या पाण्याची चिंता आता मिटली आहे. पुणे शहराला खडकवासला प्रकल्पांतील खडकवासला, टेमघर, पानशेत आणि वरसगाव या चार धरणांमधून पिण्याच्या पाण्याचा पुरवठा केला जातो. या चार धरणांमधील एकूण उपयुक्त पाणीसाठा हा २९.१५ टीएमसी आहे. यापैकी सध्या या धरणांमध्ये सध्या २२.९३ टीएमसी इतका पाणीसाठा उपलब्ध झाला आहे.

जलसंपदा विभागाने पुणे शहराला पिण्यासाठी वर्षाला १४.६१ टीएमसी पाणी कोटा मंजूर केलेला आहे. प्रत्यक्षात एका वर्षाला २०.४९ टीएमसी इतके पाणी पुणेकर वापरत आहेत. यानुसार दरमहा सरासरी दोन टीएमसी पाणी हे पुणेकरांसाठी लागत असते. त्यातच आता उपनगरांमध्ये नागरीकरण मोठ्या प्रमाणावर वाढले असून, जिल्हा परिषदेच्या कार्यक्षेत्रातील आणखी २३ गावे ही महापालिकेत समाविष्ट झाली आहेत.

या पार्श्‍वभूमीवर पुणे शहराला दरमहा दोन टीएमसीहून अधिक पाणी वापरले जात आहे. यानुसार, सध्या उपलब्ध असलेला पाणीसाठा हा आता पुणेकरांना किमान आणखी वर्षभर पुरणार आहे. परंतु आता यंदाचा पावसाळा सुरू झाल्याने, या पाणीसाठ्यात दिवसेंदिवस आणखी वाढच होणार आहे.

खडकवासला प्रकल्पातील पाण्याची स्थिती (टीएमसीमध्ये)

– या प्रकल्पांतील एकूण उपयुक्त पाणीसाठा — २९.१५ टीएमसी

– सध्या उपलब्ध असलेला साठा — २२.९३ टीएमसी

– शहराला मंजूर पाणी कोटा (वार्षिक) — १४.६१ टीएमसी

– प्रत्यक्षात वापरले जाणारे पाणी (वार्षिक) — २०.४९ टीएमसी

– गतवर्षी आजच्या तारखेला उपलब्ध पाणीसाठा — १२.९३ टीएमसी

खडकवासला प्रकल्पांतील धरणनिहाय शिल्लक पाणीसाठा (कंसात टक्केवारी)

– टेमघर — २.७४ टीएमसी (७३.८८ टक्के)

– वरसगाव — १०.७२ (८३.६२ टक्के)

– पानशेत — ८.४० (७८.८९ टक्के)

– खडकवासला — १.१० टीएमसी (५५.५५ टक्के)

– एकूण — २२.९३ टीएमसी ( ७८.७७ टक्के)

संबंधित बातम्या