श्रीमंत दगडूशेठ हलवाई गणपती
श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळातर्फे ट्रस्टच्या १३४ व्या वर्षाच्या गणेशोत्सवानिमित्त हा उपक्रम आयोजित करण्यात आला होता. उत्सव मंडपासमोरील प्रेम मंदिराच्या प्रतिकृतीसमोर झालेल्या या सोहळ्याचे हे ४१ वे वर्ष होते. पावसाचे वातावरण असतानाही मध्यरात्री दोन वाजल्यापासूनच महिलांनी कार्यक्रमासाठी गर्दी करण्यास सुरुवात केली होती. पुण्यासह मुंबई, सातारा, कोल्हापूर, लातूर आदी शहरांतूनही महिला सहभागी झाल्या.
कार्यक्रमाच्या प्रारंभी महिलांनी शंखनाद केला. त्यानंतर ओंकार जप आणि गणेशगीताच्या सादरीकरणाने वातावरण भारावून गेले. सामूहिक अथर्वशीर्ष पठणानंतर ‘मोरया मोरया दगडूशेठ मोरया’चा जयघोष करण्यात आला. दगडूशेठच्या उत्सव मंडपापासून नाना वाड्यापर्यंतच्या परिसरात महिलांची मोठी गर्दी झाली होती. हात उंचावून टाळ्यांचा गजर करीत महिलांनी गणरायाला नमन केले. महाआरतीने सोहळ्याची सांगता झाली.
महापौर मंजुषा नागपुरे, विभागीय आयुक्त शीतल तेली-उगले, ट्रस्टचे अध्यक्ष सुनील रासने, कोषाध्यक्ष महेश सूर्यवंशी यांच्यासह पदाधिकारी व कार्यकर्ते उपस्थित होते. परिमंडळ एकचे पोलीस उपायुक्त कृषिकेश रावले यांचा यावेळी सन्मान करण्यात आला. अर्चना भालेराव आणि प्रा. डॉ. गौरी कुलकर्णी यांनी सूत्रसंचालन केले.
पुण्यात मानाच्या गणपतींचे दिमाखात आगमन
ढोल-ताशांचा गजर, सनई-चौघड्याचे मंगल सूर आणि गणपती बाप्पा मोरयाच्या जयघोषात पुण्यातील मानाच्या गणपतींसह प्रमुख सार्वजनिक गणेश मंडळांच्या श्रींचे सोमवारी थाटात आगमन झाले. आगमन मिरवणुकांनंतर ठरलेल्या वेळेनुसार प्राणप्रतिष्ठापना सोहळे पार पडले. त्यामुळे पुण्याच्या मध्यवर्ती भागात दिवसभर गणेशोत्सवाचा उत्साह पाहायला मिळाला.
पुण्याचे ग्रामदैवत श्री कसबा गणपती यांच्या १३४व्या वर्षाच्या उत्सवाला सकाळी ९ वाजता रास्ता पेठेतील पॉवर हाऊस चौकातून निघालेल्या मिरवणुकीने सुरुवात झाली. प्रभात बँड, ज्ञानप्रबोधिनी, शौर्य आणि संघर्ष पथक सहभागी झाले. सकाळी ११.४५ वाजता वेदमूर्ती देवव्रत महेश रेखे गुरुजी यांच्या हस्ते प्राणप्रतिष्ठापना करण्यात आली.
.png "Videos"){kind=small}
