लोहगाव हवाईतळावरून दररोज सरासरी २४० नागरी विमानांची ये-जा होते, तर वर्षभरात सुमारे ७२ हजार उड्डाणे होतात. याच धावपट्टीवर भारतीय हवाई दलाच्या लढाऊ विमानांचाही नियमित सराव सुरू असतो. पुणे परिसरात सुमारे २०० पक्षीप्रजाती आढळतात. त्यापैकी सुमारे २० प्रजाती विमानांच्या उड्डाण क्षेत्रात नियमित दिसून येतात. मात्र, आकाराने मोठी आणि उंचावर घिरट्या घालणारी घार ही विमान सुरक्षेसाठी सर्वाधिक धोकादायक ठरत असल्याचे हवाई दलाने स्पष्ट केले.
Pune Airport News: पुण्याहून दुबईला जाणाऱ्या स्पाइसजेटच्या विमानाला उशीर; प्रवासी ९ तास खोळंबले
भारतात २०२० ते जून २०२५ या कालावधीत पक्षीधडकेच्या ५ हजार ७४० घटना नोंदविण्यात आल्या आहेत. या घटनांमध्ये ८०४ विमानांचे नुकसान झाले असून, काही प्रकरणांत वैमानिकांनाही गंभीर दुखापती झाल्या आहेत. त्यामुळे पक्षीधडकेचा प्रश्न हा विमान सुरक्षेसमोरील गंभीर आव्हान बनला असल्याचे हवाई दलाच्या अधिकाऱ्यांनी सांगितले.
हवाई दलाचे जनसंपर्क अधिकारी अंकुश चव्हाण यांनी सांगितले की, विमानतळ परिसरातील उघड्यावर टाकला जाणारा कचरा हा घारींसह इतर पक्ष्यांच्या वाढत्या वावरामागील प्रमुख कारण आहे. ही समस्या कायमस्वरूपी सोडविण्यासाठी पुणे महापालिका, जिल्हा प्रशासन आणि संबंधित यंत्रणांसोबत सातत्याने पाठपुरावा सुरू असून, कचरा व्यवस्थापन सुधारण्याची मागणी करण्यात आली आहे. मात्र, अपेक्षित सुधारणा अद्याप झालेली नसल्याचे त्यांनी नमूद केले.
प्रवाशांसाठी खुशखबर! Pune Airport वरून ‘या’ मार्गांवर सुरू होणार उड्डाणे
दरम्यान, विमानतळ परिसर हा प्रतिबंधित क्षेत्र असल्याने येथे ड्रोन उडविण्यास सक्त मनाई करण्यात आली आहे. नियमांचे उल्लंघन करणाऱ्यांविरोधात पोलिसांत तक्रार दाखल करून कारवाई केली जाते. तसेच परिसरात वाढलेल्या कचऱ्यामुळे भटके श्वान आणि त्यांच्या मागावर आलेला बिबट्या काही दिवसांपूर्वी विमानतळ परिसरात दाखल झाल्याची घटनाही घडली होती. त्यामुळे कचरा व्यवस्थापन हा विमान सुरक्षेसह वन्यजीवांच्या वावराच्या दृष्टीनेही अत्यंत महत्त्वाचा विषय बनला आहे.
.png "Videos"){kind=small}
