Pune Ganeshotsav 2026
कसबा गणपती
मानाचा पहिला श्री कसबा गणपती सकाळी ९.३० वाजता मंडईतील लोकमान्य टिळक पुतळ्याजवळ पूजा झाल्यानंतर रजत पालखीतून मिरवणुकीत सहभागी होणार आहे. रमणबाग युवा मंच, परशुराम व रुद्रगर्जना ढोल-ताशा पथकांसह विविध दिंड्या आणि कामायनी प्रशालेतील विशेष मुलांची दिंडी सहभागी होणार आहे. टिळक चौकात दुपारी २.४५ वाजता मिरवणूक पूर्ण होणार आहे.
तांबडी जोगेश्वरी
तांबडी जोगेश्वरी गणपती सकाळी ८ वाजता जोगेश्वरी चौकातून पालखीत विराजमान होऊन मंडईतील मुख्य मिरवणुकीत सहभागी होईल. सतीश आढाव यांचे नगारा वादन, न्यू गंधर्व ब्रास बँड, विघ्नहर्ता, ताल आणि शिवमुद्रा ढोल-ताशा पथके सहभागी होणार आहेत. विष्णूनादचे कार्यकर्ते शंखनाद करणार असून, पारंपरिक वेशातील महिला-पुरुष कार्यकर्ते चांदीची पालखी खांद्यावरून वाहणार आहेत.
गुरुजी तालीम
मानाचा तिसरा श्री गुरुजी तालीम गणपती ‘माता महाकाली’च्या फुलांच्या आकर्षक रथातून मिरवणुकीत सहभागी होणार आहे. सकाळी ९.३० वाजता टिळक पुतळ्यापासून मिरवणुकीला सुरुवात होईल. जयंत नगरकर यांचे नगारावादन, अश्वराज ब्रास बँड, नादब्रह्म, गर्जना आणि शिवगर्जना ढोल-ताशा पथके सहभागी होणार आहेत.
तुळशीबाग गणपती
मानाचा चौथा श्री तुळशीबाग गणपती भव्य विष्णू रथातून मिरवणुकीत सहभागी होणार आहे. १६ फूट रुंद, २२ फूट लांब आणि ३२ फूट उंच रथावर १० फूट उंच विष्णूची मूर्ती आहे. मेट्रो पुलाच्या उंचीमुळे रथाची उंची कमी करण्यासाठी हायड्रॉलिक यंत्रणा वापरण्यात आली आहे. कमळात विराजमान गणराया, जलपरी, गाय, हत्ती, नाग आणि मत्स्य यांच्या फुलांच्या प्रतिकृती रथाचे आकर्षण असतील. लोणकर बंधूंचे नगारा वादन, स्वरूपवर्धिनी, गजलक्ष्मी आणि शिवमुद्रा पथके सहभागी होणार आहेत. सकाळी ९.३० वाजता मिरवणुकीला प्रारंभ होईल.
केसरीवाडा गणपती
मानाचा पाचवा केसरीवाडा गणपती फुलांनी सजविलेल्या पालखीतून मिरवणुकीत सहभागी होणार आहे. टिळक पुतळ्याला पुष्पहार अर्पण करून सकाळी १०.३० वाजता मिरवणुकीला सुरुवात होईल. बिडवे बंधूंचे सनई-चौघडा वादन, श्रीराम, शिवमुद्रा आणि अभेद्य ढोल-ताशा पथके असतील. इतिहासप्रेमी मंडळाचा महात्मा फुले यांच्या जन्मद्विशताब्दी वर्षानिमित्त ‘लोकमान्य टिळक व आगरकर यांचे महात्मा फुले यांनी केलेले स्वागत’ हा जिवंत देखावा साकारण्यात आला आहे. ‘सुजलाम सुफलाम’ रथही सहभागी होणार आहे.
वक्रतुंड रथातून ‘दगडूशेठ’ला निरोप
श्रीमंत दगडूशेठ हलवाई सार्वजनिक गणपती ट्रस्टच्या १३४व्या वर्षाच्या उत्सवाची सांगता मिरवणूक दुपारी ४ वाजता बेलबाग चौकातून सुरू होईल. ‘श्री वक्रतुंड’ रथ वृंदावन येथील प्रेम मंदिराच्या धर्तीवर साकारण्यात आला आहे. १५ बाय १५ फूट आकाराचा आणि २१ फूट उंच रथ आठ नक्षीदार स्तंभांनी सजविला आहे. विष्णू, कुबेर यांच्या प्रतिमा, शिखर, घुमट आणि जाळीदार नक्षीकाम हे आकर्षण ठरणार आहे. मानवसेवा रथासह स्वरूपवर्धिनी, प्रभात बँड, दरबार बँड आणि केरळचे चेंदा मेलम पथक सहभागी होणार आहे.
Pune Metro झाली मालामाल! केवळ 2 दिवसांमध्ये पुणे मेट्रोला ‘इतक्या’ कोटींचा महसूल प्राप्त
भाऊसाहेब रंगारी गणपती
श्रीमंत भाऊसाहेब रंगारी गणपती ट्रस्टच्या गणरायाची सकाळी ७.३० वाजता सुवर्णगणेश धाम येथे पूजा होईल. त्यानंतर ८ वाजता ‘श्री विघ्नहर्ता’ रथातून मंडईतील टिळक पुतळ्याकडे प्रस्थान होईल. येथे मानाच्या पाचही गणपतींना पुष्पहार अर्पण करण्याची परंपरा जपली जाणार आहे. मानाच्या गणपतींचे विसर्जन झाल्यानंतर सायंकाळी ६ वाजता मंडईतून भाऊसाहेब रंगारी गणपतीच्या मिरवणुकीला सुरुवात होईल.
कोणार्कच्या रथातून मंडई गणपती
अखिल मंडई मंडळाच्या १३३व्या वर्षाच्या गणेशोत्सवाची सांगता मिरवणूक सायंकाळी होणार आहे. कोणार्क सूर्य मंदिराच्या वास्तुशैलीवर आधारित ३२ फूट उंच रथातून मंडई गणपती सहभागी होणार आहे. हत्ती, सिंह आणि गणपतीमागील सूर्याची प्रतिकृती रथाचे आकर्षण असेल. विद्युत रोषणाईने सजलेला हा रथ कलादिग्दर्शक विशाल ताजणेकर यांनी साकारला आहे. जयंत नगरकर बंधूंचे नगारावादन, न्यू गंधर्व बँड आणि शिवगर्जना पथकाचा सहभाग राहणार आहे.
.png "Videos"){kind=small}
