अन्नातील भेसळीवर थेट वार! तुकाराम मुंढेंच्या कडक शिस्तीला पुण्याच्या गणेश मंडळांची अनोखी साथ

Ganeshotsav 2026: विशेष म्हणजे बालकलाकारांकडून हा देखावा सादर केला जात आहे. अन्नातील भेसळ कशी ओळखावी, याच्या सोप्या पद्धतीही देखाव्यातून दाखविण्यात आल्या आहेत.

• गणेशोत्सवाच्या देखाव्यांत तुकाराम मुंढेंच्या कार्यशैलीचे प्रतिबिंब
• नियमपालन आणि शिस्तीवर गणेश मंडळांकडून सामाजिक प्रबोधन
• व्यंगचित्रातून करण्यात आले भेसळीवर भाष्य 

पुणे/Tukaram Mundhe: गणरायाच्या चरणी अर्पण होणाऱ्या नैवेद्यापासून ते सार्वजनिक जीवनातील शिस्तीपर्यंत… यंदाच्या गणेशोत्सवात पुण्यातील गणेश मंडळांनी सामाजिक प्रश्नांना देखाव्यांच्या माध्यमातून प्रभावीपणे वाचा फोडली आहे. अन्नातील भेसळीविरोधात सुरू असलेल्या कारवायांच्या पार्श्वभूमीवर अन्न व औषध प्रशासनाचे आयुक्त तुकाराम मुंढे यांची कार्यशैलीही मंडळांच्या देखाव्यांचा विषय ठरली आहे. कुठे व्यंगचित्रातून भेसळीवर भाष्य करण्यात आले आहे, तर कुठे जिवंत देखाव्यातून शिस्त, नियमपालन आणि कर्तव्यनिष्ठेचा संदेश देण्यात आला आहे.

अन्नातील भेसळ रोखण्यासाठी राज्यभर सुरू असलेल्या धडक कारवायांमुळे तुकाराम मुंढे चर्चेत आहेत. नियमांचे उल्लंघन करणाऱ्या हॉटेल्स, दुकाने आणि खाद्य आस्थापनांवर कारवाई करण्यासह नागरिकांनीही अन्नाची गुणवत्ता आणि भेसळ याबाबत जागरूक राहावे, असा संदेश देण्यात येत आहे. याच पार्श्वभूमीवर पुण्यातील काही गणेश मंडळांनी मुंढे यांच्या कार्यशैलीचा संदर्भ घेत सामाजिक प्रबोधनाचे देखावे साकारले आहेत.

देखणे हे रूप दिसे! ‘श्रीमंतां’च्या दर्शनासाठी गर्दीचा महापूर; पुण्यनगरीत भविकांचा उत्साह

‘सुरक्षित अन्न आणि सुरक्षित नागरिक’

मॉडेल कॉलनीतील अजिंक्य महाराष्ट्र मित्रमंडळाने ‘सुरक्षित अन्न आणि सुरक्षित नागरिक’ हा विषय घेऊन जिवंत देखावा साकारला आहे. अन्नातील भेसळ रोखणे, नागरिकांना सुरक्षित अन्न मिळणे आणि नियमांची काटेकोर अंमलबजावणी यावर देखाव्यातून भाष्य करण्यात आले आहे. तुकाराम मुंढे यांच्या कार्यशैलीचा संदर्भ घेत शिस्त, जबाबदारी आणि प्रामाणिकपणाचा संदेश देण्यात आला आहे.

विशेष म्हणजे बालकलाकारांकडून हा देखावा सादर केला जात आहे. अन्नातील भेसळ कशी ओळखावी, याच्या सोप्या पद्धतीही देखाव्यातून दाखविण्यात आल्या आहेत. तसेच नागरिकांसाठी माहिती पुस्तिकेचे वाटप करण्यात येत आहे, अशी माहिती मंडळाचे संचालक उमेश शेवते यांनी दिली.

व्यंगचित्रांतून मुंढेंच्या कार्यशैलीला सलाम 
बुधवार पेठेतील वीर हनुमान मित्रमंडळाने तुकाराम मुंढे यांच्या कार्याचा संदर्भ घेत अन्नातील भेसळीविरोधात जनजागृती करणारा देखावा साकारला आहे. भ्रष्टाचारमुक्त आणि निःस्वार्थपणे काम करणाऱ्या अधिकाऱ्याच्या पाठीशी समाजाने उभे राहावे, हा संदेश या देखाव्यातून देण्यात आला आहे.

पौरणिक देखाव्यांपासून…! पुण्यात गणेशोत्सवाचा अनोखा उत्साह; संध्याकाळी पेठांमध्ये अलोट जनसागर

व्यंगचित्रे आणि स्केचच्या माध्यमातून ही संकल्पना मांडण्यात आली आहे. विशेष आकर्षण म्हणजे तुकाराम मुंढे हातात भिंग घेऊन गणरायाला अर्पण करण्यात येणाऱ्या मोदकाची तपासणी करताना दाखविण्यात आले आहेत. देवाला अर्पण केल्या जाणाऱ्या नैवेद्यातही भेसळ होऊ नये, याबाबत जनजागृती करण्याचा प्रयत्न असल्याचे मंडळाचे अध्यक्ष आनंद सागरे यांनी सांगितले. गणेशोत्सवाच्या निमित्ताने केवळ धार्मिक किंवा मनोरंजनात्मक देखाव्यांऐवजी सामाजिक प्रश्नांवर भाष्य करणारे विषय मंडळांकडून मांडले जात असल्याने यंदाच्या उत्सवातील प्रबोधनाची बाजूही ठळक झाली आहे.