शनिवार, 19 सप्टेंबर 2026
दिवसभराच्या कामकाजानंतर कुटुंबासह गणपती दर्शनासाठी बाहेर पडलेल्या नागरिकांची संख्या रात्री वाढत गेली. प्रमुख गणेश मंडळांच्या ठिकाणी दर्शनासाठी रांगा लागल्या होत्या. मंडळांच्या आकर्षक सजावटी, विद्युत रोषणाई आणि जिवंत देखावे पाहण्यासाठीही नागरिकांची मोठी गर्दी झाली होती. त्यामुळे दर्शनासोबतच गणेशोत्सवाचा उत्साह अनुभवण्यासाठी भाविकांची पावले मध्यवर्ती भागाकडे वळत होती.
पौरणिक देखाव्यांपासून…! पुण्यात गणेशोत्सवाचा अनोखा उत्साह; संध्याकाळी पेठांमध्ये अलोट जनसागर
भाविकांची वाढती संख्या आणि वाहनांची वर्दळ यामुळे लक्ष्मी रस्ता, मंडई परिसरासह विविध मार्गांवर वाहतूक कोंडी झाली. अनेक नागरिकांनी खासगी वाहनांऐवजी मेट्रोचा पर्याय स्वीकारला. त्यामुळे मंडई मेट्रो स्थानकासह मार्गावरील स्थानकांवरही भाविकांची वर्दळ वाढली होती. मेट्रो स्थानकातून बाहेर पडल्यानंतर नागरिकांचे समूह प्रमुख गणेश मंडळांच्या दिशेने पायी जाताना दिसत होते.
कसबा, तांबडी जोगेश्वरी, गुरुजी तालीम, तुळशीबाग आणि केसरीवाडा या मानाच्या गणपतींच्या दर्शनासाठीही भाविकांनी गर्दी केली होती. मंडई, लक्ष्मी रस्ता, बुधवार पेठ आणि परिसरातील रस्त्यांवर भाविकांचे समूह दिसत होते. देखावे आणि रोषणाई पाहण्यासाठी ठिकठिकाणी नागरिक थांबत असल्याने गर्दीत आणखी भर पडत होती.
रस्त्यांवर भाविकांची गर्दी, ठिकठिकाणी पोलिसांचा बंदोबस्त, खाद्यपदार्थांच्या स्टॉलभोवतीची लगबग आणि गणेश मंडळांची आकर्षक रोषणाई यामुळे मध्यवर्ती पुणे रात्री उशिरापर्यंत उत्साहाने फुलून गेले होते. गर्दी आणि वाहतूक कोंडीचा त्रास होत असतानाही बाप्पांच्या दर्शनाचा उत्साह भाविकांमध्ये कायम असल्याचे चित्र होते.
‘बाप्पा, तू माझ्याच हातांनी घडलास!’; गणेशमूर्ती कार्यशाळांमध्ये अनुभवायला मिळतोय भक्तीचा खरा आनंद
लक्ष्मी रस्ता – गणेश मंडळांचे देखावे व रोषणाई पाहण्यासाठी मोठी वर्दळ
मंडई परिसर – भाविकांची सतत ये-जा आणि मेट्रोमुळे वाढलेली गर्दी
बुधवार पेठ – प्रमुख मंडळांकडे जाणाऱ्या भाविकांची गर्दी
शनिवारवाडा परिसर – गणेशोत्सवाचा माहोल अनुभवण्यासाठी नागरिकांची वर्दळ
मानाचे गणपती – कसबा, तांबडी जोगेश्वरी, गुरुजी तालीम, तुळशीबाग आणि केसरीवाडा येथे दर्शनासाठी भाविकांची गर्दी
