उत्तर प्रदेशात मुसळधार पावसाचा हाहा:कार; तीव्र वादळामुळे 62 जणांचा मृत्यू, अनेक जिल्ह्यांत वीजपुरवठा ठप्प
पुण्यातील सर्वात गजबजलेल्या जंगली महाराज रस्ता (JM Road) परिसरात पावसाने सर्वाधिक धुमाकूळ घातला. येथील रस्ते पूर्णपणे पाण्याखाली गेले असून, रस्त्याच्या कडेला पार्क केलेल्या अनेक दुचाकी आणि चारचाकी गाड्या निम्म्याहून अधिक पाण्यात बुडाल्याचे पाहायला मिळाले. अचानक आलेल्या या पावसामुळे वाहनचालकांची मोठी धांदल उडाली आणि अनेक वाहने रस्त्यातच बंद पडल्याने वाहतूक कोंडीची समस्या निर्माण झाली.
हवामान विभागाने (IMD) आधीच 31 मार्च ते 2 एप्रिल दरम्यान महाराष्ट्रात अवकाळी पावसाची शक्यता वर्तवली होती. त्यानुसार, सकाळी कडक ऊन आणि दुपारी अचानक पाऊस असे चित्र पाहायला मिळत आहे. अरबी समुद्रातून येणारे बाष्प आणि वातावरणाच्या खालच्या स्तरात निर्माण झालेली अस्थिरता ही या अवकाळी पावसाची मुख्य कारणे असल्याचे हवामान तज्ज्ञांनी सांगितले आहे.
पुण्यासह जिल्ह्याच्या काही भागात गारपीट देखील झाली आहे. या पावसामुळे तापमानात अचानक घट झाल्याने नागरिकांना वाढत्या उष्णतेपासून तात्पुरता दिलासा मिळाला असला, तरी महापालिकेच्या पावसापूर्व नियोजनाचे वाभाडे निघाले आहेत. ठिकठिकाणी साचलेल्या पाण्यामुळे पादचाऱ्यांना आणि वाहनचालकांना प्रचंड मनस्ताप सहन करावा लागत आहे.
सखल भागांत पाणी साचल्याने पुणे-मुंबई महामार्ग आणि शहरातील अंतर्गत रस्त्यांवर वाहतुकीचा वेग मंदावला. तसेच, पेठ परिसर, कोथरूड आणि शिवाजीनगर भागात गुडघाभर पाणी साचल्याने नागरिक घरातच अडकून पडले. अनेक सोसायट्यांमध्ये आणि व्यावसायिक परिसरात खबरदारीचा उपाय म्हणून वीजपुरवठा काही काळ बंद ठेवण्यात आला होता.
सध्या पुण्याच्या आकाशात ढगांची दाटी कायम असून, येणाऱ्या काही तासांत पुन्हा मुसळधार पावसाची शक्यता वर्तवण्यात आली आहे. हवामान विभागाने नागरिकांना विनाकारण घराबाहेर न पडण्याचे आणि झाडाखाली आश्रय न घेण्याचे आवाहन केले आहे. तसेच, सखल भागातील रहिवाशांना सतर्क राहण्याच्या सूचना प्रशासनाकडून देण्यात आल्या आहेत.
.png "Videos"){kind=small}
