राज्यात पावसाचा मुक्काम आणखी वाढणार; पुढील काही दिवस वादळी वाऱ्यासह पावसाची शक्यता

नैऋत्य मोसमी पावसाने परतीचा प्रवास सुरू केला आहे. उत्तर-पश्चिम भारतातील काही भागांत सप्टेंबरअखेरपासून हवामान कोरडे होण्याची शक्यता आहे. मात्र, सक्रिय हवामान प्रणालींमुळे देशाच्या विविध भागांत पावसाचा जोर अधूनमधून कायम राहणार आहे.

पुणे : सध्या वातावरणात बदल होताना दिसत आहे. नैऋत्य मोसमी पावसाचा परतीचा प्रवास सुरू झाला असला तरी देशातील पावसाचा जोर अद्याप ओसरलेला नाही. देशभरात सध्या पाच चक्रीवादळीय परिसंचरण प्रणाली सक्रिय असून, त्यांच्या प्रभावामुळे अनेक राज्यांमध्ये पुढील काही दिवस पाऊस आणि वादळी वाऱ्यांची शक्यता आहे. काही भागांत ताशी ५० ते ६० किलोमीटर वेगाने वारे वाहण्याचा इशारा हवामान विभागाने दिला आहे.

केरळ, तमिळनाडू, रायलसीमा, किनारी आंध्र प्रदेश आणि कर्नाटकात पुढील काही दिवस पावसाची शक्यता आहे. काही ठिकाणी जोरदार पावसासह मेघगर्जना आणि विजांचा कडकडाट होण्याची शक्यता आहे. आसाम, मेघालय, नागालँड, मणिपूर, मिझोराम आणि त्रिपुरात जोरदार पाऊस पडण्याची शक्यता आहे. काही भागांत ताशी ४० ते ५० किलोमीटर वेगाने वारे वाहू शकतात. तसेच कोकण, गोवा, मध्य महाराष्ट्र, मराठवाडा आणि गुजरातमध्ये २९ सप्टेंबर ते १ ऑक्टोबरदरम्यान काही ठिकाणी हलका ते तुरळक पाऊस होण्याचा अंदाज आहे. त्यामुळे राज्यातील काही भागांत पावसाची हजेरी कायम राहण्याची शक्यता आहे.

दरम्यान, नैऋत्य मोसमी पावसाने परतीचा प्रवास सुरू केला आहे. उत्तर-पश्चिम भारतातील काही भागांत सप्टेंबरअखेरपासून हवामान कोरडे होण्याची शक्यता आहे. मात्र, सक्रिय हवामान प्रणालींमुळे देशाच्या विविध भागांत पावसाचा जोर अधूनमधून कायम राहणार आहे.

उत्तर भारतात पश्चिमी वाऱ्यांचा प्रभाव

उत्तर भारतात पश्चिमी वाऱ्यांचा प्रभाव असून, त्यामुळे जम्मू आणि काश्मीरपासून उत्तराखंडपर्यंतच्या पर्वतीय प्रदेशात हिमवृष्टी आणि मैदानी प्रदेशात मुसळधार पाऊस पडत आहे. तापमानात 10 अंशांची घट झाली आहे. भूस्खलनामुळे केदारनाथ यात्रा सलग दुसऱ्या दिवशी स्थगित करण्यात आली आहे. सध्या देशातील 9 राज्यांमध्ये मेघगर्जनेसह मुसळधार पावसाचा अंदाज व्यक्त करण्यात आला आहे.

नऊ राज्यांमध्ये मेघगर्जनेसह पावसाची शक्यता

वायव्य भागासह पूर्व भारतातील नऊपेक्षा जास्त राज्यांमध्ये मंगळवारी मेघगर्जनेसह पाऊस आणि वादळी पावसाची शक्यता आहे. बुधवारपासून दिलासा मिळण्याची शक्यता आहे, परंतु आर्द्रता वाढू शकते. जम्मू आणि काश्मीर, लडाख, उत्तराखंड, हिमाचल प्रदेश, पंजाब, हरियाणा, उत्तर प्रदेश, दिल्ली आणि राजस्थान या भागांमध्ये मुसळधार पावसाचा अंदाज व्यक्त करण्यात आला आहे.

Weather Update : देशातील 9 राज्यांमध्ये मेघगर्जनेसह मुसळधार पावसाचा अंदाज; तापमानातही झाली घट