स्मार्ट सोलापूर सिटीवर Dirty चा लागला डाग! अंदाज समितीचा अंदाज; १२७० मीटर रस्त्यावर १५ कोटींचा खर्च
शासनाच्या विविध विकासकामांची प्रत्यक्ष पाहणी करण्यासाठी सोलापूर दौऱ्यावर आलेल्या विधिमंडळ अंदाज समितीने शुक्रवारी शहरासह जिल्ह्यातील विविध कामांची पाहणी केली. अस्वच्छता, निकृष्ट कामे आणि निधीच्या वापराबाबत समितीने तीव्र नाराजी व्यक्त करत अधिकाऱ्यांना जाब विचारला. केंद्राच्या स्मार्ट सिटी योजनेत असलेल्या सोलापूरवर तडर्टी सिटीचा डाग समितीने आक्षेपातून टाकला. अवघ्या १२७० मीटर रस्त्यासाठी तब्बल १५ कोटी रुपये खर्च झाल्याने समितीच्या सदस्यांनी आश्चर्य व्यक्त केले.(फोटो सौजन्य – AI)
आ. अर्जुन खोतकर यांच्या अध्यक्षतेखाली समितीने रस्ते, जलसंधारण, घनकचरा व्यवस्थापन, नदीपात्र, महापालिका तसेच विविध विकासकामांची पाहणी केली. सिद्धेश्वर कारखानामार्गे कुंभारी रस्त्याची पाहणी करताना अल्पावधीतच रस्ता खराब झाल्याचे निदर्शनास आले. त्यानंतर हैद्राबाद रोड ते मुळेगाव या केवळ १२७० मीटर रस्त्यासाठी १५ कोटी रुपये खर्च झाल्याचे समोर आल्याने सार्वजनिक बांधकाम विभागाकडून खर्चाचा सविस्तर तपशील मागविण्यात आला. विडी घरकुल वसाहतीच्या पाहणीत घनकचरा व सांडपाण्याची विल्हेवाट होत नसल्याचे आढळले. त्यामुळे स्वच्छतेवर समितीने तीव्र ताशेरे ओढले. सांडपाणी, कचरा व्यवस्थापन आणि त्यावरील खर्चाची माहितीही मागविण्यात आली. वाढीव एफएसआयच्या माध्यमातून बांधकामांना परवानगी दिल्यानंतर इमारतींच्या सुरक्षिततेची जबाबदारी कोणाची, असा सवालही समितीने उपस्थित केला.
आषाढी वारीसाठी ६५ एकर परिसरात दरवषीं हायमास्ट दिवे उभारण्यासाठी लाखो रुपये खर्च होतात. मग मागील वर्षीचे दिवे पुढील वर्षीं का वापरले जात नाहीत? असा सवाल समितीने उपस्थित केला. याबाबतचा खर्च व उपलब्ध साहित्याचा तपशील मागविण्यात आला.इब्राहिमपूर तलावासाठी दोन कोटी रुपये खर्च होऊनही पाणी येत नसल्याची तक्रार करण्यात आली. चुकीच्या बाजूला बांध घातल्याचा मुद्दाही समोर आला. निमगाव अंगणवाडीची दुरवस्था तसेच कोन्हाळी आश्रमशाळेतील निकृष्ट सुविधांवरही समितीने नाराजी व्यक्त करून संबंधित विभागांकडून खुलासा मागविला.
महापालिकेच्या मागील पाच वर्षांतील कॅग लेखापरीक्षण अहवाल तसेच मागील दोन वर्षाच्या अर्थसंकल्पाच्या प्रती समितीने मागवल्या आहेत. शनिवारी महापालिका अधिका-यांसोबत बैठक घेऊन विकासकामे, निधीचा वापर व लेखापरीक्षणातील मुद्दधांचा आढावा घेतला जाणार आहे. जिल्ह्यातील कामांच्या पाहणीसाठी तीन पथके असून प्रत्येक पथकात चार ते पाच आमदारांचा समावेश आहे. बाळे परिसरातील आदिला नदीची पाहणी करताना नदीच्या नैसर्गिक स्वरूपाशी छेडछाड करू नये, अशा स्पष्ट सूचना समितीने महापालिका प्रशासनाला दिल्या.
.png "Videos"){kind=small}
