विद्यार्थीनीच्या मृत्यूप्रकरणी मुख्याध्यापकावर निलंबनाची कारवाई; भंडाऱ्यातील घटना

भंडाऱ्याच्या जिल्हा परिषद शाळेत एका ६ वर्षीय विद्यार्थीनीचा विजेचा धक्का लागून मृत्यू झाला होता. काल ही घटना घडली होती. या घटनेची गंभीर दखल घेत आता शाळेच्या मुख्याध्यापकांवर निलंबनाची कारवाई करण्यात आली आहे.

भंडाऱ्याच्या जिल्हा परिषद शाळेत एका ६ वर्षीय विद्यार्थीनीचा विजेचा धक्का लागून मृत्यू झाल्याची घटना घडली होती. यशस्वी सोपान राऊत (वय ६ वर्ष) असं या विद्यार्थीनीचं नाव असून ती पुयार गावातील रहिवासी होती. बुधवारी सकाळच्या सुमारास ही घटना घडली होती. या घटनेमुळे सर्वत्र संताप व्यक्त केला जात होता. या घटनेची पोलिसांकडून चौकशी सुरु होती. मात्र आता याप्रकणी शाळेच्या मुख्याध्यापकांवर निलंबनाची कारवाई करण्यात आली आहे.

भंडारा जिल्ह्यातील लाखांदूर तालुक्यातील पुयार येथे जिल्हा परिषदेची प्राथमिक शाळा आहे. या शाळेत यशस्वी सोपान राऊत शिक्षण घेत होती. ती पहिल्या वर्गात शिकत होती. ही शाळा भंडारा जिल्ह्याच्या लाखांदूर पंचायत समिती अंतर्गत येते. बुधवारी सकाळी १० वाजता यशस्वी नहमीप्रमाणे शाळेत आली होती. त्यानंतर ती शाळेतील स्वच्छतागृहात गेली. यावेळी तिला विजेचा धक्का लागून ती बेशुध्द पडली. या घटनेमुळे शाळेत प्रचंड गोंधळ निर्माण झाला होता. या घटनेची माहिती मिळताच शिक्षकांनी यशस्वीला तात्काळ रुग्णालयात दाखल केले. मात्र डॉक्टरांनी तिला मृत घोषित केले. या घटनेमुळे गावात संतापाची लाट उसळली होती.

या घटनेची माहिती मिळताच पोलीस घटनास्थळी दाखल झाले. पोलिसांनी या प्रकरणाची चौकशी केल्यानंतर सॅनिटरी पॅड डिस्पोज करणाऱ्या मशिनचा विद्युत पुरवठा सदोष होता, अशी प्राथमिक माहिती समोर आली. याच मशिनचा शॉक लागून यशस्वीचा मृत्यू झाल्याची माहिती समोर आली आहे. या प्रकरणी कारवाई करत आज शाळेच्या मुख्याध्यापकांच निलंबन करण्यात आलं आहे.

सोमवारी भंडाऱ्यातील जिल्हा परिषदेची प्राथमिक शाळा सुरु झाली होती. शाळा सुरु झाल्यानंतर अवघ्या तिसऱ्याच दिवशी विजेचा धक्का लागून यशस्वीचा मृत्यू झाला. या घटनेमुळे सर्वत्र हळहळ व्यक्त केली जात आहे. या प्रकाराबद्दल गावकऱ्यांकडून संताप व्यक्त होत आहे. या घटनेची माहिती मिळताच यशस्वीच्या कुटूंबियांनी आक्रोश केला.