ठाणेकरांनो पाणी जपून वापरा! बुधवारी शहरातील 'या' भागात पाणी पुरवठा राहणार बंद
ठाणे/ स्नेहा जाधव, काकडे : ठाणे महानगरपालिकेच्या स्वत:च्या पाणी पुरवठा योजनेतील पिसे उदंचन केंद्र व टेमघर जलशुद्धीकरण केंद्र येथील उच्च दाब उप केंद्रातील पावसाळापूर्व आवश्यक देखभाल-दुरुस्ती, कंट्रोल पॅनलची दुरुस्ती, ट्रान्सफॉर्मर ऑईल फिल्ट्रेशन आदी अत्यावश्यक कामे करण्यात येणार आहेत. त्यामुळे, बुधवार सकाळी 9 वाजल्यापासून रात्री 9 वाजेपर्यंत एकूण 12 तासांसाठी पाणी पुरवठा बंद राहणार आहे.
परिणामी, ठाणे महानगरपालिका क्षेत्रात, घोडबंदर रोड, वर्तक नगर, ऋतू पार्क, जेल, गांधी नगर, रुस्तमजी, सिद्धांचल, समता नगर, इंटरनिटी, जॉन्सन व कळव्याचा काही भाग येथील पाणी पुरवठा 12 तासांसाठी पूर्णपणे बंद राहील. त्याचबरोबर, पाणी पुरवठा सुरू झाल्यानंतर पुढील1 ते 2 दिवस कमी दाबाने पाणी पुरवठा होईल, याची कृपया नागरीकांनी नोंद घ्यावी. या पाणी कपातीच्या कालावधीत, आवश्यक पाणी साठा करून ते पाणी काटकसरीने वापरुन सहकार्य करावे, असे आवाहन ठाणे महापालिकेतर्फे करण्यात आले आहे.
एकीकडे शहरात पाणीपुरवठा काही तासांसाठी खंडीत केला जात आहे तर दुसरीकडे घोडबंदर मुख्य रस्त्यालगत असलेली जल वाहिनी फुटल्याने लाखो लीटर पाणी वाया गेले आहे. ठाण्यातील घोडबंदर रोडवरील आर मॉलच्या शेजारील मुख्य रस्त्याच्या कडेला असलेल्या जलवाहिनी (पाईपलाइन) मधून पाणी वाया जात आहे.
गंभीर बाब म्हणजे जलवाहिनी फुटल्यानंतर दोन तास पालिकेचे कर्मचारी घटनास्थळी पोहोचले नाही. संबंधित विभागाचे कोणतेही अधिकारी अथवा कर्मचारी न आल्याने नागरिकांनी संताप व्यक्त केला आहे. सध्या ठाण्यात पाण्याची टंचाई भासत आहे अनेक भागांमध्ये नागरिकांना पाणी मिळण्यासाठी तासनतास वाट पाहावी लागत आहे. अशा परिस्थितीत लाखो लिटर पाण्याचा अपव्यय होणे अत्यंत गंभीर बाब आहे, अशा शब्दात नागरिकांनी पालिकेच्या अधिकाऱ्यांवर तीव्र नाराजी व्यक्त केली आहे.
.png "Videos"){kind=small}
