बारामती: संपूर्ण महाराष्ट्रातच नव्हे तर देशात आधुनिक स्वरूपातील उभारण्यात आलेले महाराष्ट्र राज्य परिवहन महामंडळाचे बारामती बसस्थानक गुरूवारपासून (दि ७)प्रवाशांच्या सेवेत रुजू झाले. वास्तुशास्त्राचा सर्वोत्कृष्ट नमुना असलेल्या बारामती बस स्थानकाची इमारत एखाद्या विमानतळाप्रमाणे आकर्षक व देखणी झाली असून ही इमारत पाहण्यासाठी प्रवाशांसह नागरिकही मोठी गर्दी करत आहेत. या बस स्थानकातील कामकाजाला गुरुवारी सकाळी सुरुवात झाली.
सुमारे ५० कोटी रुपये खर्चुन हे बसस्थानक उभारण्यात आले असून या बसस्थानकाचे उद्घाटन राज्याचे मुख्यमंत्री एकनाथ शिंदे यांच्या हस्ते व उपमुख्यमंत्री देवेंद्र फडणवीस व अजित पवार यांच्या प्रमुख उपस्थितीत नुकतेच करण्यात आले आहे. गेल्या अनेक दिवसांपासून या अत्याधुनिक बस स्थानकाची प्रतीक्षा बारामतीकरांना होती. अधिकृतरित्या या बस स्थानकाचे कामकाज आजपासून सुरू झाल्याने प्रवाशांसह राज्य परिवहन महामंडळाच्या कर्मचाऱ्यांनी समाधान व्यक्त केले.
या बसस्थानकाचा संपूर्ण परिसर सुंदर आणि कल्पकतेने उभारला आहे. जागेचे एकूण क्षेत्रफळ २४ हजार ७४८ चौ.मी. आहे. यामध्ये तळमजला व पहिल्या मजल्यावर बस स्थानक कार्यालय, तळमजल्यावर आगार आणि पार्सल कक्ष असे बांधकाम करण्यात आलेले आहे. बसेस उभे राहण्यासाठी २२ फलाट उभारण्यात आले असून तळमजल्यावर २२ दुकाने आणि पहिल्या मजल्यावर २१ कार्यालये, १२३ आसनी परिसंवाद कक्ष, ३६ आसनी बैठक व्यवस्था आणि ३२ आसनी शयनकक्ष आहेत.
या बसस्थानकात ६५ बस, ४७ चारचाकी, ४० ॲटोरिक्षा आणि ११७ दुचाकी वाहनाकरीता वाहनतळाची निर्मिती करण्यात येत आहे. परिसराचे बाह्य सुशोभिकरण,फर्निचर तसेच प्रवाशांकरीता सूचना व दिशादर्शक फलक बसविण्यात येत आहे. बारामती शहराच्या वैभवात या बसस्थानकामुळे भर पडली आहे.
एकाच वेळेस २२ फलाटांवर बसेस उभ्या राहू शकतील, अशी व्यवस्था करण्यात आली आहे. प्रवाशांना प्रतिक्षेसाठी प्रत्येक फलाटाच्या बाजूला बैठक व्यवस्था देण्यात आली असून अतिशय प्रशस्त स्वच्छतागृहांचीही सुविधा देण्यात आली आहे. महिलांसाठी हिरकणी कक्ष स्थापन करण्यात आला असून दुचाकी व चार चाकी वाहनांच्या पार्किंगसाठी सुविधा देण्यात आली आहे.बसस्थानकाच्या वरील बाजूस एसटी बँकेस जागा देण्यात आली असून दोनशे आसनक्षमतेचा एक मोठा व ५० आसनक्षमतेचा एक छोटा असे दोन मिटींग हॉल करण्यात आले आहेत. वरिष्ठ अधिका-यांच्या वास्तव्यासाठी दोन सुसज्ज सूट तयार करण्यात आले आहेत. चालक व वाहकांच्या विश्रांतीसाठी सुविधा उपलब्ध करुन देण्यात आली आहे. एक ओपन व अंतर्गत असे सुंदर उपहारगृह तयार करण्यात आले असून व्यावसायिक गाळेही येथे तयार करण्यात आले आहेत. बस स्थानकाच्या संपूर्ण परिसरामध्ये सीसीटीव्ही कॅमेरे बसविण्यात आले असून २४ तास या बस स्थानकात पोलीस बंदोबस्त तैनात राहणार आहे. बंदोबस्तासाठी असणाऱ्या पोलिसांना देखील कक्षाची सोय करण्यात आली आहे.
बारामतीच्या बसस्थानकावरुन गुरुवारपासून अधिकृतपणे एसटीची वाहतूक सुरु झाली. पहिल्या दिवशी प्रवाशांनी या बसस्थानकाच्या आधुनिक रचनेचे कौतुक केले. उपमुख्यमंत्री अजित पवार यांच्या संकल्पनेतून व प्रयत्नातून हे अत्याधुनिक बस स्थानक उभे राहिले असून या बस स्थानकात तरुण वर्गासह अबाल वृद्ध देखील आवर्जून सेल्फी काढत आहेत. या आधुनिक बस स्थानकाच्या निर्मितीचे श्रेय उपमुख्यमंत्री अजित पवार यांना दिले जाते. या बस स्थानकाच्या पायाभरणीपासून उपमुख्यमंत्री पवार यांनी वारंवार कामाची पाहणी करून ठेकेदारांना विविध सूचना दिल्या आहेत. त्यांच्या सूचनेनुसार या बस स्थानकाच्या आधुनिक इमारतीमध्ये रचना करण्यात आली आहे. महाराष्ट्रासह देशात पहिलेच आधुनिक बस स्थानक बारामती मध्ये निर्माण झाल्याने हे व स्थानक संपूर्ण देशात आयडॉल ठरणार आहे.
.png "Videos"){kind=small}
