भाजपमधील निष्ठावंत कार्यकर्त्यांचे आत्मक्लेश आंदोलन; ‘या’ भागात अस्वस्थता उफाळली

अनेक नेत्यांनी भाजपमध्ये प्रवेश केल्याने पक्षाची संघटनात्मक ताकद वाढल्याचे चित्र असले, तरी याच पार्श्वभूमीवर निष्ठावंत कार्यकर्त्यांमध्ये तीव्र अस्वस्थता निर्माण झाली आहे.

• भाजपमधील निष्ठावंत कार्यकर्त्यांचे आंदोलन
• पिंपरी-चिंचवडमध्ये अस्वस्थता उफाळली
• कार्यकर्त्यांनी उघडपणे नाराजी केली व्यक्त

पिंपरी : आगामी महापालिका निवडणुकीसाठी सर्व राजकीय पक्षांची जोरदार तयारी सुरु आहे. अनेक नेते कार्यकर्त्यांचे पक्षप्रवेसही पार पडत आहेत. भाजपमध्ये प्रवेश करणाऱ्या नेत्यांची संख्या वाढली आहे. पिंपरी-चिंचवड शहरात गेल्या काही दिवसांत विविध पक्षांतील आजी-माजी नगरसेवक, पदाधिकारी आणि नेत्यांनी भाजपमध्ये प्रवेश केल्याने पक्षाची संघटनात्मक ताकद वाढल्याचे चित्र असले, तरी याच पार्श्वभूमीवर निष्ठावंत कार्यकर्त्यांमध्ये तीव्र अस्वस्थता निर्माण झाली आहे. या नाराजीचा स्फोट गुरुवारी थेट आंदोलनाच्या रूपाने समोर आला.

माजी उपमहापौर राजू मिसाळ आणि अमित गावडे यांच्या भाजप प्रवेशामुळे निगडी–आकुर्डी परिसरातील जुने, निष्ठावंत आणि इच्छुक कार्यकर्त्यांची उमेदवारी धोक्यात येण्याची शक्यता निर्माण झाली आहे. आयात नेत्यांना उमेदवारीत प्राधान्य दिले जाणार, या भीतीतून निष्ठावंत कार्यकर्त्यांनी उघडपणे आपली नाराजी व्यक्त केली.

भक्ती-शक्ती चौकात भाजपच्या निष्ठावंत कार्यकर्त्यांनी पक्षशिस्त मोडत आत्मक्लेश आंदोलन केले. पक्ष नेतृत्वाने ‘आयाराम’ उमेदवारांना प्राधान्य देऊ नये, तसेच अनेक वर्षे पक्षासाठी काम करणाऱ्या निष्ठावंत कार्यकर्त्यांवर अन्याय करू नये, अशी ठाम मागणी आंदोलनकर्त्यांनी केली. या आंदोलनात माजी महापौर आर. एस. कुमार, विजय सिनकर, समीर जावळकर, सलीम शिकलगार, अरुण थोरात, अतुल इमानदार यांच्यासह अनेक कार्यकर्ते सहभागी झाले होते. “पक्ष वाढवण्यासाठी रस्त्यावर उतरून काम करणाऱ्या कार्यकर्त्यांनाच डावलले जात असेल, तर हा अन्याय आहे,” अशा जोरदार घोषणा देत आंदोलनकर्त्यांनी थेट एल्गार करण्याची भूमिका घेतली.