Nitesh Karale
महाविकास आघाडीतर्फे विद्यमान आ. अभिजित वंजारी (काँग्रेस) यांना उमेदवारी घोषित झाल्यावर राष्ट्रवादी (श. प.) पक्षाचे इच्छुक कराळे यांनी बंडाचा झेंडा हाती घेत उमेदवारी दाखल केली. सर्व विश्लेषकांनी त्यांना १० हजारांपेक्षा अधिक मते मिळणार नाहीत, अशी भाकित केले. मात्र, कोणतीही संघटन शक्ती सोबत नसताना त्यांनी सर्वांचे भाकित खोटे ठरविले. त्यांनी भरीव मते घेत दोन्ही प्रमुख पक्षांच्या उमेदवारांना विजयासाठी ताटकळत ठेवले.
कराळे हे २०२० ला झालेल्या नागपूर पदवीधर मतदारसंघाच्या निवडणुकीत अपक्ष उमेदवार म्हणून लढले होते. त्यावेळी ते कोणत्याही राजकीय पक्षात नव्हते. त्या निवडणुकीत त्यांनी ७ हजारांपेक्षा अधिक मते घेतली. यावेळी पुन्हा अपक्ष लढताना त्यांनी मागील मतांमध्ये तब्बल १७ हजारांवर मतांची भर घातली.
या निवडणुकीकरिता मतदान होण्याच्या काही तासांपूर्वी त्यांना राष्ट्रवादी (श. प.) पक्षाने ६ वर्षांसाठी निलंबित केले. त्यानंतर ‘हाय होल्टेज ड्रामा’ झाला. कराळे माध्यमांसमोर पक्षाने ऐनवेळी केलेल्या कारवाईने दुखी होत ओक्साबोक्सी रडले. पक्षासाठी आणि महाविकास आघाडीसाठीही लोकसभा, विधानसभा, महापालिका, नगरपालिका निवडणुकीत विक्रमी सभा घेतल्या.
सरकार, सत्ताधारी पक्ष व नेत्यांवर शाब्दिक हल्ले चढविले आणि हा सर्व महाराष्ट्रभरातील प्रचारसभांचा प्रवास स्वखर्चातून केल्याची मांडणी त्यांनी केली. पक्षाचे सर्वेसर्वा शरद पवार यांच्याविषयी आदर व्यक्त करतानाच त्यांनी पक्षाने केलेल्या कारवाईने दुखावल्या गेलो, असे सांगत ऐन मतदानापूर्वी केलेल्या या कारवाईवर प्रश्नचिन्ह उपस्थित केले.
कराळे यांचे मूळ गाव मांडवा होय. वडील शेतकरी. कष्टातून उच्च शिक्षण घेत त्यांनी खाजगी शिकवणी वर्गातील अध्यापनातून विद्यार्थ्यांमध्ये लोकप्रियता मिळविली. कराळे मास्तर अशी ओळख सर्वदूर पसरू लागली. दरम्यानच्या काळात त्यांनी राजकीय, शैक्षणिक आणि सामाजिक विषयांवर समाजमाध्यमांवर वऱ्हाडी शैलीत रोखठोक मांडणी करण्याचा सपाटा लावला. यातून त्यांची महाराष्ट्रभर ‘खदखद मास्तर’ अशी ओळख निर्माण झाली. त्यांच्या काहीशा शिवराळ शैलीवर टीकाही केली जाते, मात्र त्यांच्या चाहत्यांची संख्या – वाढायला हीच शैली कारणीभूत ठरली, असेही सांगितले जाते.
.png "Videos"){kind=small}
