(फोटो सौजन्य - इन्स्टाग्राम)
‘धुरंधर 2’ हा चित्रपट पाकिस्तानविरोधी आशय आणि संवेदनशील विषयांमुळे खाडी देशांमध्ये बॅन करण्यात आला असताना, भारतातही त्यावरून वाद निर्माण होताना दिसत आहेत. सध्या या चित्रपटातील आर. माधवन यांच्या एका सीनवर गुरबाणीचा अपमान झाल्याचा आरोप करण्यात येत आहे. शिवसेना नेते गुरजोत सिंग कीर यांनी यावर तीव्र आक्षेप नोंदवत मेकर्सकडून सार्वजनिक माफीची मागणी केली आहे.
दरम्यान, ‘धुरंधर 2’ बॉक्स ऑफिसवर दमदार कमाई करत असतानाच त्याला ‘प्रोपगंडा फिल्म’ असल्याची टीकाही होत आहे. अवघ्या पाच दिवसांत जगभरात 855 कोटी रुपयांची कमाई केल्यानंतर आता या चित्रपटातील एका सीनमुळे वाद अधिकच वाढला आहे. या सीनमध्ये शीख धर्मातील पवित्र गुरबाणीचा कथित अपमान झाल्याचा आरोप असून, यामुळे हा मुद्दा अधिक संवेदनशील बनला आहे.
‘धुरंधर 2’मधील एका सीन वादात
‘धुरंधर 2’मधील एका सीनवरून हा वाद निर्माण झाला आहे, ज्यामध्ये आर. माधवन यांचे पात्र गुरबाणीचे उच्चारण करताना दिसते. आरोप असा आहे की, या सीनदरम्यान त्यांच्या हातात सिगारेट दाखवण्यात आली आहे. शीख समुदाय आणि काही नेत्यांच्या मते, अशा प्रकारे सीन सादर करणे हे धार्मिक मर्यादांच्या विरोधात आहे. त्यामुळे या दृश्यामुळे धार्मिक भावना दुखावल्या गेल्याचा दावा केला जात आहे.
गुरजोत सिंग कीर यांनी सोशल मीडियावर व्यक्त केली नाराजी
शिवसेना नेते गुरजोत सिंग कीर यांनी सोशल मीडियावर आपली नाराजी व्यक्त केली आहे. त्यांनी व्हिडिओ शेअर करत संबंधित सीनला आक्षेपार्ह ठरवले आहे. त्यांच्या मते, गुरबाणी ही शीख धर्मातील अत्यंत पवित्र वाणी असून, ती अशा प्रकारे दाखवणे कोणत्याही परिस्थितीत योग्य नाही. यासोबतच त्यांनी चित्रपट निर्मात्यांनी तात्काळ सार्वजनिक माफी मागावी आणि हा वादग्रस्त सीन हटवावा, अशी मागणीही केली आहे.
इतकेच नव्हे, तर त्यांनी इशाराही दिला की लवकरात लवकर कारवाई झाली नाही, तर या मुद्द्यावर आंदोलन उभारले जाऊ शकते. धार्मिक भावना आणि श्रद्धेशी संबंधित विषयांमध्ये संवेदनशीलता राखणे अत्यंत आवश्यक आहे, असे त्यांनी नमूद केले आहे.
या मुद्द्याबाबत तक्रारही दाखल करण्यात आली
रिपोर्टनुसार, या प्रकरणी तक्रारही दाखल करण्यात आली असून, या तक्रारीत चित्रपटाशी संबंधित व्यक्तींवर धार्मिक भावना दुखावल्याचा आरोप करण्यात आला आहे. मात्र, या वादावर अद्याप चित्रपट निर्मात्यांकडून कोणतीही अधिकृत प्रतिक्रिया समोर आलेली नाही. दरम्यान, ‘धुरंधर 2’चा बॉक्स ऑफिसवर दमदार परफॉर्मन्स सुरू असून, अवघ्या पाच दिवसांत या चित्रपटाने जगभरात सुमारे 856 कोटी रुपयांची कमाई केली आहे.
.png "Videos"){kind=small}
