निळू फुलेंच्या लेकीचा राष्ट्रवादी काँग्रेसमध्ये प्रवेश, गार्गी फुले नक्की आहेत तरी कोण?

राष्ट्रवादी काँग्रेसमध्ये प्रवेश केल्यानंतर गार्गी फुले म्हणाल्या, गेल्या काही दिवसांपासून अजित पवार यांच्यासोबत काम करण्याची इच्छा होती. त्यामुळे मला विचारणा झाल्यानंतर लगेचच मी हो म्हटलं.

गेल्या काही दिवसांत अनेक मराठी कलाकार राजकारणात प्रवेश करत आहेत. आता अभिनेते निळू फुले यांची लेक, अभिनेत्री गार्गी फुले (Gargi Nilu Phule) यांनी राष्ट्रवादी काँग्रेस (Rashtrawadi Congress) या पक्षामध्ये प्रवेश केला आहे. प्रदेशाध्यक्ष जयंत पाटील, विधानसभेचे विरोधी पक्ष नेते अजित पवार यांच्या उपस्थितीत गार्गी यांनी राष्ट्रवादी काँग्रेसमध्ये प्रवेश (Gargi Phule Enters NCP) केला आहे.

राष्ट्रवादी काँग्रेसमध्ये प्रवेश केल्यानंतर गार्गी फुले म्हणाल्या,“गेल्या काही दिवसांपासून अजित पवार यांच्यासोबत काम करण्याची इच्छा होती. त्यामुळे मला विचारणा झाल्यानंतर लगेचच मी हो म्हटलं. राष्ट्रवादी पक्षाची जी विचारसरणी आणि विचार आहेत. त्याच विचारसरणीचे माझे बाबा निळू फुले होते. त्यामुळे माझ्या वडिलांचे जे विचार होते. त्या विचारांना राष्ट्रवादी काँग्रेस न्याय देईल”.

त्या पुढे म्हणाल्या,“राष्ट्रवादीसोबत काम करण्याचा मला आनंद आहे. शरद पवार, सुप्रिया सुळे, अजित पवार यांच्यासोबत वडिलांचे खूप चांगले संबंध आहेत. आता पक्षासाठी काहीतरी करण्याची इच्छा आहे. त्यामुळे मी राष्ट्रवादी काँग्रेससोबत प्रवाहात येईन. आता नुसतं किनाऱ्यावर बसून पाहायचं नाही. मुख्य प्रवाहात येऊन काम करायचं मी ठरवलं आहे. तरुणांना वाटतं राजकारणात यावं आणि बदल व्हावा तसाच माझा सुद्धा प्रयत्न असेल. भविष्यात पक्षाने तिकीट दिलं तर लढेन”.

स्त्रीमुक्ती विषयात पदवी
गार्गी फुले यांनी स्त्रीमुक्ती या विषयात पदवी घेतली आहे. अभिनयाचं बाळकडू त्यांना त्यांचे वडिल निळू फुले यांच्याकडून मिळालं. पुढे मग 1998 साली प्रायोगिक नाटकाच्या माध्यमातून त्या मनोरंजनसृष्टीशी जोडल्या गेल्या. सत्यदेव दुबे यांच्याकडे त्यांनी अभिनयाचं शिक्षण घेतलं. समन्वय या नाट्यसंस्थेच्या प्रायोगिक नाटकात गार्गी फुले यांनी काम केलं आहे.

मालिका, सिनेमा आणि वेबसीरीजमध्येही गार्गी फुलेंचं काम
गार्गी फुले यांनी मराठी मालिका, सिनेमे, नाटक आणि वेबसीरिजमध्ये काम केलं आहे. ‘मळभ’, ‘कोवळी उन्हे’, ‘श्रीमंत’, ‘वासंती जीर्णनी’, ‘सुदामा के चावल’, ‘सोनाटा’ इत्यादी नाटकांमध्ये गार्गी फुले यांनी काम केलं आहे. तर ‘राजा राणी ची गं जोडी’, ‘सुंदरा मनामध्ये भरली’, ‘तुला पाहते रे’, ‘कट्टी बट्टी’ या मालिकांमध्ये गार्गी फुले यांनी महत्त्वाची भूमिका निभावली आहे. तसेच ‘चिकटगुंडे’सारख्या वेबसीरिजमध्येही त्या झळकल्या आहेत. आता राजकारणात त्यांचं काम कसं असेल याविषयी सगळ्यांना उत्सुकता आहे.