dharmendra passed Away : अभिनयाचा ‘ही-मॅन’ काळाच्या पडद्याआड; CM फडणवीस यांच्यासह राजकीय नेत्यांनी वाहिली श्रद्धांजली

dharmendra passed Away : बॉलीवुड अभिनेते धर्मेंद्र यांचे निधन झाले आहे. मुख्यमंत्री देवेंद्र फडणवीस यांच्यासह उपमुख्यमंत्री अजित पवार आणि उपमुख्यमंत्री एकनाथ शिंदे यांनी देखील भावना व्यक्त केल्या आहेत.

• बॉलीवुड अभिनेते धर्मेंद्र यांचे निधन
• राजकीय क्षेत्रातून अभिनेते धर्मेंद्र यांना वाहिली श्रद्धांजली
• मुख्यमंत्री देवेंद्र फडणवीसांनी व्यक्त केला शोक

Political Leaders on Dharmendra : मुंबई : हिंदी चित्रपटसृष्टीतील ज्येष्ठ अभिनेते धर्मेंद्र यांचे वृद्घापकालाने निधन झाले. त्यांच्या जाण्याने बॉलीवुडमध्ये एक पोकळी निर्माण झाली. 60 चे दशक गाजवणाऱ्या धर्मेंद्र यांनी अभिनय क्षेत्रामध्ये वेगळी ओळख निर्माण केली आहे. धर्मेंद्र यांचा अभिनय आणि हटके स्टाईल यामुळे ते कायम सर्वांच्या मनामध्ये घर करुन राहिले. त्यांनी जगाचा निरोप घेतल्यानंतर सर्वच क्षेत्रातून श्रद्धांजली वाहिली जात आहे. मुख्यमंत्री देवेंद्र फडणवीस यांच्यासह उपमुख्यमंत्री अजित पवार आणि उपमुख्यमंत्री एकनाथ शिंदे यांनी देखील भावना व्यक्त केल्या आहेत.

भारतीय चित्रपटसृष्टीचा सुवर्णकाळ गाजवणारा लखलखता तारा निखळल्याची शोकभावना व्यक्त करून मुख्यमंत्री देवेंद्र फडणवीस यांनी ज्येष्ठ अभिनेते पद्मभूषण धर्मेंद्र यांना भावपूर्ण श्रद्धांजली अर्पण केली. ते म्हणाले की, ज्येष्ठ अभिनेते धर्मेंद्र यांचा हिंदी चित्रपट सृष्टीतला प्रवास वैशिष्ट्यपूर्ण राहिला आहे. कृष्ण-धवल काळ ते रंगीत आणि अलिकडच्या तांत्रिकदृष्ट्या आधुनिक प्रवाहात ते कार्यशील राहिले. ते चित्रपटसृष्टीतील बदलाचे, भरभराटीपासून ते आतापर्यंतच्या काळाचे महत्वाचे साक्षीदार राहिले. नायक म्हणून तरूण वयात सालस, स्वप्नाळू नायक ते विविध चित्रपटात वाट्याला आलेल्या भूमिका त्यांनी अभिनयाने आयकॉनिक ठरवल्या. शोले चित्रपटातील पडद्यावरील वीरू प्रमाणेच ते प्रत्यक्षातही मैत्र जपणारे होते. मध्यंतरी त्यांनी लोकसभेत भारतीय जनता पक्षाचे खासदार म्हणून बिकानेरचे प्रतिनिधीत्व केले होते. पण त्यांनी चित्रपटसृष्टी आणि अभिनय, या क्षेत्रातील प्रयोगशीलता यांनाच अधिक प्राधान्य दिले. आयुष्याच्या अखेरच्या क्षणापर्यंत ते चित्रपट सृष्टीत सक्रिय राहिले. त्यांच्या निधनाने आपल्या चित्रपट सृष्टीचा सुवर्णकाळ गाजवणारा तारा निखळला, अशा भावना मुख्यमंत्री देवेंद्र फडणवीस यांनी व्यक्त केल्या आहेत.

राजकीय बातम्या वाचण्यासाठी क्लिक करा

त्याचबरोबर उपमुख्यमंत्री अजित पवार यांनी देखील अभिनेते धर्मेंद्र यांना श्रद्धांजली वाहिली आहे. हिंदी चित्रपटसृष्टीतील ज्येष्ठ अभिनेते धर्मेंद्र यांच्या निधनाने भारतीय चित्रपटसृष्टीतील एका तेजस्वी पर्वाचा अंत झाला असून, अभिनयाचा ‘ही-मॅन’ काळाच्या पडद्याआड गेला आहे, अशा शब्दांत उपमुख्यमंत्री अजित पवार यांनी आपल्या शोकभावना व्यक्त करत त्यांना श्रद्धांजली अर्पण केली. ते म्हणाले की, धर्मेंद्र यांच्या अभिनयात नैसर्गिकता, साधेपणा आणि मनाला भिडणारी भावनिक ताकद होती. धर्मेंद्र यांचा चित्रपट प्रवास म्हणजे मेहनत, समर्पण आणि कलाविश्वाप्रती असलेल्या निःस्वार्थ प्रेमाचे प्रतीक आहे. त्यांनी अनेक पिढ्यांतील प्रेक्षकांना आपल्या अभिनयातून निखळ आनंद दिला. त्यांच्या जाण्याने हिंदी चित्रपटसृष्टीचे मोठे नुकसान झाले आहे, असे अजित पवार म्हणाले आहेत.

महाराष्ट्रसंबंधित बातम्या वाचण्यासाठी क्लिक करा

त्याचबरोबर उपमुख्यमंत्री एकनाथ शिंदे यांनी देखील एक्स या सोशल मीडिया प्लॅटफॉर्मवर भावना व्यक्त केल्या आहेत. एकनाथ शिंदे यांनी लिहिले आहे की, बॉलिवूडचे सदाबहार अभिनेते धर्मेंद्र यांचे आज निधन झाले. आपल्या साठ वर्षाच्या कारकीर्दीत त्यांनी आपल्या अदाकारीने माझ्यासारख्या अगणित चाहत्यांना निखळ आनंद देण्याचे काम केले. आपल्या कामातून सदैव आनंद देणारा हा जट, यमला.. पगला.. दिवाना.. जाता जाता प्रत्येक रसिक मनाला दुःखी करून अनंताच्या प्रवासाला निघून गेला आहे, असे एकनाथ शिंदे यांनी लिहिले आहे.