Devendra Fadnavis On Maharashtra Drought: अनावश्यक खर्च टाळा, पाणी जपून वापरा’; मुख्यमंत्री देवेंद्र फडणवीसांचे आवाहन

Devendra Fadnavis News: पिण्याच्या पाण्याच्या संभाव्य संकटावर सरकारने आतापासूनच नियोजन सुरू केले आहे. प्रत्येक जिल्ह्याला स्वतंत्र पाण्याचा आराखडा तयार करण्यास सांगण्यात आले आहे.

• राज्यातील २६५ तालुक्यांमध्ये दुष्काळ जाहीर, मदतकार्य सुरू
• जुलै-ऑगस्ट २०२७ पर्यंत धरण साठा पुरवण्याचे पाणी नियोजनाचे निर्देश
• लग्नकार्यांमधील अनावश्यक खर्च टाळून दुष्काळग्रस्तांना मदत करण्याचे आवाहन

Devendra Fadnavis News: राज्यात २६५ तालुक्यांमध्ये दुष्काळ जाहीर केल्यानंतर राज्य सरकारने मदतकार्याला सुरुवात केली आहे. दुष्काळाच्या परिस्थितीत प्रत्येकाने संवेदनशीलता दाखवून अनावश्यक खर्च टाळावा, तसेच उपलब्ध पाण्याचे नियोजन करून भविष्यातील पाणीटंचाईला सामोरे जाण्याची तयारी करावी, असे आवाहन मुख्यमंत्री देवेंद्र फडणवीस यांनी रविवारी नागरिकांना केले. दरम्यान, मोठ्या धरणांमध्ये उपलब्ध असलेला पाणीसाठा जुलै-ऑगस्ट २०२७पर्यंत पुरेल, अशा पद्धतीने नियोजन करण्याचे निर्देशही त्यांनी दिले.

दुष्काळाच्या पार्श्वभूमीवर लग्न समारंभआणि इतर कार्यक्रमांमध्ये खर्च कमी करण्याबाबत फडणवीस म्हणाले, दुष्काळाच्या परिस्थितीमध्ये संवेदनशीलता ठेवणे आवश्यक आहे. थोडा खर्च कमी करणे किंवा आवश्यक गोष्टींवरच खर्च करणे गरजेचे आहे, काही आवश्यक बाबींवरील खर्च करावाच लागतो. मात्र, ज्या गोष्टी टाळता येऊ शकतात किंवा कमी प्रमाणात करता येऊ शकतात, त्या कमी कराव्यात. त्यातून होणारी बचत दुष्काळग्रस्तांसाठी मदतीच्या स्वरूपात वापरता येऊ शकते. केवळ आर्थिक मदतच नव्हे, तर इतर स्वरूपाची मदतही नागरिकांनी करावी, असे आवाहन मुख्यमंत्र्यांनी केले.

Maharashtra Drought : दुष्काळावर विशेष अधिवेशन बोलवा, शरद पवारांचं मुख्यमंत्र्यांना पत्र

गडचिरोलीतील पूरग्रस्तांना मदत

छत्तीसगडमध्ये झालेल्या अतिवृष्टीमुळे गडचिरोली जिल्ह्यातील भामरागड परिसरात पूरस्थिती निर्माण झाली आहे. प्रशासनाकडून आवश्यक मदत दिली जात असून प्रशासनाच्या संपर्कात असल्याचे मुख्यमंत्री म्हणाले पूरस्थिती हळूहळू निवळत असून जनजीवन पूर्वपदावर येत असल्याची माहिती त्यांनी दिली.

पाण्याचे नियोजन सुरू

पिण्याच्या पाण्याच्या संभाव्य संकटावर सरकारने आतापासूनच नियोजन सुरू केले आहे. प्रत्येक जिल्ह्याला स्वतंत्र पाण्याचा आराखडा तयार करण्यास सांगण्यात आले आहे. उपलब्ध पाणीसाठा आणि आगामी काळातील पाण्याची गरज याचा आढावा घेऊन जुलै-ऑगस्ट २०२७ पर्यंत पाणी पुरेल, याची खात्री करण्यावर भर दिला जात आहे, असे मुख्यमंत्र्यांनी सांगितले. एल निनोचा परिणाम लक्षात घेऊन तयारीः एल निनोच्या स्थितीबाबतही सरकार लक्ष ठेवून आहे. सध्या असलेला एल निनो आणखी वाढण्याची शक्यता असून, तो फेब्रुवारीपर्यंत उच्चांकावर जाण्याची शक्यता आहे.

Harshvardhan Sapkal : ‘राहुल गांधींच्या टीकेचा फडणवीसांनी धसका घेतला?’ हर्षवर्धन सपकाळांचा जोरदार

यादीत समावेश न झालेल्या तालुक्यांनाही दिलासा

कोरड्या दुष्काळाच्या यादीत काही तालुके समाविष्ट झाले नसल्याच्या तक्रारी सरकारकडे येत आहेत. या तालुक्यांचीही पाहणी केली जाणार आहे. ज्या शेतकऱ्यांचे नुकसान झाले आहे, त्यांना ‘ट्रिगर-३’ अंतर्गत समाविष्ट करून मदत देण्यात येईल. कोणताही नुकसानग्रस्त शेतकरी मदतीपासून वंचित राहणार नाही, असे मुख्यमंत्र्यांनी स्पष्ट केले.