Local Body Elections: पुण्यात राजकीय हालचालींना वेग! राज ठाकरे आणि मविआ वंचितची युती ठरली, 5 पक्ष देणार एकत्रित लढत

राज्यातील स्थानिक स्वराज्य संस्थांच्या निवडणुका जाहीर होण्याच्या पार्श्वभूमीवर मावळ तालुक्यात राजकीय घडामोडींना वेग आला आहे. मावळ तालुक्यामध्ये पाच पक्ष एकत्रित निवडणूक लढवणार आहेत. 

• स्थानिक स्वराज्य संस्थांच्या निवडणुकांमुळे राजकीय हालचालींना वेग
• वडगाव मावळमध्ये पाच पक्ष मिळून एकत्रित निवडणूक लढवणार
• राज ठाकरे आणि वंचित आघाडीची महाविकास आघाडीला सोबत

Local Body Elections 2025: वडगाव मावळ : राज्यामध्ये स्थानिक स्वराज्य संस्थांच्या निवडणूका होणार आहेत. त्यामुळे राजकीय हालचालींना वेग आला आहे. सर्वच राजकीय पक्षांनी पालिका, नगरपरिषदांवर वर्चस्व मिळवण्यासाठी रणनीती आखण्यास सुरुवात केली आहे. तसेच राजकीय पक्षांनी देखील मोट बांधण्यास सुरुवात केली आहे. याच पार्श्वभूमीवर वडगाव मावळमध्ये देखील राजकारणाला उधाण आले आहे. राज्यातील स्थानिक स्वराज्य संस्थांच्या निवडणुका जाहीर होण्याच्या पार्श्वभूमीवर मावळ तालुक्यात राजकीय घडामोडींना वेग आला आहे. मावळ तालुक्यामध्ये पाच पक्ष एकत्रित निवडणूक लढवणार आहेत.

आतापर्यंत राष्ट्रवादी काँग्रेस पार्टी आणि भारतीय जनता पार्टी या दोन पक्षांपुरतीच मर्यादित असलेली राजकीय चर्चा आता अधिक व्यापक झाली आहे. मावळ तालुक्यातील काँग्रेस (आय), राष्ट्रवादी काँग्रेस पार्टी (शरदचंद्र पवार गट), शिवसेना (उद्धव बाळासाहेब ठाकरे), महाराष्ट्र नवनिर्माण सेना आणि वंचित बहुजन आघाडी हे पाच पक्ष एकत्र येऊन महाविकासआघाडीच्या माध्यमातून एकजुटीने निवडणुकीला सामोरे जाणार आहे.

राजकीय बातम्या वाचण्यासाठी क्लिक करा 

या संदर्भात सोमवारी (दि. २७ ऑक्टोबर) तळेगाव दाभाडे येथे महाविकासआघाडीच्या घटक पक्षांच्या तालुकाध्यक्षांच्या उपस्थितीत पत्रकार परिषद पार पडली. या वेळी काँग्रेसचे तालुकाध्यक्ष यशवंत मोहोळ, राष्ट्रवादी काँग्रेस (शरदचंद्र पवार) पक्षाचे तालुकाध्यक्ष दत्तात्रय पडवळ, शिवसेना (उबाठा) चे तालुकाध्यक्ष आशिष ठोंबरे, महाराष्ट्र नवनिर्माण सेनेचे तालुकाध्यक्ष अशोक कुटे आणि वंचित बहुजन आघाडीचे तालुकाध्यक्ष उपस्थित होते.

या पाचही पक्षांच्या प्रतिनिधींनी एकमताने जाहीर केले की, मावळ तालुक्यातील जिल्हा परिषद, पंचायत समिती, तळेगाव दाभाडे आणि लोणावळा नगरपरिषदा तसेच वडगाव मावळ नगरपंचायतीच्या निवडणुका ‘महाविकासआघाडी’च्या बॅनरखाली लढवल्या जाणार आहेत.

यावेळी पदाधिकाऱ्यांनी सांगितले की, “लोकशाही टिकविण्यासाठी विरोधकांचा आवाज सशक्त राहणे आवश्यक आहे. मावळात जनतेच्या प्रश्नांवर, विकासावर आणि पारदर्शक कारभारासाठी आम्ही पाचही पक्ष एकत्र येऊन महाविकासआघाडीच्या माध्यमातून निवडणूक लढवू. मतदारांना एक पर्याय निर्माण करणे ही काळाची गरज आहे.” असा विश्वास त्यांनी व्यक्त केला.

महाराष्ट्रसंबंधित बातम्या वाचण्यासाठी क्लिक करा 

त्यांनी पुढे म्हटले की, “आम्ही कोणत्याही पक्षाच्या विरोधात नाही, पण जनतेच्या हितासाठी एकविचाराने लढण्याचा आमचा निर्धार आहे. योग्य ठिकाणी सन्मानपूर्वक वाटाघाटी झाल्यास तालुक्यातील काही ठिकाणी बिनविरोध निवडणुकांनाही आम्ही पाठींबा देऊ शकतो.” असे पदाधिकाऱ्यांनी सांगितले आहे.

निवडणुकीच्या पार्श्वभूमीवर हालचाली वेगवान

मावळ तालुक्यात येत्या काही महिन्यांत पंचायत समिती, जिल्हा परिषद, तसेच तळेगाव दाभाडे, लोणावळा आणि वडगाव मावळ नगरपंचायतींच्या निवडणुका पार पडणार आहेत. या सर्व निवडणुकांमध्ये भाजप आपली ताकद दाखवण्यासाठी सज्ज आहे, तर दुसरीकडे महाविकासआघाडीचे हे पाच पक्ष संयुक्त रणनिती आखत आहेत. आगामी काही दिवसांत या आघाडीचे संयुक्त जाहीरनामा, प्रचार समिती आणि उमेदवार निवड प्रक्रिया जाहीर होण्याची शक्यता आहे. महाविकासआघाडीच्या या घडामोडीमुळे मावळ तालुक्यातील राजकीय वातावरण आणखी रंगतदार झाले आहे.