रा-भाईंदर जैनांची नगरी’ वक्तव्यावरून मनसे आक्रमक, सचिन पोपळेंचा नरेंद्र मेहतांवर निशाणा, म्हणाले- ‘हे शहर आगरी-कोळी मराठी माणसांचे’
ठाण्यातील कार्यक्रमात बोलताना नरेंद्र मेहता यांनी जैन समाजाच्या धार्मिक प्रथांवरून राजकारण करण्याचा प्रयत्न झाल्याचा दावा केला. मीरा-भाईंदरमध्येही अशाच प्रकारे वातावरण निर्माण करण्याचा प्रयत्न झाला होता; मात्र आपण तो हाणून पाडल्याचे त्यांनी सांगितले. “माझा जन्म जैन धर्मात झाला याचा मला अभिमान आहे. जैन धर्मावर जेव्हा-जेव्हा अडचण येईल, तेव्हा मी त्यांच्या पाठीशी उभा राहीन,” अशी भूमिका मेहता यांनी मांडली.
यावेळी त्यांनी मीरा-भाईंदर ही जैनांची नगरी असल्याचा उल्लेख करताना आमदार आणि महापौर दोघेही जैन असल्याचे सांगितले. तसेच मीरा-भाईंदरमध्ये प्रस्तावित ५० कोटी रुपयांच्या कत्तलखान्याचा नकाशा महापालिकेत सत्ता आल्यानंतर नामंजूर केल्याचा दावाही त्यांनी केला.
मेहता यांच्या या वक्तव्यावर मनसेचे विधानसभा अध्यक्ष सचिन पोपळे यांनी आक्षेप घेतला आहे. “मीरा-भाईंदर शहर जैनांची नगरी नसून आगरी-कोळी आणि मराठी माणसांचे शहर आहे,” असे पोपळे यांनी म्हटले आहे. मेहता यांच्या वक्तव्यामुळे मराठी-अमराठी, गुजराती आणि जैन समाजामध्ये वाद निर्माण करण्याचे काम होत असल्याचा आरोपही त्यांनी केला.
शहराची ओळख कोणत्याही एका समाजापुरती मर्यादित करता येणार नाही, अशी भूमिका मांडत पोपळे यांनी मेहतांना इशारा दिला. धार्मिक किंवा भाषिक आधारावर शहरात दुही निर्माण करणारी वक्तव्ये टाळावीत, असे आवाहनही त्यांनी केले. दरम्यान, मेहता यांच्या वक्तव्यावरून भाजप आणि मनसेमध्ये पुन्हा राजकीय संघर्ष निर्माण होण्याची शक्यता व्यक्त केली जात असून, आगामी काळात या मुद्द्यावरून मीरा-भाईंदरमध्ये राजकीय वातावरण आणखी तापण्याची चिन्हे आहेत.
.png "Videos"){kind=small}
