Parli vaijnath nagarparishad election result : बीडमध्ये मुंडे गढ राखणार की सोनावणे बाजी मारणार? मुंडे भावा-बहिणीची प्रतिष्ठा पणाला

बीडच्या निकालाकडे सर्व राज्याचे लक्ष लागले आहे. बीडमधील नगर पंचायत आणि नगर परिषदांच्या निकालामध्ये पंकजा मुंडे आणि धनंजय मुंडे या भावा-बहिणींची प्रतिष्ठा पणाला लागली आहे.

• परळी वैजनाथ नगर परिषद निकालाची जोरदार चर्चा
• बीडमध्ये पंकजा मुंडे आणि धनंजय मुंडेंची प्रतिष्ठा पणाला
• बजरंग सोनावणे यांनी दिले कडवे आव्हान

Parli vaijnath nagar parishad election result 2025  : बीड : राज्यामध्ये स्थानिक स्वराज्य संस्थांच्या निकाल हाती येत आहे. 2 डिसेंबर रोजी नगर परिषद आणि नगर पंचायतीसाठी मतदान प्रक्रिया पार पडली. यानंतर आता मतमोजणी होणार असून दुपारपर्यंत सर्व निकाल हाती येणार आहे. सध्या तरी राज्यामध्ये भाजप पक्ष आघाडीवर असल्याचे चित्र दिसून येत आहे. यामुळे भाजप पक्ष हा मोठा भाऊ म्हणून महायुतीमध्ये समोर आला आहे. दरम्यान, बीडच्या निकालाकडे सर्व राज्याचे लक्ष लागले आहे. बीडमधील नगर पंचायत आणि नगर परिषदांच्या निकालामध्ये पंकजा मुंडे आणि धनंजय मुंडे या भावा-बहिणींची प्रतिष्ठा पणाला लागली आहे.

परळी नगर परिषद निवडणुकीमध्ये लोकसभेप्रमाणे राष्ट्रवादी शरद पवार गट बाजी मारेल, लोकसभेची पुनरावृत्ती होईल असा विश्वास खासदार बजरंग सोनावणे यांनी व्यक्त केला आहे. नगर परिषदेचे निवडणूक ही जनतेने हातामध्ये घेतली असून परळीचा निकाल आमच्याच बाजूने लागेल असा विश्वास बजरंग सोनावणे यांनी व्यक्त केला आहे. तर सोनावणे यांना थेट लढत मुंडे भावा-बहिणींची आहे. पहिल्यांदाच परळी वैजनाथ नगर परिषदेमध्ये धनंजय मुंडे आणि पंकजा मुंडे हे युती करुन लढा देत आहेत. मात्र त्यांच्यासमोर राष्ट्रवादी शरद पवार गटाचे नेते बजरंग सोनावणे यांनी मोठे आव्हान उभे केले आहे. त्यामुळे यंदाची ही स्थानिक स्वराज्य संस्थांची निवडणूक मुंडे बंधू-भगिनींसाठी प्रतिष्ठेची आहे.

हे देखील वाचा : राज्यातील 288 नगरपरिषदा, नगरपंचायतींची आज मतमोजणी

परळी वैजनाथ नगर परिषदेमध्ये एकूण 33 प्रभाग आहेत. यापूर्वी 2017 साली झालेल्या निवडणुकीमध्ये राष्ट्रवादी कॉंग्रेस पक्षाने भाजपला धोबीपछाड करत दणदणीत विजय मिळवला होता. त्यावेळी एकत्र असलेल्या राष्ट्रवादीने 33 पैकी 27 जागांवर बाजी मारली होती. तर भाजपला केवळ चार जागांवर विजय मिळवण्यास यश मिळाले होते. त्यामुळे बीडमध्ये राष्ट्रवादीचा दबदबा दिसून आला होता. आता मात्र चित्र वेगळे आहे. राष्ट्रवादीचा एक गट भाजपसोबत युतीमध्ये दाखल झाला आहे. यामुळे बीडची जनता कोणच्या पाठीशी मतदानाचा कौल देणार याकडे सर्वांचे लक्ष लागले आहे.

हे देखील वाचा : सत्तेतून पैसा आणि पैशातून पुन्हा सत्ता…! भाजपवर किशोरी पेडणेकरांचा संताप, पैशांचे वाटप केल्याचा आरोप