‘हाथी चले बाजार, कुत्ते भौंके हजार’; लक्ष्मण हाकेंच्या इशाऱ्यावर प्रसाद लाड यांचा जोरदार पलटवार

लक्ष्मण हाके यांनी केलेल्या वक्तव्यानंतर प्रसाद लाड यांनी पत्रकारांशी संवाद साधत पलटवार केला. यावेळी त्यांनी ओबीसी आरक्षण, मनोज जरांगे पाटील यांचे उपोषण आणि सुरू असलेल्या चर्चांबाबतही भूमिका स्पष्ट केली.

• लक्ष्मण हाकेंच्या वक्तव्यावर प्रसाद लाड यांचे प्रत्युत्तर
• ओबीसी आरक्षणासाठीही संघर्ष करण्याची भूमिका व्यक्त
• मनोज जरांगे यांच्या उपोषणापूर्वी तोडगा काढण्याचा प्रयत्न सुरू असल्याचा दावा

 

ओबीसी नेते लक्ष्मण हाके यांनी भाजप आमदार प्रसाद लाड यांच्याविरोधात केलेल्या आक्रमक वक्तव्यानंतर राज्यातील राजकीय वातावरण पुन्हा एकदा तापले आहे. हाके यांनी प्रसाद लाड दिसल्यास त्यांच्या कानशिलात लगावणार असल्याचे वक्तव्य केल्यानंतर त्यावर आता प्रसाद लाड यांनी जोरदार पलटवार केला आहे.

पत्रकारांशी बोलताना प्रसाद लाड म्हणाले की, “प्रसाद लाड कोण आहे, हे अजून त्यांना माहिती नाही. त्यांनी आधी गुगलवर शोध घ्यावा.” यावेळी त्यांनी “हाथी चले बाजार, कुत्ते भौंके हजार” या हिंदी म्हणीचा उल्लेख करत अशा प्रकारच्या वक्तव्यांकडे आपण गांभीर्याने पाहत नसल्याचे सांगितले. “अशा लोकांना आम्ही भीक घालत नाही. अनेक आले आणि अनेक गेले,” असेही ते म्हणाले.

लाड यांनी पुढे दावा केला की, लक्ष्मण हाके यांनी त्यांच्या पूर्वीच्या वक्तव्याचा चुकीचा अर्थ लावला. ओबीसी आरक्षणाच्या प्रश्नावर संघर्षाची वेळ आली तर आपण भावासारखे त्यांच्या पाठीशी उभे राहू, असेच आपण म्हटले होते, असे त्यांनी स्पष्ट केले.

मोदी-शहा भेटीमागचं खरं कारण काय? सुनील तटकरेंचा मोठा खुलासा, राजकीय भेटींमुळे तर्कवितर्कांना उधाण

हाके यांच्यावर टीका करताना प्रसाद लाड म्हणाले की, गरज पडल्यास त्यांनाही रोजगार देण्याची तयारी आहे. “मी हजारो लोकांना रोजगार देतो. त्यांनी आम्हाला शिकवण्यापेक्षा स्वतः काहीतरी उभं करून दाखवावं,” असा टोला त्यांनी लगावला. तसेच आपल्या उद्योगसमूहावर विविध नियामक संस्थांचे सातत्याने नियंत्रण असल्याचे सांगत त्यांनी आपली भूमिका स्पष्ट केली.

यावेळी मराठा आरक्षणाच्या मुद्द्यावरही प्रसाद लाड यांनी भाष्य केले. मनोज जरांगे पाटील यांच्या उपोषणापूर्वी सकारात्मक तोडगा निघावा यासाठी राज्य सरकारच्या पातळीवर चर्चा सुरू असल्याचे त्यांनी सांगितले. उद्योगमंत्री उदय सामंत, स्वतः आणि मनोज जरांगे पाटील यांच्यात सातत्याने संवाद सुरू असल्याचा दावा त्यांनी केला.

‘प्रसाद लाड दिसले तर कानशिलात लगावणार’; लक्ष्मण हाके यांचा इशारा, मराठा आरक्षणाच्या मुद्द्यावर नवा वाद

सर्वोच्च न्यायालयातील प्रक्रियेच्या अनुषंगाने काही कायदेशीर कागदपत्रांवरही अभ्यास सुरू असल्याचे लाड यांनी सांगितले. येत्या काही दिवसांत संबंधित चर्चेसाठी आपण उपस्थित राहणार असल्याचेही त्यांनी नमूद केले. मनोज जरांगे पाटील उपोषणाला बसल्यास मोठ्या संख्येने मराठा समाजाचे नागरिक त्यांच्यासोबत आंदोलनात सहभागी होतात. त्यामुळे उपोषणाची वेळ येऊ नये आणि संवादातून मार्ग काढावा, हा आमचा प्रयत्न असल्याचे प्रसाद लाड यांनी स्पष्ट केले.