फोटो सौजन्य: Gemini
रविवारी (20 डिसेंबर 2025) मतमोजणी होणार असून, संगमनेरचा नगराध्यक्ष कोण, याचा फैसला होणार आहे. निकाल जवळ आल्याने सध्या सर्वच उमेदवारांची धडधड वाढली आहे. संगमनेरमध्ये नगराध्यक्षपदासाठी शिवसेना महायुतीकडून आमदार अमोल खताळ यांच्या वहिनी सुवर्णा खताळ, तर विरोधी संगमनेर सेवा समितीकडून आमदार सत्यजित तांबे यांच्या पत्नी मैथिली यांच्यातच दुरंगी लढत आहे. त्यामुळे या लढतीकडे संपूर्ण जिल्ह्याचे लक्ष लागले असून, या निवडणुकीच्या निमित्ताने आमदार खताळ आणि आमदार तांबे यांची राजकीय प्रतिष्ठा पणाला लागली आहे.
यामध्ये मुस्लिमबहुल भागात सर्वाधिक मतदान झाले आहे. मतदानाचा हा टक्का किती प्रभावी ठरतो, यावरच उमेदवारांचे राजकीय भवितव्य अवलंबून आहे. नगरसेवकपदाच्या निवडणुकीतही राजकीय समीकरणे गुंतागुंतीची ठरली आहेत. संगमनेर सेवा समिती, भाजप-शिवसेना महायुती यांच्यासह राज्याच्या राजकारणात महायुतीचा घटकपक्ष असलेला राष्ट्रवादी काँग्रेस (अजित पवार गट), स्वतंत्रपणे आपले अस्तित्व दाखवण्याचा प्रयत्न करत आहे. त्यामुळे काही प्रभागांत तिरंगी, काही ठिकाणी चौरंगी, तर काही ठिकाणी बहुरंगी लढती पाहायला मिळाल्या. यात मतांचे विभाजन कोणाच्या फायद्याचे आणि कोणाच्या तोट्याचे ठरणार, याबाबत तर्क-वितर्क लढविले जात आहेत.
नगरपरिषदेची रणधुमाळी संपल्यानंतर अवघ्या एक ते दीड महिन्यातच पंचायत समिती आणि जिल्हा परिषदेची निवडणूक होणार आहे. त्यामुळे नगरपालिकेचा निकाल त्या निवडणुकीसाठी उपांत्य सामना मानला जात आहे. येथे मिळणारी आघाडी किंवा पिछाडी राजकीय दिशा ठरवणारी ठरू शकते. त्यामुळे भविष्यातील संगमनेरचा खरा किंगमेकर कोण ठरणार, हे या निवडणुकीतून स्पष्ट होईल.
‘भाजपला कधी मिळाले नाही तेवढं यश नगरपरिषद निवडणुकीत मिळणार’; चंद्रशेखर बावनकुळेंचा विश्वास
प्रभाग एक, दोन, तीन-ब साठी विरोधी उमेदवारांनी न्यायालयात याचिका दाखल केली होती. त्यामुळे तेथील स्थगित केलेले मतदान शनिवारी होत आहे. शिवसेनेचे अभिजित ऊर्फ मुन्ना पुंड, माजी नगराध्यक्ष दिलीप पुंड, इंदिरा नामन, अर्चना दिघे, तसेच अपक्ष दोन उमेदवाराचे राजकीय भवितव्य कसे असेल हे उद्या समजेल.
.png "Videos"){kind=small}
