DCC Bank Election Result : तीन जिल्हा बँकांचे निकाल जाहीर! सातारा, सांगली, अहिल्यानगरमध्ये कोणाची सत्ता?

DCC Bank Election Result : राज्यातील सातारा, सांगली आणि अहिल्यानगर जिल्हा मध्यवर्ती सहकारी बँकांच्या निवडणुकीचे निकाल जाहीर झाले आहेत. या निकालांनी राज्यातील स्थानिक राजकारणाची नवी समीकरणं समोर आणली आहेत.

• तीन जिल्हा बँकांच्या निवडणुकीचा निकाल जाहीर
• साताऱ्यात भाजप सर्वाधिक जागांवर विजयी; सत्तेसाठी संघर्ष
• अहिल्यानगरमध्ये विखे-थोरात पॅनेलचं निर्विवाद वर्चस्व
• सांगलीत संजय काका पाटील ठरणार किंगमेकर

 

मुंबई : राज्यातील सहकार क्षेत्राचं लक्ष लागून राहिलेल्या सातारा, सांगली आणि अहिल्यानगर जिल्हा मध्यवर्ती सहकारी बँकांच्या निवडणुकांचे निकाल जाहीर झाले आहेत. या निकालांनी राज्यातील स्थानिक राजकारणाची नवी समीकरणं समोर आणली आहेत. अहिल्यानगरमध्ये विखे-थोरात पॅनेलने वर्चस्व मिळवलं, सांगलीत अपक्ष संजय काका पाटील यांच्या विजयामुळे सत्तेची गणितं बदलली, तर साताऱ्यात कोणाची सत्ता येणार, याबाबत उत्सुकता वाढली आहे. (DCC Bank Election Result)

साताऱ्यात भाजप वरचढ, पण सत्तेचा पेच कायम!

सातारा जिल्हा मध्यवर्ती सहकारी बँकेच्या २१ संचालकपदांसाठी झालेल्या निवडणुकीत भाजपने ९ जागा जिंकल्या आहेत. अजित पवारांच्या राष्ट्रवादी काँग्रेसला ८, तर एकनाथ शिंदे यांच्या शिवसेनेला ४ जागा मिळाल्या आहेत.

विशेष म्हणजे, राज्यात महायुतीत एकत्र असलेले हे तिन्ही पक्ष साताऱ्यात मात्र एकमेकांविरोधात लढले. त्यामुळे आता बँकेच्या अध्यक्षपदासाठी कोणते राजकीय समीकरण जुळणार, याकडे लक्ष लागलं आहे.

Satara Dictrict Bank Election : जावळीत शिवेंद्रराजेंच्या निष्ठावंताचा डंका! ज्ञानदेव रांजणे यांचा जिल्हा बँक निवडणुकीत दणदणीत विजय

अहिल्यानगरमध्ये विखे-थोरातांची एकहाती बाजी!

अहिल्यानगर जिल्हा बँकेत राधाकृष्ण विखे पाटील आणि बाळासाहेब थोरात यांच्या नेतृत्वाखालील सहकार विकास पॅनेलने तब्बल २१ पैकी १८ जागा जिंकल्या आहेत.

भाजप नेते राम शिंदे यांच्या गटाला २ जागा मिळाल्या, तर शरद पवार यांच्या राष्ट्रवादीचे खासदार निलेश लंके यांनीही विजय मिळवला आहे. त्यामुळे या जिल्हा बँकेत विखे-थोरात गटाचं वर्चस्व स्पष्ट झालं आहे.

सांगलीत संजय काका पाटील ठरणार किंगमेकर!

सांगली जिल्हा बँकेच्या निवडणुकीत मात्र वेगळंच चित्र पाहायला मिळालं. काँग्रेस आघाडीला ६, भाजपला ५, शरद पवारांच्या राष्ट्रवादीला ४, शिवसेनेला ३ आणि अजित पवारांच्या राष्ट्रवादीला २ जागा मिळाल्या आहेत.

माजी खासदार संजय काका पाटील यांनी अपक्ष म्हणून विजय मिळवला. विशेष म्हणजे, त्यांचा विजय अवघ्या २ मतांनी झाला. त्यामुळे सत्ता स्थापनेसाठी आवश्यक असलेल्या ११ जागांच्या गणितात त्यांची भूमिका महत्त्वाची ठरणार आहे.

एकूणच, तीन जिल्ह्यांतील निकालांनी सहकार क्षेत्रातील राजकीय समीकरणं बदलली आहेत. सातारा आणि सांगलीतील सत्तास्थापनेच्या हालचालींकडे आता सर्वांचं लक्ष असणार आहे.

Satara District Bank Election: जिल्हा बँकेत भाजप सर्वात मोठा पक्ष; नऊ जागा पटकावून अध्यक्ष पदाची मोर्चेबांधणी